stotrasangraha
annapūrṇāṣṭottaraśatanāmastotram
अन्नपूर्णाष्टोत्तरशतनामस्तोत्रम्
Verse
सिन्दूराभां त्रिनेत्राममृतशशिकलां खेचरीं रत्नवस्त्रां पीनोत्तुङ्गस्तनाढ्यामभिनवविलसद्यौवनारम्भरम्याम् । नानालङ्कारयुक्तां सरसिजनयनामिन्दुसङ्क्रान्तमूर्तिं देवीं पाशाङ्कुशाढ्यामभयवरकरामन्नपूर्णां नमामि ॥
Verse
अन्नपूर्णा शिवा देवी भीमा पुष्टिः सरस्वती । सर्वज्ञा पार्वती दुर्गा शर्वाणी शिववल्लभा ॥१॥
Verse
वेदविद्या महाविद्या विद्यादात्री विशारदा । कुमारी त्रिपुरा बाला लक्ष्मीः श्रीर्भयहारिणी ॥२॥
Verse
भवानी विष्णुजननी ब्रह्मादिजननी तथा । गणेशजननी शक्तिः कुमारजननी शुभा ॥३॥
Verse
भोगप्रदा भगवती भक्ताभीष्टप्रदायिनी । भवरोगहरा भव्या शुभ्रा परममङ्गला ॥४॥
Verse
भवानी चञ्चला गौरी चारुचन्द्रकलाधरा । विशालाक्षी विश्वमाता विश्ववन्द्या विलासिनी ॥५॥
Verse
आर्या कल्याणनिलया रुद्राणी कमलासना । शुभप्रदा शुभावर्ता वृत्तपीनपयोधरा ॥६॥
Verse
अम्बा संहारमथनी मृडानी सर्वमङ्गला । विष्णुसंसेविता सिद्धा ब्रह्माणी सुरसेविता ॥७॥
Verse
परमानन्ददा शान्तिः परमानन्दरूपिणी । परमानन्दजननी परानन्दप्रदायिनी ॥८॥
Verse
परोपकारनिरता परमा भक्तवत्सला । पूर्णचन्द्राभवदना पूर्णचन्द्रनिभांशुका ॥९॥
Verse
शुभलक्षणसम्पन्ना शुभानन्दगुणार्णवा । शुभसौभाग्यनिलया शुभदा च रतिप्रिया ॥१०॥
Verse
चण्डिका चण्डमथनी चण्डदर्पनिवारिणी । मार्तण्डनयना साध्वी चन्द्राग्निनयना सती ॥११॥
Verse
पुण्डरीकहरा पूर्णा पुण्यदा पुण्यरूपिणी । मायातीता श्रेष्ठमाया श्रेष्ठधर्मात्मवन्दिता ॥१२॥
Verse
असृष्टिः सङ्गरहिता सृष्टिहेतुः कपर्दिनी । वृषारूढा शूलहस्ता स्थितिसंहारकारिणी ॥१३॥
Verse
मन्दस्मिता स्कन्दमाता शुद्धचित्ता मुनिस्तुता । महाभगवती दक्षा दक्षाध्वरविनाशिनी ॥१४॥
Verse
सर्वार्थदात्री सावित्री सदाशिवकुटुम्बिनी । नित्यसुन्दरसर्वाङ्गी सच्चिदानन्दलक्षणा ॥१५॥
Verse
नाम्नामष्टोत्तरशतमम्बायाः पुण्यकारणम् । सर्वसौभाग्यसिद्ध्यर्थं जपनीयं प्रयत्नतः ॥१६॥
Verse
एतानि दिव्यनामानि श्रुत्वा ध्यात्वा निरन्तरम् । स्तुत्वा देवीं च सततं सर्वान् कामानवाप्नुयात् ॥१७॥
Verse
॥इति श्रीशिवरहस्ये श्री-अन्नपूर्णाष्टोत्तरशतनामस्तोत्रं सम्पूर्णम्॥
