Preparing Your Space .

Settling the page into your current context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

stuti

mahālakṣmīstutiḥ (agastyakṛtā)

महालक्ष्मीस्तुतिः (अगस्त्यकृता)

Verse

मातर्नमामि कमले कमलायताक्षि श्रीविष्णुहृत्कमलवासिनि विश्वमातः । क्षीरोदजे कमलकोमलगर्भगौरि लक्ष्मि प्रसीद सततं नमतां शरण्ये ॥१॥

Verse

त्वं श्रीरुपेन्द्रसदने मदनैकमातर्- ज्योत्स्नाऽसि चन्द्रमसि चन्द्रमनोहरास्ये । सूर्ये प्रभाऽसि च जगत्त्रितये प्रभाऽसि लक्ष्मि प्रसीद सततं नमतां शरण्ये ॥२॥

Verse

त्वं जातवेदसि सदा दहनात्मशक्तिर्- वेधास्त्वया जगदिदं विविधं विदध्यात् । विश्वम्भरोऽपि बिभृयादखिलं भवत्या लक्ष्मि प्रसीद सततं नमतां शरण्ये ॥३॥

Verse

त्वत्त्यक्तमेतदमले हरते हरोऽपि त्वं पासि हंसि विदधासि परावरासि । ईड्यो बभूव हरिरप्यमले त्वदाप्त्या लक्ष्मि प्रसीद सततं नमतां शरण्ये ॥४॥

Verse

शूरः स एव स गुणी स बुधः स धन्यो मान्यः स एव कुलशीलकलाकलापैः । एकः शुचिः स हि पुमान् सकलेऽपि लोके यत्रापतेत् तव शुभे करुणाकटाक्षः ॥५॥

Verse

यस्मिन्वसेः क्षणमहो पुरुषे गजेऽश्वे स्त्रैणे तृणे सरसि देवकुले गृहेऽन्ने । रत्ने पतत्त्रिणि पशौ शयने धरायां सश्रीकमेव सकले तदिहास्ति नान्यत् ॥६॥

Verse

त्वत्स्पृष्टमेव सकलं शुचितां लभेत त्वत्त्यक्तमेव सकलं त्वशुचीह लक्ष्मि । त्वन्नाम यत्र च सुमङ्गलमेव तत्र श्रीविष्णुपत्नि कमले कमलालयेऽपि ॥७॥

Verse

लक्ष्मीं श्रियं च कमलां कमलालयां च पद्मां रमां नलिनयुग्मकरां च मां च । क्षीरोदजाममृतकुम्भकरामिरां च विष्णुप्रियामिति सदा जपतां क्व दुःखम् ॥८॥

Verse

ये पठिष्यन्ति च स्तोत्रं त्वद्भक्त्या मत्कृतं सदा । तेषां कदाचित् सन्तापो माऽस्तु माऽस्तु दरिद्रता ॥९॥

Verse

माऽस्तु चेष्टवियोगश्च माऽस्तु सम्पत्तिसङ्क्षयः । सर्वत्र विजयश्चाऽस्तु विच्छदो माऽस्तु सन्ततेः ॥१०॥

Verse

एवमस्तु मुने सर्वं यत् त्वया परिभाषितम् । एतत् स्तोत्रस्य पठनं मम सान्निध्यकारणम् ॥११॥

Verse

अलक्ष्मीः कालकर्णी च तद्गेहे न विशेत् क्वचित् । गजाश्वपशुशान्त्यर्थमेतत्स्तोत्रं सदा जपेत् ॥१२॥

Verse

इदं बीजरहस्यं मे रक्षणीयं प्रयत्नतः । श्रद्धाहीने न दातव्यं न देयश्चाशुचौ क्वचित् ॥१३॥

Verse

॥इति श्रीस्कन्दमहापुराणे एकाशीतिसाहस्र्यां संहितायां चतुर्थे काशीखण्डेऽगस्त्यप्रस्थानं नाम पञ्चमेऽध्याये श्री-अगस्तिकृता महालक्ष्मीस्तुतिः सम्पूर्णा॥

durgā-stutiḥ (arjuna-kṛtā)
dvādaśāryāsūryastutiḥ

Read next

More on महालक्ष्मीस्तुतिः (अगस्त्यकृता)

  • महालक्ष्मीस्तुतिः (अगस्त्यकृता)Stotra

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms