dohAvalI
gārī
गारी
Verse
सुंदर स्याम सुजानसिरोमनि, देउँ कहा कहि गारी हो । बड़े लोगके औगुन बरनत, सकुचि उठत मन भारी हो ॥१॥
Verse
को करि सकै पिताको निरनौ जाति-पाँति को जाने हो । जाके मन जैसीयै आवत तैसिय भाँति बखानै हो ॥२॥
Verse
माया कुटिल नटी तन चितवत कौन बड़ाई पाई हो । इहि चंचल सब जगत बिगोयो जहँ तहँ भई हँसाई हो ॥३॥
Verse
तुम पुनि प्रगट होइ बारे तें कौन भलाई कीनी हो । मुकुति-बधू उत्तम जन लायक लै अधमनिकों दीनी हो ॥४॥
Verse
बसि दस मास गरभ माताके इहि आसा करि जाये हो । सो घर छाँड़ि जीभके लालच भयो हो पूत पराये हो ॥५॥
Verse
बारेतें गोकुल गोपिनके सूने घर तुम डाटे हो । पैठे तहाँ निसंक रंक लौं दधिके भाजन चाटे हो ॥६॥
Verse
आपु कहाइ धनीको ढोटा भात कृपन लौं माँग्यो हो । मान भंग पर दूजैं जाचतु नैकु सँकोच न लाग्यो हो ॥७॥
Verse
लोलुप तातें गोपिनके तुम सूने भवन ढँढोरे हो । जमुना न्हात गोप-कन्यनिके निलज निपट पट चोरे हो ॥८॥
Verse
बैनु बजाइ बिलास करत बन बोलि पराई नारी हो । ते बातें मुनिराज सभामें ह्वै निसंक बिस्तारी हो ॥९॥
Verse
सब कोउ कहत नंदबाबाको घर भर्यो रतन अमोलै हो । गर गुंजा सिर मोर-पखौवा गायनके सँग डोलै हो ॥१०॥
Verse
साधु-सभामें बैठनिहारो कौन तियन सँग नाचै हो । अग्रज संग राज-मारगमें कुबजहिं देखत लाचै हो ॥११॥
Verse
अपनि सहोदरि आपुहि छल करि अरजुन संग नसाई हो । भोजन करि दासी-सुतके घर जादव जाति लजाई हो ॥१२॥
Verse
लै लै भजै नृपतिकी कन्या यह धौं कौन बड़ाई हो । सतभामा गोतमें बिबाही उलटी चाल चलाई हो ॥१३॥
Verse
बहिन पिताकी सास कहाई नैकहुँ लाज न आई हो । ऐसेइ भाँति बिधाता दीन्हीं सकल लोक ठकुराई हो ॥१४॥
Verse
मोहन बसीकरन चट चेटक मंत्र जंत्र सब जानै हो । तात भले जु भले सब तुमको भले भले करि मानै हो ॥१५॥
Verse
बरनौं कहा जथा मति मेरी बेदहु पार न पावै हो । भट्ट गदाधर प्रभुकी महिमा गावत ही उर आवै हो ॥१६॥
