Fetching Data .

Loading verse structure and chapter context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

aSTakam

gaṅgāṣṭakam -śrī vālmiki viracitam

गङ्गाष्टकम् -श्री वाल्मिकि विरचितम्

Verse

मातः शैलसुता-सपत्नि वसुधा-शृङ्गारहारावलि स्वर्गारोहण-वैजयन्ति भवतीं भागीरथीं प्रार्थये । त्वत्तीरे वसतः त्वदंबु पिबतस्त्वद्वीचिषु प्रेङ्खतः त्वन्नाम स्मरतस्त्वदर्पितदृशः स्यान्मे शरीरव्ययः ॥१॥

Verse

त्वत्तीरे तरुकोटरान्तरगतो गङ्गे विहङ्गो परं त्वन्नीरे नरकान्तकारिणि वरं मत्स्योऽथवा कच्छपः । नैवान्यत्र मदान्धसिन्धुरघटासंघट्टघण्टारण- त्कारस्तत्र समस्तवैरिवनिता-लब्धस्तुतिर्भूपतिः ॥२॥

Verse

उक्षा पक्षी तुरग उरगः कोऽपि वा वारणो वाऽ- वारीणः स्यां जनन-मरण-क्लेशदुःखासहिष्णुः । न त्वन्यत्र प्रविरल-रणत्किङ्किणी-क्वाणमित्रं वारस्त्रीभिश्चमरमरुता वीजितो भूमिपालः ॥३॥

Verse

काकैर्निष्कुषितं श्वभिः कवलितं गोमायुभिर्लुण्टितं स्रोतोभिश्चलितं तटाम्बु-लुलितं वीचीभिरान्दोलितम् । दिव्यस्त्री-कर-चारुचामर-मरुत्संवीज्यमानः कदा द्रक्ष्येऽहं परमेश्वरि त्रिपथगे भागीरथी स्वं वपुः ॥४॥

Verse

अभिनव-बिसवल्ली-पादपद्मस्य विष्णोः मदन-मथन-मौलेर्मालती-पुष्पमाला । जयति जयपताका काप्यसौ मोक्षलक्ष्म्याः क्षपित-कलिकलङ्का जाह्नवी नः पुनातु ॥५॥

Verse

एतत्ताल-तमाल-साल-सरलव्यालोल-वल्लीलता- च्छत्रं सूर्यकर-प्रतापरहितं शङ्खेन्दु-कुन्दोज्ज्वलम् । गन्धर्वामर-सिद्ध-किन्नरवधू-तुङ्गस्तनास्पालितं स्नानाय प्रतिवासरं भवतु मे गाङ्गं जलं निर्मलम् ॥६॥

Verse

गाङ्गं वारि मनोहारि मुरारि-चरणच्युतम् । त्रिपुरारि-शिरश्चारि पापहारि पुनातु माम् ॥७॥

Verse

पापापहारि दुरितारि तरङ्गधारि शैलप्रचारि गिरिराज-गुहाविदारि । झङ्कारकारि हरिपाद-रजोपहारि गाङ्गं पुनातु सततं शुभकारि वारि ॥८॥

Verse

गङ्गाष्टकं पठति यः प्रयतः प्रभाते वाल्मीकिना विरचितं शुभदं मनुष्यः । प्रक्षाल्य गात्र-कलिकल्मष-पङ्क-माशु मोक्षं लभेत् पतति नैव नरो भवाब्धौ ॥९॥

Verse

॥ इति वाल्मीकिविरचितं गङ्गाष्टकं सम्पूर्णम् ॥

śrīgaṇeśāya namaḥ ॥
narmadāṣṭakaṃ

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms