stotrasangraha
veṅkaṭeśa karāvalambastotram
वेङ्कटेश करावलम्बस्तोत्रम्
Verse
श्रीशेषशैल-सुनिकेतन दिव्यमूर्ते नारायणाच्युत हरे नलिनायताक्ष । लीलाकटाक्ष-परिरक्षित-सर्वलोक श्रीवेङ्कटेश मम देहि करावलम्बम् ॥१॥
Verse
ब्रह्मादिवन्दितपदाम्बुज शङ्खपाणे श्रीमत्सुदर्शन-सुशोभित-दिव्यहस्त । कारुण्यसागर शरण्य सुपुण्यमूर्ते श्रीवेङ्कटेश मम देहि करावलम्बम् ॥२॥
Verse
वेदान्त-वेद्य भवसागर-कर्णधार श्रीपद्मनाभ कमलार्चितपादपद्म । लोकैक-पावन परात्पर पापहारिन् श्रीवेङ्कटेश मम देहि करावलम्बम् ॥३॥
Verse
लक्ष्मीपते निगमलक्ष्य निजस्वरूप कामादिदोष-परिहारक बोधदायिन् । दैत्यादिमर्दन जनार्दन वासुदेव श्रीवेङ्कटेश मम देहि करावलम्बम् ॥४॥
Verse
तापत्रयं हर विभो रभसा मुरारे संरक्ष मां करुणया सरसीरुहाक्ष । मच्छिष्य इत्यनुदिनं परिरक्ष विष्णो श्रीवेङ्कटेश मम देहि करावलम्बम् ॥५॥
Verse
श्री-जातरूपनवरत्न-लसत्किरीट कस्तूरिकातिलकशोभिललाटदेश । राकेन्दुबिम्ब-वदनाम्बुज-वारिजाक्ष श्रीवेङ्कटेश मम देहि करावलम्बम् ॥६॥
Verse
वन्दारुलोक-वरदान-वचोविलास रत्नाढ्यहार-परिशोभित-कम्बुकण्ठ । केयूररत्न-सुविभासि-दिगन्तराल श्रीवेङ्कटेश मम देहि करावलम्बम् ॥७॥
Verse
दिव्याङ्गदाञ्चित-भुजद्वय मङ्गलात्मन् केयूरभूषण-सुशोभित-दीर्घबाहो । नागेन्द्र-कङ्कण-करद्वय कामदायिन् श्रीवेङ्कटेश मम देहि करावलम्बम् ॥८॥
Verse
स्वामिन् जगद्धरणवारिधिमध्यमग्नं मामुद्धराद्य कृपया करुणापयोधे । लक्ष्मीं च देहि मम धर्म-समृद्धिहेतुं श्रीवेङ्कटेश मम देहि करावलम्बम् ॥९॥
Verse
दिव्याङ्गराग-परिचर्चित-कोमलाङ्ग पीताम्बरावृत-तनो तरुणार्क-दीप्ते । सत्काञ्चनाभ-परिधान-सुपट्टबन्ध श्रीवेङ्कटेश मम देहि करावलम्बम् ॥१०॥
Verse
रत्नाढ्यदाम-सुनिबद्ध-कटि-प्रदेश माणिक्य-दर्पण-सुसन्निभ-जानुदेश । जङ्घाद्वयेन-परिमोहित-सर्वलोक श्रीवेङ्कटेश मम देहि करावलम्बम् ॥११॥
Verse
लोकैकपावन-सरित्परिशोभिताङ्घ्रे त्वत्पाददर्शन दिने च ममाघमीश । हार्दं तमश्च सकलं लयमाप भूमन् श्रीवेङ्कटेश मम देहि करावलम्बम् ॥१२॥
Verse
कामादि-वैरि-निवहोऽच्युत मे प्रयातः दारिद्र्यमप्यपगतं सकलं दयालो । दीनं च मां समवलोक्य दयार्द्र-दृष्ट्या श्रीवेङ्कटेश मम देहि करावलम्बम् ॥१३॥
Verse
श्रीवेङ्कटेश-पदपङ्कज-षट्पदेन श्रीमन्नृसिंहयतिना रचितं जगत्याम् । ये तत् पठन्ति मनुजाः पुरुषोत्तमस्य ते प्राप्नुवन्ति परमां पदवीं मुरारेः ॥१४॥
Verse
॥इति श्री-शृङ्गेरि-जगद्गुरुणा श्री-नृसिंहभारती-स्वामिना रचितं श्री-वेङ्कटेश-करावलम्बस्तोत्रं सम्पूर्णम्॥
