dohAvalI
khamāca
खमाच
Verse
नैन चकोर, मुखचंदहूको बारि डारौं, बारि डारौं चित्तहिं मनमोहन चितचोरपै । प्रानहूकों बारि डारौं हँसन दसन लाल, हेरन कटिलता और लोचनकी कोरपै ॥
Verse
बारि डारौं मनहिं सुअंग अंग स्यामा स्याम, महल मिलाप रस रासकी झकोरपै । अतिहि सुघर बर सोहत त्रिभंगीलाल सरबस बारौं वा ग्रीवाकी मरोरपै ॥
Verse
अब तौ तेरिय हाथ बिकानी । मृदु बोलन मुसक्यान माधुरी, तन मन नैन समानी ॥
Verse
लोक-लाज, कुल कानि तजी सब, जामें तुव रुचि चीनी । धरम करम ब्रत नेम सबै सो, तोई रँग रस भीनी ॥
Verse
तुव कारन यह भेष बनायो प्रगट उघरि करि नाची । नाउँ कुनाउँ धरौ किन कोऊ हौं नाहिन मति काँची ॥
Verse
होनी होय सो होय भले ही, तनमन लगन लगी है । ललितकिसोरी लाल तिहारे, मति अनुराग पगी है ॥
