sahasranAma
śrī gaṃgā sahastranāmastotram
श्री गंगा सहस्त्रनामस्तोत्रम्
Verse
ध्यानम् साक्षाद्धर्मद्रवौघं मुररिपुचरणाम्भोजपीयूषसारं दुःखस्वाब्धेस्तरित्रं सुरदनुजनुतं स्वर्गसोपानमार्गम् । सर्वांहोहारि वारि प्रवरगुणगणं भासि या संवहन्ती तस्यै भागीरथि श्रीमति मुदितमना देवि कुर्वे नमस्ते ॥
Verse
अगस्त्य उवाच विना स्नानेन गङ्गायां नृणां जन्म निरर्थकम् । उपायान्तमस्त्यन्यद् येन स्त्रानफलं लभेत् ॥१॥
Verse
अशक्तानां च पङ्गूनामालस्योपहतात्मनाम् । दूरदेशान्तरस्थानां गङ्गास्नानं कथं भवेत् ॥२॥
Verse
दानं वाथ व्रतं वाथ मन्त्रः स्तोत्रं जपोऽथवा । तीर्थान्तराभिषेको वा देवतोपासनं तु वा ॥३॥
Verse
यद्यस्ति किंचित् षड्वक्त्र गङ्गास्नानफलप्रदम् । विधानान्तरमात्रेण तद् वद प्रणताय मे ॥४॥
Verse
त्वत्तो न वेद स्कन्दान्यो गङ्गागर्भसमुद्भव । परं स्वर्गतरङ्गिण्या महिमानं महामते ॥५॥
Verse
स्कन्द उवाच सन्ति पुण्यजलानीह सरांसि सरितो मुने । स्थाने स्थाने च तीर्थानि जितात्माध्युषितानि च ॥६॥
Verse
दृष्टप्रत्ययकारीणि महामहिमभाञ्ज्यपि । परं स्वर्गतरङ्गिण्याः कोट्यंशोऽपि न तत्र वै ॥७॥
Verse
अनेनैवानुमानेन बुध्यस्व कलशोद्भव । दध्रे गङ्गोत्तमाङ्गेन देवदेवेन शम्भुना ॥८॥
Verse
स्नानकालेऽन्यतीर्थेषु जप्यते जाह्नवी जनैः । विना विष्णुपदीं क्वान्यत् समर्थमघमोचने ॥९॥
Verse
गङ्गास्त्रानफलं ब्रह्मन् गङ्गायामेव लभ्यते । यथा द्राक्षाफलस्वादो द्राक्षायामेव नान्यतः ॥१०॥
Verse
अस्त्युपाय इह त्वेकः स्याद् येनाविकलं फलम् । स्नानस्य देवसरितो महागुह्मतमो मुने ॥११॥
Verse
शिवभक्ताय शान्ताय विष्णुभक्तिपराय च । श्रद्धालवे त्वास्तिकाय गर्भवासमुमुक्षवे ॥१२॥
Verse
कथनीयं न चान्यस्य कस्यचित् केनचित् क्वचित् । इदं रहस्यं परमं महापातकनाशनम् ॥१३॥
Verse
महाश्रेयस्करं पुण्यं मनोरथकरं परम् । द्युनदीप्रीतिजनकं शिवसंतोषसंततिः ॥१४॥
Verse
नाम्नां सहस्त्रं गङ्गायाः स्तवराजेषु शोभनम् । जप्यानां परमं जप्यं वेदोपनिषदां समम् ॥१५॥
Verse
जपनीयं प्रयत्नेन मौनिना वाचकं विना । शुचिस्थानेषु शुचिना सुस्पष्टाक्षरमेव च ॥१६॥
Verse
स्कन्द उवाच ॐ नमो गङ्गादेव्यै ओंकाररूपिण्यजरातुलानन्तामृतस्त्रवा । अत्युदाराभयाशोकालकनन्दामृतामला ॥१७॥
Verse
अनाथवत्सलामोघापांयोनिरमृतप्रदा । अव्यक्तलक्षणाक्षोभ्यानवच्छिन्नापराजिता ॥१८॥
Verse
अनाथनाथाभीष्टार्थसिद्धिदानङ्गवर्धिनी । अणिमादिगुणाऽऽधाराग्रगण्यालीकहारिणी ॥१९॥
Verse
अचिन्त्यशक्तिरनघाद्भुतरूपाघहारिणी । अद्रिराजसुताष्टाङ्गयोगसिद्धिप्रदाच्युता ॥२०॥
Verse
अक्षुण्णशक्तिरसुदानन्ततीर्थामृतोद्का । अनन्तमहिमापारानन्तसौख्यप्रदान्नदा ॥२१॥
Verse
अशेषदेवतामूर्तिरघोरामृतरूपिणी । अविद्याजालशमनी ह्यप्रतर्क्यगतिप्रदा ॥२२॥
Verse
अशेषविघ्नसंहर्त्री त्वशेषगुणगुम्फिता । अज्ञानतिमिरज्योतिरनुग्रहपरायणा ॥२३॥
Verse
अभिरामानवद्याङ्ग्यनन्तसाराकलङ्किनी । आरोग्यदाऽऽनन्दवल्ली त्वापन्नार्तिविनाशिनी ॥२४॥
Verse
आश्चर्यमूर्तिरायुष्या ह्याढ्याऽऽद्याऽऽप्राऽऽर्यसेविता । आप्यायिन्याप्तविद्याऽऽख्या त्वानन्दाऽऽश्वासदायिनी ॥२५॥
Verse
आलस्यघ्न्यापदां हन्त्री ह्यानन्दामृतवर्षिणी । इरावतीष्टदात्रीष्टा त्विष्टापूर्तफलप्रदा ॥२६॥
Verse
इतिहासश्रुतीड्यार्था त्विहामुत्रशुभप्रदा । इज्याशीलसमिज्येष्ठा त्विन्द्रादिपरिवन्दिता ॥२७॥
Verse
इलालङ्कारमालेद्धा त्विन्दिरा रम्यमन्दिरा । इदिन्दिरादिसंसेव्या त्वीश्वरीश्वरवल्लभा ॥२८॥
Verse
ईतिभीतिहरेड्या च त्वीडनीयचरित्रभृत् । उत्कृष्टशक्तिरुत्कृष्टोडुपमण्डलचारिणी ॥२९॥
Verse
उदिताम्बरमार्गोस्त्रोरगलोकविहारिणी । उक्षोर्वरोत्पलोत्कुम्भा उपेन्द्रचरणद्रवा ॥३०॥
Verse
उदन्वत्पूर्तिहेतुश्चोदारोत्साहप्रवर्द्धिनी । उद्वेगघ्न्युष्णशमनी ह्युष्णरश्मिसुताप्रिया ॥३१॥
Verse
उत्पत्तिस्थितिसंहारकारिण्युपरिचारिणी । ऊर्जं वहन्त्यूर्जधरोर्जावती चोर्मिमालिनी ॥३२॥
Verse
ऊर्ध्वरेतःप्रियोर्ध्वाध्वा ह्यूर्मिलोर्ध्वगतिप्रदा । ऋषिवृन्दस्तुतर्द्धिश्च ऋणत्रयविनाशिनी ॥३३॥
Verse
ऋतम्भरर्द्धिदात्री च ऋक्स्वरूपा ऋजुप्रिया । ऋक्षमार्गवहर्क्षार्चिऋजुमार्गप्रदर्शिनी ॥३४॥
Verse
एधिताखिलधर्मार्था त्वेकैकामृतदायिनी । एधनीयस्वभावैज्या त्वेजिताशेषपातका ॥३५॥
Verse
ऐश्वर्यदैश्वर्यरूपा ह्यौतिह्यं ह्यैन्दवीद्युतिः । ओजस्विन्योषधीक्षेत्रमोजोदौदनदायिनी ॥३६॥
Verse
ओष्ठामृतौन्नत्यदात्री त्वौषधं भवरोगिणाम् । औदार्यचञ्चुरौपेन्द्री त्वौग्री ह्यौमेयरूपिणी ॥३७॥
Verse
अम्बराध्ववहाम्बष्ठाम्बरमालाम्बुजेक्षणा । अम्बिकाम्बुमहायोनिरन्धोदान्धकहारिणी ॥३८॥
Verse
अंशुमाला ह्यंशुमती त्वङ्गीकृतषडानना । अन्धतामिस्त्रहन्त्र्यन्धुरञ्जना ह्यञ्जनावती ॥३९॥
Verse
कल्यानकारिणी काम्या कमलोत्पलगन्धिनी । कुमुद्वती कमलिनी कान्तिः कल्पितदायिनी ॥४०॥
Verse
काञ्चनाक्षी कामधेनुः कीर्तिकृत् क्लेशनाशिनी । क्रतुश्रेष्ठा क्रतुफला कर्मबन्धविभेदिनी ॥४१॥
Verse
कमलाक्षी क्लमहरा कृशानुतपनद्युतिः । करुणार्द्रा च कल्याणी कलिकल्मषनाशिनी ॥४२॥
Verse
कामरूपा क्रियाशक्तिः कमलोत्पलमालिनी । कूटस्था करुणा कान्ता कूर्मयाना कलावती ॥४३॥
Verse
कमला कल्पलतिका काली कलुषवैरिणी । कमनीयजला कम्रा कपर्दिसुकपर्दगा ॥४४॥
Verse
कालकूटप्रशमनी कदम्बकुसुमप्रिया । कालिन्दी केलिललिता कलकल्लोलमालिका ॥४५॥
Verse
क्रान्तलोकत्रया कण्डूः कण्डूतनयवत्सला । खड्गिनी खड्गधाराभा खगा खण्डेन्दुधारिणी ॥४६॥
Verse
खेखेलगामिनी खस्था खण्डेन्दुतिलकप्रिया । खेचरी खेचरीवन्द्या ख्यातिः ख्यातिप्रदायिनी ॥४७॥
Verse
खण्डितप्रणताघौघा खलबुद्धिविनाशिनी । खातैनःकंदसंदोहा खड्गखट्वाङ्गखेटिनी ॥४८॥
Verse
खरसंतापशमनी खनिः पीयूषपाथसाम् । गङ्गा गन्धवती गौरी गन्धर्वनगरप्रिया ॥४९॥
Verse
गम्भीराङ्गी गुणमयी गतातङ्का गतिप्रिया । गणनाथाम्बिका गीता गद्यपद्यपरिष्टुता ॥५०॥
Verse
गान्धारी गर्भशमनी गतिभ्रष्टगतिप्रदा । गोमती गुह्यविद्या गौर्गोप्त्री गगनगामिनी ॥५१॥
Verse
गोत्रप्रवर्द्धिनी गुण्या गुणातीता गुणाग्रणीः । गुहाम्बिका गिरिसुता गोविन्दाङ्घ्रिसमुद्भवा ॥५२॥
Verse
गुणनीयचरित्रा च गायत्री गिरिशप्रिया । गूढरूपा गुणवती गुर्वी गौरववर्धिनी ॥५३॥
Verse
ग्रहपीडाहरा गुंद्रा गरघ्नी गानवत्सला । घर्महन्त्री घृतवती घृततुष्टिप्रदायिनी ॥५४॥
Verse
घण्टारवप्रिया घोराघौघविध्वंसकारिणी । घ्राणतुष्टिकरी घोषा घनानन्दा घनप्रिया ॥५५॥
Verse
घातुका घूर्णितजला घृष्टपातकसंततिः । घटकोटिप्रपीतापा घटिताशेषमङ्गला ॥५६॥
Verse
घृणावती घृणिनिधिर्घस्मरा घूकनादिनी । घुसृणापिञ्जरतनुर्घर्घरा घर्घरस्वना ॥५७॥
Verse
चन्द्रिका चन्द्रकान्ताम्बुश्चञ्चदापा चलद्युतिः । चिन्मयी चितिरूपा च चन्द्रायुतशतानना ॥५८॥
Verse
चाम्पेयलोचना चारुश्चार्वङ्गी चारुगामिनी । चार्या चारित्रनिलया चित्रकृच्चित्ररूपिणी ॥५९॥
Verse
चम्पूश्चन्दनशुच्यम्बुश्चर्चनीया चिरस्थिरा । चारुचम्पकमालाढ्या चमिताशेषदुष्कृता ॥६०॥
Verse
चिदाकाशवहा चिन्त्या चञ्चच्चामरवीजिता । चोरिताशेषवृजिना चरिताशेषमण्डला ॥६१॥
Verse
छेदिताखिलपापौघा छद्मघ्नी छलहारिणी । छन्नत्रिविष्टपतला छोटिताशेषबन्धना ॥६२॥
Verse
छुरितामृतधारौघा छिन्नैनाश्छन्दगामिनी । छत्रीकृतमरालौघा छटीकृतनिजामृता ॥६३॥
Verse
जाह्नवी ज्या जगन्माता जप्या जङ्घालवीचिका । जया जनार्दनप्रीता जुषणीया जगद्धिता ॥६४॥
Verse
जीवनं जीवनप्राणा जगज्ज्येष्ठा जगन्मयी । जीवजीवातुलतिका जन्मिजन्मनिबर्हिणी ॥६५॥
Verse
जाड्यविध्वंसनकरी जगद्योनिर्जलाविला । जगदानन्दजननी जलजा जलजेक्षणा ॥६६॥
Verse
जनलोचनपीयूषा जटातटविहारिणी । जयन्ती जंजपूकघ्नी जनितज्ञानविग्रहा ॥६७॥
Verse
झल्लरीवाद्यकुशला झलज्झालजलावृता । झिण्टीशवन्द्या झंकारकारिणी झर्झरावती ॥६८॥
Verse
टीकिताशेषपाताला टङ्किकैनोऽद्रिपाटने । टंकारनृत्यत्कल्लोला टीकनीयमहातटा ॥६९॥
Verse
डम्बरप्रवहा डीनराजहंसकुलाकुला । डमड्डमरुहस्ता च डामरोक्तमहाण्डका ॥७०॥
Verse
ढौकिताशेषनिर्वाणा ढक्कानादचलज्जला । ढुण्ढिविघ्नेशजननी ढणड्ढुणितपातका ॥७१॥
Verse
तर्पणी तीर्थतीर्था च त्रिपथा त्रिदेशेश्वरी । त्रिलोकगोप्त्री तोयेशी त्रैलोक्यपरिवन्दिता ॥७२॥
Verse
तापत्रितयसंहर्त्री तेजोबलविवर्धिनी । त्रिलक्ष्या तारणी तारा तारापतिकरार्चिता ॥७३॥
Verse
त्रैलोक्यपावनी पुण्य तुष्टिदा तुष्टिरूपिणी । तृष्णाच्छेत्री तीर्थमाता त्रिविक्रमपदोद्भवा ॥७४॥
Verse
तपोमयी तपोरूपा तपःस्तोमफलप्रदा । त्रैलोक्यव्यापिनी तृप्तिस्तृप्तिकृत् तत्त्वरूपिणी ॥७५॥
Verse
त्रैलोक्यसुन्दरी तुर्या तुर्यातीतफलप्रदा । त्रैलोक्यलक्ष्मीस्त्रिपदी तथ्या तिमिरचन्द्रिका ॥७६॥
Verse
तेजोगर्भा तपःसारा त्रिपुरारिशिरोगृहा । त्रयीस्वरूपिणी तन्वी तपनाङ्गजभीतिनुत् ॥७७॥
Verse
तरिस्तरणिजामित्रं तर्पिताशेषपूर्वजा । तुलाविरहिता तीव्रपापतूलतनूनपात् ॥७८॥
Verse
दारिद्र्यदमनी दक्षा दुष्प्रेक्षा दिव्यमण्डना । दीक्षावती दुरावाप्या द्राक्षामधुरवारिभृत् ॥७९॥
Verse
दर्शितानेककुतुका दुष्टदुर्जयदुःखह्रत् । दैन्यहृद् दुरितघ्नी च दानवारिपदाब्जजा ॥८०॥
Verse
दंदशूकविषघ्नी च दारिताघौघसंततिः । द्रुता देवद्रुमच्छन्ना दुर्वाराघविघातिनी ॥८१॥
Verse
दमग्राह्या देवमाता देवलोकप्रदर्शिनी । देवदेवप्रिया देवी दिक्पालपददायिनी ॥८२॥
Verse
दीर्घायुःकारिणी दीर्घा दोग्ध्री दूषणवर्जिता । दुग्धाम्बुवाहिनी दोह्या दिव्या दिव्यगतिप्रदा ॥८३॥
Verse
द्युनदी दीनशरणं देहिदेहनिवारिणी । द्राघीयसी दाघहन्त्री दितपातकसंततिः ॥८४॥
Verse
दूरदेशान्तरचरी दुर्गमा देववल्लभा । दुर्वृत्तघ्नी दुर्विगाह्या दयाधारा दयावती ॥८५॥
Verse
दुरासदा दानशीला द्राविणी द्रुहिणस्तुता । दैत्यदानवसंशुद्धिकर्त्री दुर्बुद्धिहारिणी ॥८६॥
Verse
दानसारा दयासारा द्यावाभूमिविगाहिनी । दृष्टादृष्टफलप्राप्तिर्देवतावृन्दवन्दिता ॥८७॥
Verse
दीर्घव्रता दीर्घदृष्टिर्दीप्ततोया दुरालभा । दण्डयित्री दण्डनीतिर्दुष्टदण्डधरार्चिता ॥८८॥
Verse
दुरोदरघ्नी दावार्चिर्द्रवद्द्रव्यैकशेवधिः । दीनसंतापशमनी दात्री दवथुवैरिणी ॥८९॥
Verse
दरीविदारणपरा दान्ता दान्तजनप्रिया । दारिताद्रितटा दुर्गा दुर्गारण्यप्रचारिणी ॥९०॥
Verse
धर्मद्रवा धर्मधुरा धेनुर्धीरा धृतिर्ध्रुवा । धेनुदानफलस्पर्शा धर्मकामार्थमोक्षदा ॥९१॥
Verse
धर्मोर्मिवाहिनी धुर्या धात्री धात्रीविभूषणम् । धर्मिणी धर्मशीला च धन्विकोटिकृतावना ॥९२॥
Verse
ध्यातृपापहरा ध्येया धावनी धूतकल्मषा । धर्मधारा धर्मसारा धनदा धनवर्धिनी ॥९३॥
Verse
धर्माधर्मगुणच्छेत्री धत्तूरकुसुमप्रिया । धर्मेशी धर्मशास्त्रज्ञा धनधान्यसमृद्धिकृत् ॥९४॥
Verse
धर्मलभ्या धर्मजला धर्मप्रसवधर्मिणी । ध्यानगम्यस्वरूपा च धरणी धातृपूजिता ॥९५॥
Verse
धूर्धूर्जटिजटासंस्था धन्या धीर्धारणावती । नन्दा निर्वाणजननी नन्दिनी नुन्नपातका ॥९६॥
Verse
निषिद्धविघ्ननिचया निजानन्दप्रकाशिनी । नभोऽङ्गणचरी नूतिर्नम्या नारायणी नुता ॥९७॥
Verse
निर्मला निर्मलाख्याना नाशिनी तापसम्पदाम् । नियता नित्यसुखदा नानाश्चर्यमहानिधिः ॥९८॥
Verse
नदी नदसरोमाता नायिका नाकदीर्घिका । नष्टोद्धरणधीरा च नन्दना नन्ददायिनी ॥९९॥
Verse
निर्णिक्ताशेषभुवना निःसङ्गा निरुपद्रवा । निरालम्बा निष्प्रपञ्चा निर्णाशितमहामला ॥१००॥
Verse
निर्मलज्ञानजननी निःशेषप्राणितापहृत् । नित्योत्सवा नित्यतृप्ता नमस्कार्या निरञ्जना ॥१०१॥
Verse
निष्ठावती निरातङ्का निर्लेपा निश्चलात्मिका । निरवद्या निरीहा च नीललोहितमूर्द्धगा ॥१०२॥
Verse
नन्दिभृङ्गिगणस्तुत्या नागा नन्दा नगात्मजा । निष्प्रत्यूहा नाकनदी निरयार्णवदीर्घनौः ॥१०३॥
Verse
पुण्यप्रदा पुण्यगर्भा पुण्या पुण्यतरङ्गिणी । पृथुः पृथुफला पूर्णा प्रणतार्तिप्रभञ्जनी ॥१०४॥
Verse
प्राणदा प्राणिजननी प्राणेशी प्राणरूपिणी । पद्मालया पराशक्तिः पुराजित्परमाप्रिया ॥१०५॥
Verse
परा परफलप्राप्तिः पावनी च पयस्विनी । परानन्दा प्रकृष्टार्था प्रतिष्ठा पालिनी परा ॥१०६॥
Verse
पुराणपठिता प्रीता प्रणवाक्षररूपिणी । पार्वती प्रेमसम्पन्ना पशुपाशविमोचिनी ॥१०७॥
Verse
परमात्मस्वरूपा च परब्रह्मप्रकाशिनी । परमानन्दनिष्पन्दा प्रायश्चित्तस्वरूपिणी ॥१०८॥
Verse
पानीयरूपनिर्वाणा परित्राणपरायणा । पापेन्धनदाज्वाला पापारिः पापनामनुत् ॥१०९॥
Verse
परमैश्वर्यजननी प्रज्ञा प्राज्ञा परापरा । प्रत्यक्षलक्ष्मीः पद्माक्षी परव्योमामृतस्त्रवा ॥११०॥
Verse
प्रसन्नरूपा प्रणिधिः पूता प्रत्यक्षदेवता । पिनाकिपरमप्रीता परमेष्ठिकमण्डलुः ॥१११॥
Verse
पद्मनाभपदार्घ्येण प्रसूता पद्ममालिनी । परार्द्धिदा पुष्टिकरी पथ्या पूर्तिः प्रभावती ॥११२॥
Verse
पुनाना पीतगर्भघ्नी पापपर्वतनाशिनी । फलिनी फलहस्ता च फुल्लाम्बुजविलोचना ॥११३॥
Verse
फालितैनोमहाक्षेत्रा फणिलोकविभूषणा । फेनच्छलप्रणुन्नैनाः फुल्लकैरवगन्धिनी ॥११४॥
Verse
फेनिलाच्छाम्बुधाराभा फडुच्चाटितपातका । फाणितस्वादुसलिला फाण्टपथ्यजलाविला ॥११५॥
Verse
विश्वमाता च विश्वेशी विश्वा विश्वेश्वरप्रिया । ब्रह्मण्या ब्रह्मकृद् ब्राह्मी ब्रहिष्ठा विमलोदका ॥११६॥
Verse
विभावरी च विरजा विक्रान्तानेकविष्टपा । विश्वमित्रं विष्णुपदी वैष्णवी वैष्णवप्रिया ॥११७॥
Verse
विरूपाक्षप्रियकरी विभूतिर्विश्वतोमुखी । विपाशा वैबुधी वेद्या वेदाक्षररसस्त्रवा ॥११८॥
Verse
विद्या वेगवती वन्द्या बृंहणी ब्रह्मवादिनी । वरदा विप्रकृष्टा च वरिष्ठा च विशोधनी ॥११९॥
Verse
विद्याधरी विशोका च वयोवृन्दनिषेविता । बहूदका बलवती व्योमस्था विबुधप्रिया ॥१२०॥
Verse
वाणी वेदवती वित्ता ब्रह्मविद्यातरङ्गिणी । ब्रह्माण्डकोटिव्याप्ताम्बुर्ब्रह्यहत्यापहारिणी ॥१२१॥
Verse
ब्रह्मेशविष्णुरूपा च बुद्धिर्विभववर्धिनी । विलासिसुखदा वश्या व्यापिनी च वृषारणिः ॥१२२॥
Verse
वृषाङ्कमौलिनिलया विपन्नार्तिप्रभञ्जनी । विनीता विनता ब्रध्नतनया विनयान्विता ॥१२३॥
Verse
विपञ्ची वाद्यकुशला वेणुश्रुतिविचक्षणा । वर्चस्करी बलकरी बलोन्मूलितकल्मषा ॥१२४॥
Verse
विपाप्मा विगतातङ्का विकल्पपरिवर्जिता । वृष्टिकर्त्री विष्टिजला विधीर्विच्छिन्नबन्धना ॥१२५॥
Verse
व्रतरूपा वित्तरूपा बहुविघ्नविनाशकृत् । वसुधारा वसुमती विचित्राङ्गि विभावसुः ॥१२६॥
Verse
विजया विश्चबीजा च वामदेवी वरप्रदा । वृषाश्रिता विषघ्नी च विज्ञानोर्म्यंशुमालिनी ॥१२७॥
Verse
भव्या भोगवती भद्रा भवानी भूतभाविनी । भूतधात्री भयहरा भक्तदारिद्र्यघातिनी ॥१२८॥
Verse
भुक्तिमुक्तिप्रदा भेशी भक्तस्वर्गापवर्गदा । भागीरथी भानुमती भाग्यं भोगवती भ्रृतीः ॥१२९॥
Verse
भवप्रिया भवद्वेष्ट्री भूतिदा भूतिभूषणा । भाललोचनभावज्ञा भूतभव्यभवत्प्रभुः ॥१३०॥
Verse
भ्रान्तिज्ञानप्रशमनी भिन्नब्रह्माण्डमण्डपा । भूरिदा भक्तसुलभा भाग्यवद्दृष्टिगोचरी ॥१३१॥
Verse
भञ्जितोपप्लवकुला भक्ष्यभोज्यसुखप्रदा । भिक्षणीया भिक्षुमाता भावा भावस्वरूपिणी ॥१३२॥
Verse
मन्दाकिनी महानन्दा माता मुक्तितरङ्गिणी । महोदया मधुमती महापुण्या मुदाकरी ॥१३३॥
Verse
मुनिस्तुता मोहहन्त्री महातीर्था मधुस्त्रवा । माधवी मानिनी मान्या मनोरथपथातिगा ॥१३४॥
Verse
मोक्षदा मतिदा मुख्या महाभाग्यजनाश्रिता । महावेगवती मेध्या महामहिमभूषणा ॥१३५॥
Verse
महाप्रभावा महती मीनचञ्चललोचना । महाकारुण्यसम्पूर्णा महर्द्धिश्च महोत्पला ॥१३६॥
Verse
मूर्तिमन्मुक्तिरमणी मणिमाणिक्यभूषणा । मुक्ताकलापनेपथ्या मनोनयननन्दिनी ॥१३७॥
Verse
महापातकराशिघ्नी महादेवार्धहारिणी । महोर्मिमालिनी मुक्ता महादेवी मनोन्मनी ॥१३८॥
Verse
महापुण्योदयप्राप्या मायातिमिरचन्द्रिका । महाविद्या महामाया महामेधा महौषधम् ॥१३९॥
Verse
मालाधरी महोपाया महोरगविभूषणा । महामोहप्रशमनी महामङ्गलमङ्गलम् ॥१४०॥
Verse
मार्तण्डमण्डलचरी महालक्ष्मीर्मदोज्झिता । यशस्विनी यशोदा च योग्या युक्तात्मसेविता ॥१४१॥
Verse
योगसिद्धिप्रदा याच्या यज्ञेशपरिपूरिता । यज्ञेशी यज्ञफलदा यजनीया यशस्करी ॥१४२॥
Verse
यमिसेव्या योगयोनिर्योगिनी युक्तबुद्धिदा । योगज्ञानप्रदा युक्ता यमाद्यष्टाङ्गयोगयुक् ॥१४३॥
Verse
यन्त्रिताघौघसंचारा यमलोकनिवारिणी । यातायातप्रशमनी यातनानामकृन्तनी ॥१४४॥
Verse
यामिनीशहिमाच्छोदा युगधर्मविवर्जिता । रेवती रतिकृद् रम्या रत्नगर्भा रमा रतिः ॥१४५॥
Verse
रत्नाकरप्रेमपात्रं रसज्ञा रसरूपिणी । रत्नप्रासादगर्भा च रमणीयतरङ्गिणी ॥१४६॥
Verse
रत्नार्ची रुद्ररमणी रागद्वेषविनाशिनी । रमा रामा रम्यरूपा रोगिजीवानुरूपिणी ॥१४७॥
Verse
रुचिकृद् रोचनी रम्या रुचिरा रोगहारिणी । राजहंसा रत्नवती राजत्कल्लोलराजिका ॥१४८॥
Verse
रामणीयकरेखा च रुजारी रोगरोषिणी । राका रङ्कार्तिशमनी रम्या रोलम्बराविणी ॥१४९॥
Verse
रागिणी रञ्जितशिवा रूपलावण्यशेवधिः । लोकप्रसूर्लोकवन्द्या लोकत्कल्लोलमालिनी ॥१५०॥
Verse
लीलावती लोकभूमिर्लोकलोचनचन्द्रिका । लेखस्त्रवन्ती लटभा लघुवेगा लघुत्वहृत् ॥१५१॥
Verse
लास्यत्तरङ्गहस्ता च ललिता लयभङ्गिगा । लोकबन्धुर्लोकधात्री लोकोत्तरगुणोर्जिता ॥१५२॥
Verse
लोकत्रयहिता लोका लक्ष्मीर्लक्षणलक्षिता । लीला लक्षितनिर्वाणा लावण्यामृतवर्षिणी ॥१५३॥
Verse
वैश्वानरी वासवेड्या वन्ध्यत्वपरिहारिणी । वासुदेवाङ्घ्रिरेणुघ्नी वज्रिवज्रनिवारिणी ॥१५४॥
Verse
शुभावती शुभफला शान्तिः शंतनुवल्लभा । शूलिनी शैशववयाः शीतलामृतवाहिनी ॥१५५॥
Verse
शोभावती शीलवती शोषिताशेषकिल्बिषा । शरण्या शिवदा शिष्टा शरजन्मप्रसूः शिवा ॥१५६॥
Verse
शक्तिः शशाङ्कविमला शमनस्वसृसम्मता । शमा शमनमार्गघ्नी शितिकण्ठमहाप्रिया ॥१५७॥
Verse
शुचिः शुचिकरी शेषा शेषशायिपदोद्भवा । श्रीनिवासश्रुतिः श्रद्धा श्रीमती श्रीः शुभव्रता ॥१५८॥
Verse
शुद्धविद्या शुभावर्ता श्रुतानन्दा श्रुतिस्तुतिः । शिवेतरघ्नी शबरी शाम्बरीरूपधारिणी ॥१५९॥
Verse
श्मशानशोधनी शान्ता शश्वच्छतधृतिस्तुता । शालिनी शालिशोभाढ्या शिखिवाहनगर्भभृत् ॥१६०॥
Verse
शंसनीयचरित्रा च शातिताशेषपातका । षड्गुणैश्वर्यसम्पन्ना षडङ्गश्रुतिरूपिणी ॥१६१॥
Verse
षण्ढताहारिसलिला स्त्यायन्नदनदीशता । सरिद्वरा च सुरसा सुप्रभा सुरदीर्घिका ॥१६२॥
Verse
स्वःसिन्धुः सर्वदुःखघ्नी सर्वव्याधिमहौषधम् । सेव्या सिद्धिः सती सूक्तिः स्कन्दसूश्च सरस्वती ॥१६३॥
Verse
सम्पत्तरङ्गिणी स्तुत्या स्थाणुमौलिकृतालया । स्थैर्यदा सुभगा सौख्या स्त्रीषु सौभाग्यदायिनी ॥१६४॥
Verse
स्वर्गनिःश्रेणिका सूक्ष्मा स्वधा स्वाहा सुधाजला । समुद्ररूपिणी स्वर्ग्या सर्वपातकवैरिणी ॥१६५॥
Verse
स्मृताघहारिणी सीता संसाराब्धितरङ्गिका । सौभाग्यसुन्दरी संध्या सर्वसारसमन्विता ॥१६६॥
Verse
हरप्रिया हृषीकेशी हंसरूपा हिरण्मयी । ह्र्ताघसंघा हितकृद्धेला हेलाघगर्वहृत् ॥१६७॥
Verse
क्षेमदा क्षालिताघौघा क्षुद्रविद्राविणी क्षमा । ॥
Verse
फलश्रुतिः ॥
Verse
इति नाम सहस्त्रं हि गङ्गायाः कलशोद्भव । कीर्तयित्वा नरः सम्यग्गङ्गास्नानफलं लभेत् ॥१६८॥
Verse
सर्वपापप्रशमनं सर्वविघ्नविनाशनम् । सर्वस्तोत्रजपाच्छ्रेष्ठं सर्वपावनपावनम् ॥१६९॥
Verse
श्रद्धयाभीष्टफलदं चतुर्वर्गसमृद्धिकृत् । सकृज्जपादवाप्नोति ह्येकक्रतुफलं मुने ॥१७०॥
Verse
सर्वतीर्थेषु यः स्नातः सर्वयज्ञेषु दीक्षितः । तस्य यत्फलमुद्दिष्टं त्रिकालपठनाच्च तत् ॥१७१॥
Verse
सर्वव्रतेषु यत्पुण्यं सम्यक्चीर्णेषु वाडव । तत्फलं समवाप्नोति त्रिसंध्यं नियतः पठन् ॥१७२॥
Verse
स्नानकाले पठेद्यस्तु यत्र कुत्र जलाशये । तत्र संनिहिता नुनं गङ्गा त्रिपथगा मुने ॥१७३॥
Verse
श्रेयोऽर्थी लभते श्रेयो धनार्थी लभते धनम् । कामी कामानवाप्नोति मोक्षार्थी मोक्षमाप्नुयात् ॥१७४॥
Verse
वर्षं त्रिकालपठनाच्छ्रद्धया शुचिमानसः । ऋतुकालाभिगमनादपुत्रः पुत्रवान् भवेत् ॥१७५॥
Verse
नाकालमरणं तस्य नाग्निचोराहिसाध्वसम् । नाम्नां सहस्त्रं गङ्गाया यो जपेच्छ्रद्धया मुने ॥१७६॥
Verse
गङ्गानामसहस्त्रं तु जप्त्वा ग्रामान्तरं व्रजेत् । कार्यसिद्धिमवाप्नोति निर्विघ्नो गेहमाविशेत् ॥१७७॥
Verse
तिथिवारर्क्षयोगानां न दोषः प्रभवेत्तदा । यदा जप्त्वा व्रजेदेतत् स्तोत्रं ग्रामान्तरं नरः ॥१७८॥
Verse
आयुरारोग्यजननं सर्वोपद्रवनाशनम् । सर्वासिद्धिकरं पुंसां गङ्गानामसहस्त्रकम् ॥१७९॥
Verse
जन्मान्तरसहस्त्रेषु यत्पापं सम्यगर्जितम् । गङ्गानामसहस्त्रस्य जपनात् तत्क्षयं व्रजेत् ॥१८०॥
Verse
ब्रह्माघ्नो मद्यपः स्वर्णस्तेयी च गुरुतल्पगः । तत्संयोगी भ्रूणहन्ता मातृहा पितृहा मुने ॥१८१॥
Verse
विश्वासघाती गरदः कृतघ्नो मित्रघातकः । अग्निदो गोवधकरो गुरुद्रव्यापहारकः ॥१८२॥
Verse
महापातकयुक्तोऽपि संयुक्तोऽप्युपपातकैः । मुच्यते श्रद्धया जप्त्वा गङ्गानामसहस्त्रकम् ॥१८३॥
Verse
आधिव्याधिपरिक्षिप्तो घोरतापपरिप्लुतः । मुच्यते सर्वदूःखेभ्यः स्तवस्यास्यानुकीर्तनात् ॥१८४॥
Verse
संवत्सरेण युक्तात्मा पठन् भक्तिपरायणः । अभीप्सितां लभेत् सिद्धिं सर्वैः पापैः प्रमुच्यते ॥१८५॥
Verse
संशयाविष्टचित्तस्य धर्मविद्वेषिणोऽपि च । दाम्भिकस्यापि हिंस्त्रस्य चेतो धर्मपरं भवेत् ॥१८६॥
Verse
वर्णाश्रमपथीनस्तु कामक्रोधविवर्जितः । यत्फलं लभते ज्ञानी तदाप्नोत्यस्य कीर्तनात् ॥१८७॥
Verse
गायत्र्ययुतजप्येन यत्फलं समुपार्जितम् । सकृत् पठनतः सम्यक् तदशेषवाप्नुयात् ॥१८८॥
Verse
गां दत्त्वा वेदविदुषे यत्फलं लभते कृती । तत्पुण्यं सम्यगाख्यातं स्तवराजकृज्जपात् ॥१८९॥
Verse
गुरुशुश्रूषणं कुर्वन् यावज्जीवं नरोत्तमः । यत्पुण्यमर्जयेत् तद्भाग्वर्षं त्रिषवणं जपन् ॥१९०॥
Verse
वेदपारायणात् पुण्यं यदत्र परिपठ्यते । तत्षण्मासेन लभते त्रिसंध्यं परिकीर्तनात् ॥१९१॥
Verse
गङ्गायाः स्तवराजस्य प्रत्यहं परिशीलनात् । शिवभक्तिमवाप्नोति विष्णुभक्तोऽथवा भवेत् ॥१९२॥
Verse
यः कीर्तयेदनुदिनं गङ्गानामसहस्त्रकम् । तत्समीपे सहचरी गङ्गादेवी सदा भवेत् ॥१९३॥
Verse
सर्वत्र पूज्यो भवति सर्वत्र विजयी भवेत् । सर्वत्र सुखमाप्नोति जाह्नवीस्तोत्रपाठतः ॥१९४॥
Verse
सदाचारी स विज्ञेयः स शुचिस्तु सदैव हि । कृतसर्वसुरार्चः स कीर्तयेद्य इमां स्तुतिम् ॥१९५॥
Verse
तस्मिंस्तृप्ते भवेत् तृप्ता जाह्नवी नात्र संशयः । तस्मात् सर्वप्रयत्नेन गङ्गाभक्तं समर्चयेत् ॥१९६॥
Verse
स्तवराजमिमं गाङ्गं श्रृणुयाद्यश्च वै पठेत् । श्रावयेदथ तद्भक्तान् दम्भलोभविवर्जितः ॥१९७॥
Verse
मुच्यते त्रिविधैः पापैर्मनोवाक्कायसम्भवैः । क्षणान्निष्पापतामेति पितॄणां च प्रियो भवेत् ॥१९८॥
Verse
सर्वदेवप्रियश्चापि सर्वर्षिगणसम्मतः । अन्ते विमानमारुह्य दिव्यस्त्रीशतसंवृतः ॥१९९॥
Verse
दिव्याभरणसम्पन्नो दिव्यभोगसमन्वितः । नन्दनादिवने स्वैरं देववत् स प्रमोदते ॥२००॥
Verse
भुज्यमानेषु विप्रेषु श्राद्धकाले विशेषतः । जपन्निदं महास्तोत्रं पितॄणां तृप्तिकारकम् ॥२०१॥
Verse
यावन्ति तत्र सिक्थानि यावन्तोऽम्बुकणाः स्थिताः । तावन्त्येव हि वर्षाणि मोदन्ते स्वपितामहाः ॥२०२॥
Verse
यथा पितरः प्रीणन्ति गङ्गायां पिण्डदानतः । तथैव पृप्नुयुः श्राद्धे स्तवस्यास्यानुसंश्रवात् ॥२०३॥
Verse
एतत्स्तोत्रं गृहे यस्य लिखितं परिपूज्यते । तत्र पापभयं नास्ति शुचि तद्भवनं सदा ॥२०४॥
Verse
अगस्त्य किं बहुक्तेन श्रृणु मे निश्चितं वचः । संशयो नात्र कर्तव्यः संदेग्धरि फलं नहि ॥२०५॥
Verse
यावन्ति मर्त्ये स्तोत्राणि मन्त्रजालान्यनेकशः । तावन्ति स्तवराजस्य गाङ्गेयस्य समानि न ॥२०६॥
Verse
यावज्जन्म जपेद्यस्तु नाम्रामेतत्सहस्त्रकम् । स कीकटेष्वपि मृतो न पुनर्गर्भमाविशेत् ॥२०७॥
Verse
नित्यं नियमवानेतद् यो जपेत् स्तोत्रमुत्तमम् । अन्यत्रापि विपन्नः स गङ्गातीरे मृतो भवेत् ॥२०८॥
Verse
एतत्स्तोत्रवरं रम्यं पुरा प्रोक्तं पिनाकिना । विष्णवे निजभक्ताय मुक्तिबीजाक्षरास्पदम् ॥२०९॥
Verse
गङ्गास्त्रानप्रतिनिधिं स्तोत्रमेतन्मयेरितम् । सिस्त्रासुर्जाह्नवीं तस्मादेतत् स्तोत्रं जपेत् सुधीः ॥२१०॥
Verse
॥
Verse
इति श्रीस्कन्दपुराणे काशीखण्डे पूर्वार्धे श्रीगङ्गासहस्त्रनामस्तोत्रं सम्पूर्णम् ॥
