dohAvalI
sāraṃga
सारंग
Verse
बेषधारी हरिके उर सालैं । लोभी, दंभी, कपटी नट-से, सिस्त्रोदरको पालैं ॥१॥
Verse
गुरु भये घर घरमें डोलैं, नाम धनीको बेंचैं । परमारथ सपने नहिं जानैं पैसनहीको खैंचैं ॥२॥
Verse
कबहुँक बकता ह्वै बनि बैठे, कथा भागवत गावैं । अरथ अनरथ कछू नहिं भाषैं, पैसनहीकों धावैं ॥३॥
Verse
कबहुँक हरिमंदिरकों सेवैं, करैं निरंतर बासा । भाव भगतिकौ लेस न जानैं, पैसनहीकी आसा ॥४॥
Verse
नाचैं, गावैं, चित्र बनावैं, करैं काब्य चटकीली । साँच बिना हरि हाथ न आवै, सब रहनी है ढीली ॥५॥
Verse
बिनु बिबेक-बैरागय भगति बिनु सत्य न एकौ मानौ । भगवत बिमुख कपट चतुराई, सो पाखंडै जानौ ॥६॥
Verse
इतने गुन जामें सो संत । श्रीभागवत मध्य जस गावत, श्रीमुख कमलाकंत ॥
Verse
हरिकौ भजन साधुकी सेवा सर्वभूत पर दाया । हिंसा, लोभ, दंभ, छल त्यागै, बिषसम देखै माया ॥
Verse
सहनसील, आसय उदार अति, धीरजसहित बिबेकी । सत्य बचन सबसों सुखदायक, गहि अनन्य ब्रत एकी ॥
Verse
इंद्रीजित, अभिमान न जाके, करै जगतकों पावन । भगवतरसिक तासुकी संगति तीनहुँ ताप नसावन ॥
