Preparing Your Space .

Settling the page into your current context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

stotrasangraha

kāmākṣī-stotram

कामाक्षी-स्तोत्रम्

Verse

कल्पानोकह-पुष्प-जाल-विलसन्-नीलालकां मातृकां कान्तां कञ्ज-दलेक्षणां कलि-मल-प्रध्वंसिनीं कालिकाम् । काञ्ची-नूपुर-हार-दाम-सुभगां काञ्ची-पुरी-नायिकां कामाक्षीं करि-कुम्भ-सन्निभ-कुचां वन्दे महेशप्रियाम् ॥१॥

Verse

काशाभांशुक-भासुरां प्रविलसत्-कोशातकी-सन्निभां चन्द्रार्कानल-लोचनां सुरुचिरालङ्कार-भूषोज्ज्वलाम् । ब्रह्म-श्रीपति-वासवादि-मुनिभिः संसेविताङ्घ्रि-द्वयां कामाक्षीं गज-राज-मन्द-गमनां वन्दे महेशप्रियाम् ॥२॥

Verse

ऐं क्लीं सौर्-इति यां वदन्ति मुनयस्तत्त्वार्थ-रूपां परां वाचाम् आदिम-कारणं हृदि सदा ध्यायन्ति यां योगिनः । बालां फाल-विलोचनां नव-जपा-वर्णां सुषुम्नाश्रितां कामाक्षीं कलितावतंस-सुभगां वन्दे महेशप्रियाम् ॥३॥

Verse

यत्पादाम्बुज-रेणु-लेशम् अनिशं लब्ध्वा विधत्ते विधिर्- विश्वं तत् परिपाति विष्णुरखिलं यस्याः प्रसादाच्चिरम् । रुद्रः संहरति क्षणात् तदखिलं यन्मायया मोहितः कामाक्षीम् अति-चित्र-चारु-चरितां वन्दे महेशप्रियाम् ॥४॥

Verse

सूक्ष्मात् सूक्ष्म-तरां सुलक्षित-तनुं क्षान्ताक्षरैर्लक्षितां वीक्षा-शिक्षित-राक्षसां त्रिभुवन-क्षेमङ्करीम् अक्षयाम् । साक्षाल्लक्षण-लक्षिताक्षर-मयीं दाक्षायणीं साक्षिणीं कामाक्षीं शुभलक्षणैः सुललितां वन्दे महेशप्रियाम् ॥५॥

Verse

ओङ्काराङ्गण-दीपिकाम् उपनिषत्-प्रासाद-पारावतीम् आम्नायाम्बुधि-चन्द्रिकाम् अघ-तमः-प्रध्वंस-हंस-प्रभाम् । काञ्ची-पट्टण-पञ्जरान्तर-शुकीं कारुण्य-कल्लोलिनीं कामाक्षीं शिव-कामराज-महिषीं वन्दे महेशप्रियाम् ॥६॥

Verse

ह्रीङ्कारात्मक-वर्ण-मात्र-पठनादैन्द्रीं श्रियं तन्वतीं चिन्मात्रां भुवनेश्वरीम् अनुदिनं भिक्षा-प्रदान-क्षमाम् । विश्वाघौघ-निवारिणीं विमलिनीं विश्वम्भरां मातृकां कामाक्षीं परिपूर्ण-चन्द्र-वदनां वन्दे महेशप्रियाम् ॥७॥

Verse

वाग्-देवीति च यां वदन्ति मुनयः क्षीराब्धि-कन्येति च क्षोणी-भृत्-तनयेति च श्रुति-गिरो याम् आमनन्ति स्फुटम् । एकानेक-फल-प्रदां बहु-विधाऽऽकारास्तनूस्तन्वतीं कामाक्षीं सकलार्ति-भञ्जन-परां वन्दे महेशप्रियाम् ॥८॥

Verse

मायाम् आदिम-कारणं त्रिजगताम् आराधिताङ्घ्रि-द्वयाम् आनन्दामृत-वारि-राशि-निलयां विद्यां विपश्चिद्धियाम् । माया-मानुष-रूपिणीं मणि-लसन्मध्यां महामातृकां कामाक्षीं करिराज-मन्दगमनां वन्दे महेशप्रियाम् ॥९॥

Verse

कान्ता काम-दुघा करीन्द्र-गमना कामारि-वामाङ्क-गा कल्याणी कलितावतार-सुभगा कस्तूरिका-चर्चिता । कम्पा-तीर-रसाल-मूल-निलया कारुण्य-कल्लोलिनी कल्याणानि करोतु मे भगवती काञ्ची-पुरी-देवता ॥१०॥

Verse

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य श्रीमच्छङ्करभगवतः कृतौ श्री-कामाक्षीस्तोत्रं सम्पूर्णम्॥

kāmākṣī-māhātmyam
mīnākṣīpañcaratnam

Read next

More on कामाक्षी-स्तोत्रम्

  • श्री-सावित्री-व्रतम् — कामाक्षी-पूजाPuja Vidhanam
  • श्री-कामाक्षी चूर्णिकाStotra
  • कामाक्षी सुप्रभातम्Stotra
  • कामाक्षी-माहात्म्यम्Stotra

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms