dohAvalI
sāraṃga
सारंग
Verse
मुरकि मुरकि चितवनि चित चोरै । ठुमकि चलन हेरि दै बोलनि, पुलकनि नंदकिसोरै ॥
Verse
सहरावनि गैयान चौंकनी, थपकन कर बनमाली । गुहरावनि लै नाम सबनकौ धौरी धूमर आली ॥
Verse
चुचकारनि चट झपटि बिचुकनी, हूँ हूँ रहौ रँगीली । नियरावनि चोरवनि मगहीमें, झुकि बछियान छबीली ॥
Verse
फिरकैयाँ लै निरत अलापन, बिच-बिच तान रसीली । चितवनि ठिटुकि उढ़कि गैयासों, सीटी भरनि रसीली ॥
Verse
चाँपन अधर सैन दै चंचल, नैनन मेलि कटारी । जोरन कर हा हा करि मोहन, मुसकन ऐंड़ि बिहारी ॥
Verse
बाँह उठाय उचकि पग टेरनि, इतै कितै हौ स्यामा । निकसी नई आज तैं बनरिहु, मोरे ढिग अभिरामा ॥
Verse
हरुवे खोर साँकरी जुवतिन, कहत गुलाम तिहारौ । मिलियौ रैन मालती कुंजै तहँ पिक अरुन निहारौ ॥
Verse
काहू झटक चीर लकुटीतें, काहू पगै दबावै । काहू अंग परसि काहू तन, नैनन कोर नचावै ॥
Verse
उरझत पट नूपुरसों पाछे झुकि झुकि कै सुरझावै । ललितकिसोरी ललित लाड़िली दृग संकेत बतावै ॥
