dohAvalI
bhāga 1
भाग १
Verse
ध्यान राम बाम दिसि जानकी लखन दाहिनी ओर । ध्यान सकल कल्यानमय सुरतरु तुलसी तोर ॥
Verse
सीता लखन समेत प्रभु सोहत तुलसीदास । हरषत सुर बरषत सुमन सगुन सुमंगल बास ॥
Verse
पंचबटी बट बिटप तर सीता लखन समेत । सोहत तुलसीदास प्रभु सकल सुमंगल देत ॥
Verse
राम-नाम-जपकी महिमा चित्रकूट सब दिन बसत प्रभु सिय लखन समेत । राम नाम जप जापकहि तुलसी अभिमत देत ॥
Verse
पय अहार फल खाइ जपु राम नाम षट मास । सकल सुमंगल सिद्धि सब करतल तुलसीदास ॥
Verse
राम नाम मनीदीप धरु जीह देहरी द्वार । तुलसी भीतर बाहरेहुँ जौं चाहसि उजियार ॥
Verse
हियँ निर्गुन नयनन्हि सगुन रसना राम सुनाम । मनहुँ पुरट संपुट लसत तुलसी ललित ललाम ॥
Verse
सगुन ध्यान रुचि सरस नहिं निर्गुन मन ते दूरि । तुलसी सुमिरहु रामको नाम सजीवन मूरि ॥
Verse
एकु छत्रु एकु मुकुटमनि सब बरननि पर जोउ । तुलसी रघुबर नाम के बरन बिराजत दोउ ॥
Verse
नाम राम को अंक है सब साधन हैं सून । अंक गएँ कछु हाथ नहिं अंक रहें दस गून ॥
Verse
नामु राम को कलपतरु कलि कल्यान निवासु । जो सुमिरत भयो भाँग तें तुलसी तुलसीदासु ॥
Verse
राम नाम जपि जीहँ जन भए सुकृत सुखसालि । तुलसी इहाँ जो आलसी गयो आजु की कालि ॥
Verse
नाम गरीबनिवाज को राज देत जन जानि । तुलसी मन परिहरत नहिं घुर बिनिआ की बानि ॥
Verse
कासीं बिधि बसि तनु तजें हठि तनु तजें प्रयाग । तुलसी जो फल सो सुलभ राम नाम अनुराग ॥
Verse
मीठो अरु कठवति भरो रौंताई अरु छैम । स्वारथ परमारथ सुलभ राम नाम के प्रेम ॥
Verse
राम नाम सुमिरत सुजस भाजन भए कुजाति । कुतरुक सुरपुर राजमग लहत भुवन बिख्याति ॥
Verse
स्वारथ सुख सपनेहुँ अगम परमारथ न प्रबेस । राम नाम सुमिरत मिटहिं तुलसी कठिन कलेस ॥
Verse
मोर मोर सब कहँ कहसि तू को कहु निज नाम । कै चुप साधहि सुनि समुझि कै तुलसी जपु राम ॥
Verse
हम लखि लखहि हमार लखि हम हमार के बीच । तुलसी अलखहि का लखहि राम नाम जप नीच ॥
Verse
राम नाम अवलंब बिनु परमारथ की आस । बरषत बारिद बूँद गहि चाहत चढ़न अकास ॥
Verse
तुलसी हठि हठि कहत नित चित सुनि हित करि मानि । लाभ राम सुमिरन बड़ो बड़ी बिसारें हानि ॥
Verse
बिगरी जनम अनेक की सुधरै अबहीं आजु । होहि राम को नाम जपु तुलसी तजि कुसमाजु ॥
Verse
प्रीति प्रतीति सुरीति सों राम राम जपु राम । तुलसी तेरो है भलो आदि मध्य परिनाम ॥
Verse
दंपति रस रसना दसन परिजन बदन सुगेह । तुलसी हर हित बरन सिसु संपति सहज सनेह ॥
Verse
बरषा रितु रघुपति भगति तुलसी सालि सुदास । रामनाम बर बरन जुग सावन भादव मास ॥
Verse
राम नाम नर केसरी कनककसिपु कलिकाल । जापक जन प्रहलाद जिमि पालिहि दलि सुरसाल ॥
Verse
राम नाम कलि कामतरु राम भगति सुरधेनु । सकल सुमंगल मूल जग गुरुपद पंकर रेनु ॥
Verse
राम नाम कलि कामतरु सकल सुमंगल कंद । सुमिरत करतल सिद्धि सब पग पग परमानंद ॥
Verse
जथा भूमि सब बीजमय नखत निवास अकास । राम नाम सब धरममय जानत तुलसीदास ॥
Verse
सकल कामना हीन जे राम भगति रस लीन । नाम सुप्रेम पियूष हृद तिन्हहुँ किए मन मीन ॥
Verse
ब्रह्म राम तें नामु बड़ बर दायक बर दानि । राम चरित सत कोटि महँ लिय महेस जियँ जानि ॥
Verse
सबरी गीध सुसेवकनि सुगति दीन्हि रघुनाथ । नाम उधारे अमित खल बेद बिदित गुन गाथ ॥
Verse
राम नाम पर नाम तें प्रीति प्रतीति भरोस । सो तुलसी सुमिरत सकल सगुन सुमंगल कोस ॥
Verse
लंक बिभीषन राज कपि पति मारुति खग मीच । लही राम सों नाम रति चाहत तुलसी नीच ॥
Verse
हरन अमंगल अघ अखिल करन सकल कल्यान । रामनाम नित कहत हर गावत बेद पुरान ॥
Verse
तुलसी प्रीति प्रतीति सों राम नाम जप जाग । किएँ होइ बिधि दाहिनो देइ अभागेहि भाग ॥
Verse
जल थल नभ गति अमित अति अग जग जीव अनेक । तुलसी तो से दीन कहँ राम नाम गति एक ॥
Verse
राम भरोसो राम बल राम नाम बिस्वास । सुमिरत सुभ मंगल कुसल माँगत तुलसीदास ॥
Verse
राम नाम रति राम गति राम नाम बिस्वास । सुमिरत सुभ मंगल कुसल दुहुँ दिसि तुलसीदास ॥
