stotrasangraha
sarasvatī-sahasranāma-stotram
सरस्वती-सहस्रनाम-स्तोत्रम्
Verse
श्रीमच्चन्दनचर्चितोज्ज्वलवपुः शुक्लाम्बरा मल्लिका- मालालालित-कुन्तला प्रविलसन्मुक्तावलीशोभना । सर्वज्ञाननिधानपुस्तकधरा रुद्राक्षमालाङ्किता वाग्देवी वदनाम्बुजे वसतु मे त्रैलोक्यमाता शुभा ॥
Verse
भगवन् परमेशान सर्वलोकैकनायक । कथं सरस्वती साक्षात् प्रसन्ना परमेष्ठिनः ॥१॥
Verse
कथं देव्या महावाण्याः सतत् प्राप सुदुर्लभम् । एतन्मे वद तत्त्वेन महायोगीश्वरप्रभो ॥२॥
Verse
साधु पृष्टं त्वया ब्रह्मन् गुह्याद्गुह्यमनुत्तमम् । भयानुगोपितं यत्नादिदानीं सत्प्रकाश्यते ॥३॥
Verse
पुरा पितामहं दृष्ट्वा जगत् स्थावरजङ्गमम् । निर्विकारं निराभासं स्तम्भीभूतमचेतसम् ॥४॥
Verse
सृष्ट्वा त्रैलोक्यमखिलं वागभावात्तथाविधम् । आधिक्याभावतः स्वस्य परमेष्ठी जगद्गुरुः ॥५॥
Verse
दिव्यवर्षायुतं तेन तपो दुष्करमुत्तमम् । ततः कदाचित् सञ्जाता वाणी सर्वार्थशोभिता ॥६॥
Verse
अहमस्मि महाविद्या सर्ववाचामधीश्वरी । मम नाम्नां सहस्रं तु उपदेक्ष्याम्यनुत्तमम् ॥७॥
Verse
अनेन संस्तुता नित्यं पत्नी तव भवाम्यहम् । त्वया सृष्टं जगत् सर्वं वाणीयुक्तं भविष्यति ॥८॥
Verse
इदं रहस्यं परमं मम नामसहस्रकम् । सर्वपापौघशमनं महासारस्वतप्रदम् ॥९॥
Verse
महाकवित्वदं लोके वागीशत्वप्रदायकम् । त्वं वा परः पुमान्यस्तु स्तवेनानेन तोषयेत् ॥१०॥
Verse
तस्याहं किङ्करी साक्षाद् भविष्यामि न संशयः । इत्युक्त्वाऽन्तर्दधे वाणी तदारभ्य पितामहः ॥११॥
Verse
स्तुत्वा स्तोत्रेण दिव्येन तत्पतित्वमवाप्तवान् । वाणीयुक्तं जगत् सर्वं तदारभ्याभवन्मुने ॥१२॥
Verse
तत् तेहं सम्प्रवक्ष्यामि शृणु यत्नेन नारद । सावधानमना भूत्वा क्षणं शुद्धो मुनीश्वरः ॥१३॥
Verse
वाग्वाणी वरदा वन्द्या वरारोहा वरप्रदा । वृत्तिर्वागीश्वरी वार्ता वरा वागीशवल्लभा ॥१॥
Verse
विश्वेश्वरी विश्ववन्द्या विश्वेशप्रियकारिणी । वाग्वादिनी च वाग्देवी वृद्धिदा वृद्धिकारिणी ॥२॥
Verse
वृद्धिर्वृद्धा विषघ्नी च वृष्टिर्वृष्टिप्रदायिनी । विश्वाराध्या विश्वमाता विश्वधात्री विनायका ॥३॥
Verse
विश्वशक्तिर्विश्वसारा विश्वा विश्वविभावरी । वेदान्तवेदिनी वेद्या वित्ता वेदत्रयात्मिका ॥४॥
Verse
वेदज्ञा वेदजननी विश्वा विश्वविभावरी । वरेण्या वाङ्मयी वृद्धा विशिष्टप्रियकारिणी ॥५॥
Verse
विश्वतोवदना व्याप्ता व्यापिनी व्यापकात्मिका । व्यालघ्नी व्यालभूषाङ्गी विरजा वेदनायिका ॥६॥
Verse
वेदवेदान्तसंवेद्या वेदान्तज्ञानरूपिणी । विभावरी च विक्रान्ता विश्वामित्रा विधिप्रिया ॥७॥
Verse
वरिष्ठा विप्रकृष्टा च विप्रवर्यप्रपूजिता । वेदरूपा वेदमयी वेदमूर्तिश्च वल्लभा ॥८॥
Verse
गौरी गुणवती गोप्या गन्धर्वनगरप्रिया । गुणमाता गुहान्तस्था गुरुरूपा गुरुप्रिया ॥९॥
Verse
गिरिविद्या गानतुष्टा गायकप्रियकारिणी । गायत्री गिरिशाराध्या गीर्गिरीशप्रियङ्करी ॥१०॥
Verse
गिरिज्ञा ज्ञानविद्या च गिरिरूपा गिरीश्वरी । गीर्माता गणसंस्तुत्या गणनीयगुणान्विता ॥११॥
Verse
गूढरूपा गुहा गोप्या गोरूपा गौर्गुणात्मिका । गुर्वी गुर्वम्बिका गुह्या गेयजा ग्रहनाशिनी ॥१२॥
Verse
गृहिणी गृहदोषघ्नी गवघ्नी गुरुवत्सला । गृहात्मिका गृहाराध्या गृहबाधाविनाशिनी ॥१३॥
Verse
गङ्गा गिरिसुता गम्या गजयाना गुहस्तुता । गरुडासनसंसेव्या गोमती गुणशालिनी ॥१४॥
Verse
शारदा शाश्वती शैवी शाङ्करी शङ्करात्मिका । श्रीः शर्वाणी शतघ्नी च शरच्चन्द्रनिभानना ॥१५॥
Verse
शर्मिष्ठा शमनघ्नी च शतसाहस्ररूपिणी । शिवा शम्भुप्रिया श्रद्धा श्रुतिरूपा श्रुतिप्रिया ॥१६॥
Verse
शुचिष्मती शर्मकरी शुद्धिदा शुद्धिरूपिणी । शिवा शिवङ्करी शुद्धा शिवाराध्या शिवात्मिका ॥१७॥
Verse
श्रीमती श्रीमयी श्राव्या श्रुतिः श्रवणगोचरा । शान्तिः शान्तिकरी शान्ता शान्ताचारप्रियङ्करी ॥१८॥
Verse
शीललभ्या शीलवती श्रीमाता शुभकारिणी । शुभवाणी शुद्धविद्या शुद्धचित्तप्रपूजिता ॥१९॥
Verse
श्रीकरी श्रुतपापघ्नी शुभाक्षी शुचिवल्लभा । शिवेतरघ्नी शबरी श्रवणीयगुणान्विता ॥२०॥
Verse
शारी शिरीषपुष्पाभा शमनिष्ठा शमात्मिका । शमान्विता शमाराध्या शितिकण्ठप्रपूजिता ॥२१॥
Verse
शुद्धिः शुद्धिकरी श्रेष्ठा श्रुतानन्ता शुभावहा । सरस्वती च सर्वज्ञा सर्वसिद्धिप्रदायिनी ॥२२॥
Verse
सरस्वती च सावित्री सन्ध्या सर्वेप्सितप्रदा । सर्वार्तिघ्नी सर्वमयी सर्वविद्याप्रदायिनी ॥२३॥
Verse
सर्वेश्वरी सर्वपुण्या सर्गस्थित्यन्तकारिणी । सर्वाराध्या सर्वमाता सर्वदेवनिषेविता ॥२४॥
Verse
सर्वैश्वर्यप्रदा सत्या सती सत्वगुणाश्रया । स्वरक्रमपदाकारा सर्वदोषनिषूदिनी ॥२५॥
Verse
सहस्राक्षी सहस्रास्या सहस्रपदसंयुता । सहस्रहस्ता साहस्रगुणालङ्कृतविग्रहा ॥२६॥
Verse
सहस्रशीर्षा सद्रूपा स्वधा स्वाहा सुधामयी । षड्ग्रन्थिभेदिनी सेव्या सर्वलोकैकपूजिता ॥२७॥
Verse
स्तुत्या स्तुतिमयी साध्या सवितृप्रियकारिणी । संशयच्छेदिनी साङ्ख्यवेद्या सङ्ख्या सदीश्वरी ॥२८॥
Verse
सिद्धिदा सिद्धसम्पूज्या सर्वसिद्धिप्रदायिनी । सर्वज्ञा सर्वशक्तिश्च सर्वसम्पत्प्रदायिनी ॥२९॥
Verse
सर्वाशुभघ्नी सुखदा सुखा संवित्स्वरूपिणी । सर्वसम्भीषणी सर्वजगत्सम्मोहिनी तथा ॥३०॥
Verse
सर्वप्रियङ्करी सर्वशुभदा सर्वमङ्गला । सर्वमन्त्रमयी सर्वतीर्थपुण्यफलप्रदा ॥३१॥
Verse
सर्वपुण्यमयी सर्वव्याधिघ्नी सर्वकामदा । सर्वविघ्नहरी सर्ववन्दिता सर्वमङ्गला ॥३२॥
Verse
सर्वमन्त्रकरी सर्वलक्ष्मीः सर्वगुणान्विता । सर्वानन्दमयी सर्वज्ञानदा सत्यनायिका ॥३३॥
Verse
सर्वज्ञानमयी सर्वराज्यदा सर्वमुक्तिदा । सुप्रभा सर्वदा सर्वा सर्वलोकवशङ्करी ॥३४॥
Verse
सुभगा सुन्दरी सिद्धा सिद्धाम्बा सिद्धमातृका । सिद्धमाता सिद्धविद्या सिद्धेशी सिद्धरूपिणी ॥३५॥
Verse
सुरूपिणी सुखमयी सेवकप्रियकारिणी । स्वामिनी सर्वदा सेव्या स्थूलसूक्ष्मापराम्बिका ॥३६॥
Verse
साररूपा सरोरूपा सत्यभूता समाश्रया । सितासिता सरोजाक्षी सरोजासनवल्लभा ॥३७॥
Verse
सरोरुहाभा सर्वाङ्गी सुरेन्द्रादिप्रपूजिता । महादेवी महेशानी महासारस्वतप्रदा ॥३८॥
Verse
महासरस्वती मुक्ता मुक्तिदा मलनाशिनी । महेश्वरी महानन्दा महामन्त्रमयी मही ॥३९॥
Verse
महालक्ष्मीर्महाविद्या माता मन्दरवासिनी । मन्त्रगम्या मन्त्रमाता महामन्त्रफलप्रदा ॥४०॥
Verse
महामुक्तिर्महानित्या महासिद्धिप्रदायिनी । महासिद्धा महामाता महदाकारसंयुता ॥४१॥
Verse
महा महेश्वरी मूर्तिर्मोक्षदा मणिभूषणा । मेनका मानिनी मान्या मृत्युघ्नी मेरुरूपिणी ॥४२॥
Verse
मदिराक्षी मदावासा मखरूपा मखेश्वरी । महामोहा महामाया मातॄणां मूर्ध्निसंस्थिता ॥४३॥
Verse
महापुण्या मुदावासा महासम्पत्प्रदायिनी । मणिपूरैकनिलया मधुरूपा महोत्कटा ॥४४॥
Verse
महासूक्ष्मा महाशान्ता महाशान्तिप्रदायिनी । मुनिस्तुता मोहहन्त्री माधवी माधवप्रिया ॥४५॥
Verse
मा महादेवसंस्तुत्या महिषीगणपूजिता । मृष्टान्नदा च माहेन्द्री महेन्द्रपददायिनी ॥४६॥
Verse
मतिर्मतिप्रदा मेधा मर्त्यलोकनिवासिनी । मुख्या महानिवासा च महाभाग्यजनाश्रिता ॥४७॥
Verse
महिला महिमा मृत्युहारी मेधाप्रदायिनी । मेध्या महावेगवती महामोक्षफलप्रदा ॥४८॥
Verse
महाप्रभाभा महती महादेवप्रियङ्करी । महापोषा महर्द्धिश्च मुक्ताहारविभूषणा ॥४९॥
Verse
माणिक्यभूषणा मन्त्रा मुख्यचन्द्रार्धशेखरा । मनोरूपा मनःशुद्धिर्मनःशुद्धिप्रदायिनी ॥५०॥
Verse
महाकारुण्यसम्पूर्णा मनोनमनवन्दिता । महापातकजालघ्नी मुक्तिदा मुक्तभूषणा ॥५१॥
Verse
मनोन्मनी महास्थूला महाक्रतुफलप्रदा । महापुण्यफलप्राप्या मायात्रिपुरनाशिनी ॥५२॥
Verse
महानसा महामेधा महामोदा महेश्वरी । मालाधरी महोपाया महातीर्थफलप्रदा ॥५३॥
Verse
महामङ्गलसम्पूर्णा महादारिद्र्यनाशिनी । महामखा महामेघा महाकाली महाप्रिया ॥५४॥
Verse
महाभूषा महादेहा महाराज्ञी मुदालया । भूरिदा भाग्यदा भोग्या भोग्यदा भोगदायिनी ॥५५॥
Verse
भवानी भूतिदा भूतिर्भूमिर्भूमिसुनायिका । भूतधात्री भयहरी भक्तसारस्वतप्रदा ॥५६॥
Verse
भुक्तिर्भुक्तिप्रदा भेकी भक्तिर्भक्तिप्रदायिनी । भक्तसायुज्यदा भक्तस्वर्गदा भक्तराज्यदा ॥५७॥
Verse
भागीरथी भवाराध्या भाग्यासज्जनपूजिता । भवस्तुत्या भानुमती भवसागरतारणी ॥५८॥
Verse
भूतिर्भूषा च भूतेशी भाललोचनपूजिता । भूता भव्या भविष्या च भवविद्या भवात्मिका ॥५९॥
Verse
बाधापहारिणी बन्धुरूपा भुवनपूजिता । भवघ्नी भक्तिलभ्या च भक्तरक्षणतत्परा ॥६०॥
Verse
भक्तार्तिशमनी भाग्या भोगदानकृतोद्यमा । भुजङ्गभूषणा भीमा भीमाक्षी भीमरूपिणी ॥६१॥
Verse
भाविनी भ्रातृरूपा च भारती भवनायिका । भाषा भाषावती भीष्मा भैरवी भैरवप्रिया ॥६२॥
Verse
भूतिर्भासितसर्वाङ्गी भूतिदा भूतिनायिका । भास्वती भगमाला च भिक्षादानकृतोद्यमा ॥६३॥
Verse
भिक्षुरूपा भक्तिकरी भक्तलक्ष्मीप्रदायिनी । भ्रान्तिघ्ना भ्रान्तिरूपा च भूतिदा भूतिकारिणी ॥६४॥
Verse
भिक्षणीया भिक्षुमाता भाग्यवद्दृष्टिगोचरा । भोगवती भोगरूपा भोगमोक्षफलप्रदा ॥६५॥
Verse
भोगश्रान्ता भाग्यवती भक्ताघौघविनाशिनी । ब्राह्मी ब्रह्मस्वरूपा च बृहती ब्रह्मवल्लभा ॥६६॥
Verse
ब्रह्मदा ब्रह्ममाता च ब्रह्माणी ब्रह्मदायिनी । ब्रह्मेशी ब्रह्मसंस्तुत्या ब्रह्मवेद्या बुधप्रिया ॥६७॥
Verse
बालेन्दुशेखरा बाला बलिपूजाकरप्रिया । बलदा बिन्दुरूपा च बालसूर्यसमप्रभा ॥६८॥
Verse
ब्रह्मरूपा ब्रह्ममयी ब्रध्नमण्डलमध्यगा । ब्रह्माणी बुद्धिदा बुद्धिर्बुद्धिरूपा बुधेश्वरी ॥६९॥
Verse
बन्धक्षयकरी बाधनाशनी बन्धुरूपिणी । बिन्द्वालया बिन्दुभूषा बिन्दुनादसमन्विता ॥७०॥
Verse
बीजरूपा बीजमाता ब्रह्मण्या ब्रह्मकारिणी । बहुरूपा बलवती ब्रह्मजा ब्रह्मचारिणी ॥७१॥
Verse
ब्रह्मस्तुत्या ब्रह्मविद्या ब्रह्माण्डाधिपवल्लभा । ब्रह्मेशविष्णुरूपा च ब्रह्मविष्ण्वीशसंस्थिता ॥७२॥
Verse
बुद्धिरूपा बुधेशानी बन्धी बन्धविमोचनी । अक्षमालाऽक्षराकाराऽक्षराऽक्षरफलप्रदा ॥७३॥
Verse
अनन्ताऽऽनन्दसुखदाऽनन्तचन्द्रनिभानना । अनन्तमहिमाऽघोराऽनन्तगम्भीरसम्मिता ॥७४॥
Verse
अदृष्टाऽदृष्टदाऽनन्ताऽदृष्टभाग्यफलप्रदा । अरुन्धत्यव्ययीनाथाऽनेकसद्गुणसंयुता ॥७५॥
Verse
अनेकभूषणाऽदृश्याऽनेकलेखनिषेविता । अनन्ताऽनन्तसुखदाऽघोराऽघोरस्वरूपिणी ॥७६॥
Verse
अशेषदेवतारूपाऽमृतरूपाऽमृतेश्वरी । अनवद्याऽनेकहस्ताऽनेकमाणिक्यभूषणा ॥७७॥
Verse
अनेकविघ्नसंहर्त्री ह्यनेकाभरणान्विता । अविद्याऽज्ञानसंहर्त्री ह्यविद्याजालनाशिनी ॥७८॥
Verse
अभिरूपाऽनवद्याङ्गी ह्यप्रतर्क्यगतिप्रदा । अकलङ्कारूपिणी च ह्यनुग्रहपरायणा ॥७९॥
Verse
अम्बरस्थाऽम्बरमयाऽम्बरमालाऽम्बुजेक्षणा । अम्बिकाऽब्जकराऽब्जस्थांऽशुमत्यंशुशतान्विता ॥८०॥
Verse
अम्बुजाऽनवराऽखण्डाऽम्बुजासनमहाप्रिया । अजरामरसंसेव्याऽजरसेवितपद्युगा ॥८१॥
Verse
अतुलार्थप्रदाऽर्थैक्याऽत्युदारा त्वभयान्विता । अनाथवत्सलाऽनन्तप्रियाऽनन्तेप्सितप्रदा ॥८२॥
Verse
अम्बुजाक्ष्यम्बुरूपाऽम्बुजातोद्भवमहाप्रिया । अखण्डा त्वमरस्तुत्याऽमरनायकपूजिता ॥८३॥
Verse
अजेया त्वजसङ्काशाऽज्ञाननाशिन्यभीष्टदा । अक्ताऽघनेना चास्त्रेशी ह्यलक्ष्मीनाशिनी तथा ॥८४॥
Verse
अनन्तसाराऽनन्तश्रीरनन्तविधिपूजिता । अभीष्टाऽमर्त्यसम्पूज्या ह्यस्तोदयविवर्जिता ॥८५॥
Verse
आस्तिकस्वान्तनिलयाऽस्त्ररूपाऽस्त्रवती तथा । अस्खलत्यस्खलद्रूपाऽस्खलद्विद्याप्रदायिनी ॥८६॥
Verse
अस्खलत् सिद्धिदाऽऽनन्दाऽम्बुजाताऽमरनायिका । अमेयाऽशेषपापघ्न्यक्षयसारस्वतप्रदा ॥८७॥
Verse
जया जयन्ती जयदा जन्मकर्मविवर्जिता । जगत्प्रिया जगन्माता जगदीश्वरवल्लभा ॥८८॥
Verse
जातिर्जया जितामित्रा जप्या जपनकारिणी । जीवनी जीवनिलया जीवाख्या जीवधारिणी ॥८९॥
Verse
जाह्नवी ज्या जपवती जातिरूपा जयप्रदा । जनार्दनप्रियकरी जोषनीया जगत्स्थिता ॥९०॥
Verse
जगज्ज्येष्ठा जगन्माया जीवनत्राणकारिणी । जीवातुलतिका जीवजन्मी जन्मनिबर्हणी ॥९१॥
Verse
जाड्यविध्वंसनकरी जगद्योनिर्जयात्मिका । जगदानन्दजननी जम्बूश्च जलजेक्षणा ॥९२॥
Verse
जयन्ती जङ्गपूगघ्नी जनितज्ञानविग्रहा । जटा जटावती जप्या जपकर्तृप्रियङ्करी ॥९३॥
Verse
जपकृत्पापसंहर्त्री जपकृत्फलदायिनी । जपापुष्पसमप्रख्या जपाकुसुमधारिणी ॥९४॥
Verse
जननी जन्मरहिता ज्योतिर्वृत्यभिदायिनी । जटाजूटनचन्द्रार्धा जगत्सृष्टिकरी तथा ॥९५॥
Verse
जगत्त्राणकरी जाड्यध्वंसकर्त्री जयेश्वरी । जगद्बीजा जयावासा जन्मभूर्जन्मनाशिनी ॥९६॥
Verse
जन्मान्त्यरहिता जैत्री जगद्योनिर्जपात्मिका । जयलक्षणसम्पूर्णा जयदानकृतोद्यमा ॥९७॥
Verse
जम्भराद्यादिसंस्तुत्या जम्भारिफलदायिनी । जगत्त्रयहिता ज्येष्ठा जगत्त्रयवशङ्करी ॥९८॥
Verse
जगत्त्रयाम्बा जगती ज्वाला ज्वालितलोचना । ज्वालिनी ज्वलनाभासा ज्वलन्ती ज्वलनात्मिका ॥९९॥
Verse
जितारातिसुरस्तुत्या जितक्रोधा जितेन्द्रिया । जरामरणशून्या च जनित्री जन्मनाशिनी ॥१००॥
Verse
जलजाभा जलमयी जलजासनवल्लभा । जलजस्था जपाराध्या जनमङ्गलकारिणी ॥१०१॥
Verse
कामिनी कामरूपा च काम्या कामप्रदायिनी । कमाली कामदा कर्त्री क्रतुकर्मफलप्रदा ॥१०२॥
Verse
कृतघ्नघ्नी क्रियारूपा कार्यकारणरूपिणी । कञ्जाक्षी करुणारूपा केवलामरसेविता ॥१०३॥
Verse
कल्याणकारिणी कान्ता कान्तिदा कान्तिरूपिणी । कमला कमलावासा कमलोत्पलमालिनी ॥१०४॥
Verse
कुमुद्वती च कल्याणी कान्तिः कामेशवल्लभा । कामेश्वरी कमलिनी कामदा कामबन्धिनी ॥१०५॥
Verse
कामधेनुः काञ्चनाक्षी काञ्चनाभा कलानिधिः । क्रिया कीर्तिकरी कीर्तिः क्रतुश्रेष्ठा कृतेश्वरी ॥१०६॥
Verse
क्रतुसर्वक्रियास्तुत्या क्रतुकृत्प्रियकारिणी । क्लेशनाशकरी कर्त्री कर्मदा कर्मबन्धिनी ॥१०७॥
Verse
कर्मबन्धहरी कृष्टा क्लमघ्नी कञ्जलोचना । कन्दर्पजननी कान्ता करुणा करुणावती ॥१०८॥
Verse
क्लीङ्कारिणी कृपाकारा कृपासिन्धुः कृपावती । करुणार्द्रा कीर्तिकरी कल्मषघ्नी क्रियाकरी ॥१०९॥
Verse
क्रियाशक्तिः कामरूपा कमलोत्पलगन्धिनी । कला कलावती कूर्मी कूटस्था कञ्जसंस्थिता ॥११०॥
Verse
कालिका कल्मषघ्नी च कमनीयजटान्विता । करपद्मा कराभीष्टप्रदा क्रतुफलप्रदा ॥१११॥
Verse
कौशिकी कोशदा काव्या कर्त्री कोशेश्वरी कृशा । कूर्मयाना कल्पलता कालकूटविनाशिनी ॥११२॥
Verse
कल्पोद्यानवती कल्पवनस्था कल्पकारिणी । कदम्बकुसुमाभासा कदम्बकुसुमप्रिया ॥११३॥
Verse
कदम्बोद्यानमध्यस्था कीर्तिदा कीर्तिभूषणा । कुलमाता कुलावासा कुलाचारप्रियङ्करी ॥११४॥
Verse
कुलानाथा कामकला कलानाथा कलेश्वरी । कुन्दमन्दारपुष्पाभा कपर्दस्थितचन्द्रिका ॥११५॥
Verse
कवित्वदा काव्यमाता कविमाता कलाप्रदा । तरुणी तरुणीताता ताराधिपसमानना ॥११६॥
Verse
तृप्तिस्तृप्तिप्रदा तर्क्या तपनी तापिनी तथा । तर्पणी तीर्थरूपा च त्रिदशा त्रिदशेश्वरी ॥११७॥
Verse
त्रिदिवेशी त्रिजननी त्रिमाता त्र्यम्बकेश्वरी । त्रिपुरा त्रिपुरेशानी त्र्यम्बका त्रिपुराम्बिका ॥११८॥
Verse
त्रिपुरश्रीस्त्रयीरूपा त्रयीवेद्या त्रयीश्वरी । त्रय्यन्तवेदिनी ताम्रा तापत्रितयहारिणी ॥११९॥
Verse
तमालसदृशी त्राता तरुणादित्यसन्निभा । त्रैलोक्यव्यापिनी तृप्ता तृप्तिकृत् तत्त्वरूपिणी ॥१२०॥
Verse
तुर्या त्रैलोक्यसंस्तुत्या त्रिगुणा त्रिगुणेश्वरी । त्रिपुरघ्नी त्रिमाता च त्र्यम्बका त्रिगुणान्विता ॥१२१॥
Verse
तृष्णाच्छेदकरी तृप्ता तीक्ष्णा तीक्ष्णस्वरूपिणी । तुला तुलादिरहिता तत्तद् ब्रह्मस्वरूपिणी ॥१२२॥
Verse
त्राणकर्त्री त्रिपापघ्नी त्रिपदा त्रिदशान्विता । तथ्या त्रिशक्तिस्त्रिपदा तुर्या त्रैलोक्यसुन्दरी ॥१२३॥
Verse
तेजस्करी त्रिमूर्त्याद्या तेजोरूपा त्रिधामता । त्रिचक्रकर्त्री त्रिभगा तुर्यातीतफलप्रदा ॥१२४॥
Verse
तेजस्विनी तापहारी तापोपप्लवनाशिनी । तेजोगर्भा तपःसारा त्रिपुरारिप्रियङ्करी ॥१२५॥
Verse
तन्वी तापससन्तुष्टा तपताङ्गजभीतिनुत् । त्रिलोचना त्रिमार्गा च तृतीया त्रिदशस्तुता ॥१२६॥
Verse
त्रिसुन्दरी त्रिपथगा तुरीयपददायिनी । शुभा शुभावती शान्ता शान्तिदा शुभदायिनी ॥१२७॥
Verse
शीतला शूलिनी शीता श्रीमती च शुभान्विता । योगसिद्धिप्रदा योग्या यज्ञेनपरिपूरिता ॥१२८॥
Verse
यज्या यज्ञमयी यक्षी यक्षिणी यक्षिवल्लभा । यज्ञप्रिया यज्ञपूज्या यज्ञतुष्टा यमस्तुता ॥१२९॥
Verse
यामिनीयप्रभा याम्या यजनीया यशस्करी । यज्ञकर्त्री यज्ञरूपा यशोदा यज्ञसंस्तुता ॥१३०॥
Verse
यज्ञेशी यज्ञफलदा योगयोनिर्यजुस्तुता । यमिसेव्या यमाराध्या यमिपूज्या यमीश्वरी ॥१३१॥
Verse
योगिनी योगरूपा च योगकर्तृप्रियङ्करी । योगयुक्ता योगमयी योगयोगीश्वराम्बिका ॥१३२॥
Verse
योगज्ञानमयी योनिर्यमाद्यष्टाङ्गयोगता । यन्त्रिताघौघसंहारा यमलोकनिवारिणी ॥१३३॥
Verse
यष्टिव्यष्टीशसंस्तुत्या यमाद्यष्टाङ्गयोगयुक् । योगीश्वरी योगमाता योगसिद्धा च योगदा ॥१३४॥
Verse
योगारूढा योगमयी योगरूपा यवीयसी । यन्त्ररूपा च यन्त्रस्था यन्त्रपूज्या च यन्त्रिता ॥१३५॥
Verse
युगकर्त्री युगमयी युगधर्मविवर्जिता । यमुना यमिनी याम्या यमुनाजलमध्यगा ॥१३६॥
Verse
यातायातप्रशमनी यातनानान्निकृन्तनी । योगावासा योगिवन्द्या यत्तच्छब्दस्वरूपिणी ॥१३७॥
Verse
योगक्षेममयी यन्त्रा यावदक्षरमातृका । यावत्पदमयी यावच्छब्दरूपा यथेश्वरी ॥१३८॥
Verse
यत्तदीया यक्षवन्द्या यद्विद्या यतिसंस्तुता । यावद्विद्यामयी यावद्विद्याबृन्दसुवन्दिता ॥१३९॥
Verse
योगिहृत्पद्मनिलया योगिवर्यप्रियङ्करी । योगिवन्द्या योगिमाता योगीशफलदायिनी ॥१४०॥
Verse
यक्षवन्द्या यक्षपूज्या यक्षराजसुपूजिता । यज्ञरूपा यज्ञतुष्टा यायजूकस्वरूपिणी ॥१४१॥
Verse
यन्त्राराध्या यन्त्रमध्या यन्त्रकर्तृप्रियङ्करी । यन्त्रारूढा यन्त्रपूज्या योगिध्यानपरायणा ॥१४२॥
Verse
यजनीया यमस्तुत्या योगयुक्ता यशस्करी । योगबद्धा यतिस्तुत्या योगज्ञा योगनायकी ॥१४३॥
Verse
योगिज्ञानप्रदा यक्षी यमबाधाविनाशिनी । योगिकाम्यप्रदात्री च योगिमोक्षप्रदायिनी ॥१४४॥
Verse
इति नाम्नां सरस्वत्याः सहस्रं समुदीरितम् । मन्त्रात्मकं महागोप्यं महासारस्वतप्रदम् ॥१॥
Verse
यः पठेच्छृणुयाद् भक्त्या त्रिकालं साधकः पुमान् । सर्वविद्यानिधिः साक्षात् स एव भवति ध्रुवम् ॥२॥
Verse
लभते सम्पदः सर्वाः पुत्रपौत्रादिसंयुताः । मूकोऽपि सर्वविद्यासु चतुर्मुख इवापरः ॥३॥
Verse
भूत्वा प्राप्नोति सान्निध्यम् अन्ते धातुर्मुनीश्वर । सर्वमन्त्रमयं सर्वविद्यामानफलप्रदम् ॥४॥
Verse
महाकवित्वदं पुंसां महासिद्धिप्रदायकम् । कस्मैचिन्न प्रदातव्यं प्राणैः कण्ठगतैरपि ॥५॥
Verse
महारहस्यं सततं वाणीनामसहस्रकम् । सुसिद्धमस्मदादीनां स्तोत्रं ते समुदीरितम् ॥६॥
Verse
॥इति श्रीस्कान्दपुराणान्तर्गत-सनत्कुमार-संहितायां नारद-सनत्कुमार-संवादे सरस्वती-सहस्रनाम-स्तोत्रं सम्पूर्णम्॥
