Preparing Your Space .

Settling the page into your current context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

stotrasangraha

kṛṣṇāṣṭottaraśatanāmastotram

कृष्णाष्टोत्तरशतनामस्तोत्रम्

Verse

ॐ अस्य श्रीकृष्णाष्टोत्तरशतनामस्तोत्रस्य श्रीशेष ऋषिः। अनुष्टुप्-छन्दः। श्रीकृष्णो देवता। श्रीकृष्णप्रीत्यर्थे श्री-कृष्णाष्टोत्तरशतनामजपे विनियोगः।

Verse

शिखिमुकुटविशेषं नीलपद्माङ्गदेशं विधुमुखकृतकेशं कौस्तुभापीतवेशम् । मधुररवकलेशं शं भजे भ्रातृशेषं व्रजजनवनितेशं माधवं राधिकेशम् ॥

Verse

वसुन्धरे वरारोहे जनानामस्ति मुक्तिदम् । सर्वमङ्गलमूर्धन्यमणिमाद्यष्टसिद्धिदम् ॥

Verse

महापातककोटिघ्नं सर्वतीर्थफलप्रदम् । समस्तजपयज्ञानां फलदं पापनाशनम् ॥

Verse

शृणु देवि प्रवक्ष्यामि नाम्नामष्टोत्तर शतम् । सहस्रनाम्नां पुण्यानां त्रिरावृत्या तु यत्फलम् ॥

Verse

एकावृत्या तु कृष्णस्य नामैकं तत् प्रयच्छति । तस्मात्पुण्यतरं चैतत्स्तोत्रं पातकनाशनम् ॥

Verse

नाम्नामष्टोत्तरशतस्याहमेव ऋषिः प्रिये । छन्दोऽनुष्टुब्देवता तु योगः कृष्णप्रियावहः ॥

Verse

श्रीकृष्णः कमलानाथो वासुदेवः सनातनः । वसुदेवात्मजः पुण्यो लीलामानुषविग्रहः ॥१॥

Verse

श्रीवत्सकौस्तुभधरो यशोदावत्सलो हरिः । चतुर्भुजात्तचक्रासिगदाशङ्खाम्बुजायुधः ॥२॥

Verse

देवकीनन्दनः श्रीशो नन्दगोपप्रियात्मजः । यमुनावेगसंहारी बलभद्रप्रियानुजः ॥३॥

Verse

पूतनाजीवितहरः शकटासुरभञ्जनः । नन्दव्रजजनानन्दी सच्चिदानन्दविग्रहः ॥४॥

Verse

नवनीतविलिप्ताङ्गो नवनीतनटोऽनघः । नवनीतनवाहारो मुचुकुन्दप्रसादकः ॥५॥

Verse

षोडशस्त्रीसहस्रेशस्त्रिभङ्गी मधुराकृतिः । शुकवागमृताब्धीन्दुर्गोविन्दो योगिनां पतिः ॥६॥

Verse

वत्सवाटचरोऽनन्तो धेनुकासुरभञ्जनः । तृणीकृततृणावर्तो यमलार्जुनभञ्जनः ॥७॥

Verse

उत्तालतालभेत्ता च तमालश्यामलाकृतिः । गोपगोपीश्वरो योगी कोटिसूर्यसमप्रभः ॥८॥

Verse

इलापतिः परञ्ज्योतिर्यादवेन्द्रो यदूद्वहः । वनमाली पीतवासाः पारिजातापहारकः ॥९॥

Verse

गोवर्धनाचलोद्धर्ता गोपालः सर्वपालकः । अजो निरञ्जनः कामजनकः कञ्जलोचनः ॥१०॥

Verse

मधुहा मथुरानाथो द्वारकानायको बली । वृन्दावनान्तसञ्चारी तुलसीदामभूषणः ॥११॥

Verse

स्यमन्तकमणेर्हर्ता नरनारायणात्मकः । कुब्जाकृष्णाम्बरधरो मायी परमपूरुषः ॥१२॥

Verse

मुष्टिकासुरचाणूरमल्लयुद्धविशारदः । संसारवैरी कंसारिर्मुरारिर्नरकान्तकः ॥१३॥

Verse

अनादिब्रह्मचारी च कृष्णाव्यसनकर्षकः । शिशुपालशिरश्छेत्ता दुर्योधनकुलान्तकः ॥१४॥

Verse

विदुराक्रूरवरदो विश्वरूपप्रदर्शकः । सत्यवाक् सत्यसङ्कल्पः सत्यभामारतो जयी ॥१५॥

Verse

सुभद्रापूर्वजो विष्णुर्भीष्ममुक्तिप्रदायकः । जगद्गुरुर्जगन्नाथो वेणुनादविशारदः ॥१६॥

Verse

वृषभासुरविध्वंसी बाणासुरकरान्तकः । युधिष्ठिरप्रतिष्ठाता बर्हिबर्हावतंसकः ॥१७॥

Verse

पार्थसारथिरव्यक्तो गीतामृतमहोदधिः । कालीयफणिमाणिक्यरञ्जितश्रीपदाम्बुजः ॥१८॥

Verse

दामोदरो यज्ञभोक्ता दानवेन्द्रविनाशकः । नारायणः परब्रह्म पन्नगाशनवाहनः ॥१९॥

Verse

जलक्रीडासमासक्तगोपीवस्त्रापहारकः । पुण्यश्लोकस्तीर्थपादो वेदवेद्यो दयानिधिः ॥२०॥

Verse

सर्वतीर्थात्मकः सर्वग्रहरूपी परात्परः । इत्येवं कृष्णदेवस्य नाम्नामष्टोत्तरं शतम् ॥२१॥

Verse

कृष्णेन कृष्णभक्तेन श्रुत्वा गीतामृतं पुरा । स्तोत्रं कृष्णप्रियकरं कृतं तस्मान्मया श्रुतम् ॥२२॥

Verse

कृष्णप्रेमामृतं नाम परमानन्ददायकम् । अत्युपद्रवदुःखघ्नं परमायुष्यवर्धनम् ॥२३॥

Verse

दानं व्रतं तपस्तीर्थं यत् कृतं त्विह जन्मनि । पठतां शृण्वतां चैव कोटिकोटिगुणं भवेत् ॥२४॥

Verse

पुत्त्रप्रदमपुत्त्राणामगतीनां गतिप्रदम् । धनावहं दरिद्राणां जयेच्छूनां जयावहम् ॥२५॥

Verse

शिशूनां गोकुलानां च पुष्टिदं पुण्यवर्धनम् । बालरोगग्रहादीनां शमनं शान्तिकारकम् ॥२६॥

Verse

अन्ते कृष्णस्मरणदं भवतापत्रयापहम् । असिद्धसाधकं भद्रे जपादिकरमात्मनाम् ॥२७॥

Verse

कृष्णाय यादवेन्द्राय ज्ञानमुद्राय योगिने । नाथाय रुक्मिणीशाय नमो वेदान्तवेदिने ॥२८॥

Verse

इमं मन्त्रं महादेवि जपन्नेव दिवानिशम् । सर्वग्रहानुग्रहभाक् सर्वप्रियतमो भवेत् ॥२९॥

Verse

पुत्रपौत्रैः परिवृतः सर्वसिद्धिसमृद्धिमान् । निषेव्यभोगानन्तेऽपि कृष्णसायुज्यमाप्युनात् ॥३०॥

Verse

॥ इति श्रीब्रह्माण्डे महापुराणे वायुप्रोक्ते मध्यभागे तृतीय उपोद्घातपादे भार्गवचरिते षट्त्रिंशत्तमोऽध्यायान्तर्गत श्रीकृष्णाष्टोत्तरशतनामस्तोत्रं सम्पूर्णम् ॥

āñjaneyāṣṭottaraśatanāmastotram
lakṣmīnārāyaṇāṣṭottaraśatanāmastotram

Read next

More on कृष्णाष्टोत्तरशतनामस्तोत्रम्

  • श्रीकृष्णाष्टोत्तरशतनामस्तोत्रम्Ashtottaranama
  • श्रीकृष्णाष्टोत्तरशतनामस्तोत्रम्Ashtottaranama
  • श्रीकृष्णाष्टोत्तरशतनामस्तोत्रम्Ashtottaranama
  • कृकारादि श्रीकृष्णाष्टोत्तरशतनामस्तोत्रम्Ashtottaranama
  • श्रीकृष्णाष्टोत्तरशतनामस्तोत्रम्Ashtottaranama

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms