dohAvalI
bhāga 9
भाग ९
Verse
श्रीरामजीके स्वरुपकी अलौकिकता सोरठा राम सरूप तुम्हार बचन अगोचर बुद्धिपर । अबिगत अकथ अपार नेति नेति नित निगम कह ॥
Verse
ईश्वर-महिमा दोहा माया जीव सुभाव गुन काल करम महदादि । ईस अंक तें बढ़त सब ईस अंक बिनु बादि ॥
Verse
श्रीरामजीकी भक्तवत्सलता हित उदास रघुबर बिरह बिकल सकल नर नारि । भरत लखन सिय गति समुझि प्रभु चख सदा सुबारि ॥
Verse
सीता,लक्ष्मण और भरतके रामप्रेमकी अलौकिकता सीय सुमित्रा सुवन गति भरत सनेह सुभाउ । कहिबे को सारद सरस जनिबे को रघुराउ ॥
Verse
जानि राम न कहि सके भरत लखन सिय प्रीति । सो सुनि गुनि तुलसी कहत हठ सठता की रीति ॥
Verse
सब बिधि समरथ सकल कह सहि साँसति दिन राति । भलो निबाहेउ सुनि समुझि स्वामिधर्म सब भाँति ॥
Verse
भरत-महिमा भरतहि होइ न राजमदु बिधि हरिहर पद पाइ । कबहुँ कि काँजी सीकरनि छीरसिंधु बिनसाइ ॥
Verse
संपति चकई भरत चक मुनि आयस खेलवार । तेहि निसि आश्रम पिंजराँ राखे भा भिनुसार ॥
Verse
सधन चोर मग मुदित मन धनी गही ज्यों फेंट । त्यों सुग्रीव बिभीषनहिं भई भरतकी भेंट ॥
Verse
राम सराहे भरत उठि मिले राम सम जानि । तदपि बिभीषन कीसपति तुलसी गरत गलानि ॥
Verse
भरत स्याम तन राम सम सब गुन रूप निधान । सेवक सुखदायक सुलभ सुमिरत सब कल्यान ॥
Verse
लक्ष्मणमहिमा ललित लखन मूरति मधुर सुमिरहु सहित सनेह । सुख संपति कीरति बिजय सगुन सुमंगल गेह ॥
Verse
शत्रुघ्नमहिमा नाम सत्रुसूदन सुभग सुषमा सील निकेत । सेवत सुमिरत सुलभ सुख सकल सुमंगल देत ॥
Verse
कौसल्यामहिमा कौसल्या कल्यानमइ मूरति करत प्रनाम । सगुन सुमंगल काज सुभ कृपा करहिं सियाराम ॥
Verse
सुमित्रामहिमा सुमिरि सुमित्रा नाम जग जे तिय लेहिं सनेम । सुअन लखन रिपुदवन से पावहिं पति पद प्रेम ॥
Verse
सीतामहिमा सीताचरन प्रनाम करि सुमिरि सुनाम सुनेम । होहिं तीय पतिदेवता प्राननाथ प्रिय प्रेम ॥
