stotrasangraha
devaiḥ kṛtaṃ rāma-stotram
देवैः कृतं राम-स्तोत्रम्
Verse
अथाभिषिक्तं रामं तु तुष्टुवुः प्रणताः सुराः । रावणाभिधदैत्येन्द्र वधहर्षितमानसाः ॥१॥
Verse
जय दाशरथे सुरार्तिहञ्जय जय दानववंशदाहक । जय देववराङ्गनागणग्रहणव्यग्रकरारिदारक ॥२॥
Verse
तवयद्दनुजेन्द्रनाशनं कवयो वर्णयितुं समुत्सुकाः । प्रलये जगतान्ततीः पुनर्ग्रससे त्वं भुवनेशलीलया ॥३॥
Verse
जय जन्मजरादिदुःखकैः परिमुक्तप्रबलोद्धरोद्धर । जय धर्मकरान्वयाम्बुधौ कृतजन्मन्नजरामराच्युत ॥४॥
Verse
तव देववरस्य नामभिर्बहुपापा अपि ते पवित्रिताः । किमु साधुद्विजवर्यपूर्वकाः सुतनुं मानुषतामुपागताः ॥५॥
Verse
हरविरिञ्चिनुतं तव पादयोर्युगलमीप्सितकामसमृद्धिदम् । हृदि पवित्रयवादिकचिह्नितैः सुरचितं मनसा स्पृहयामहे ॥६॥
Verse
यदि भवान्न दधात्यभयं भुवो मदनमूर्ति तिरस्करकान्तिभृत् । सुरगणा हि कथं सुखिनः पुनर्ननु भवन्ति घृणामय पावन ॥७॥
Verse
यदा यदास्मान्दनुजाहि दुःखदास्तदा तदा त्वं भुवि जन्मभाग्भवेः । अजोऽव्ययोऽपीशवरोऽपि सन्विभो स्वभावमास्थाय निजं निजार्चितः ॥८॥
Verse
मृतसुधासदृशैरघनाशनैः सुचरितैरवकीर्य महीतलम् । अमनुजैर्गुणशंसिभिरीडितः प्रविश चाशु पुनर्हि स्वकं पदम् ॥९॥
Verse
अनादिराद्योजररूपधारी हारी किरीटी मकरध्वजाभः । जयं करोतु प्रसभं हतारिः स्मरारि संसेवितपादपद्मः ॥१०॥
Verse
इत्युक्त्वा ते सुराः सर्वे ब्रह्मेन्द्रप्रमुखा मुहुः । प्रणेमुररिनाशेन प्रीणिता रघुनायकम् ॥११॥
Verse
इति स्तुत्यातिसंहृष्टो रघुनाथो महायशाः । प्रोवाच तान्सुरान्वीक्ष्य प्रणतान्नतकन्धरान् ॥१२॥
Verse
सुरा वृणुत मे यूयं वरं किञ्चित्सुदुर्लभम् । यं कोऽपि देवो दनुजो न यक्षः प्राप सादरः ॥१३॥
Verse
स्वामिन् भगवतः सर्वं प्राप्तमस्माभिरुत्तमम् । यदयं निहतः शत्रुरस्माकं तु दशाननः ॥१४॥
Verse
यदा यदाऽसुरोऽस्माकं बाधां परिदधाति भोः । तदा तदेति कर्तव्यमेतावद्वैरिनाशनम् ॥१५॥
Verse
तथेत्युक्त्वा पुनर्वीरः प्रोवाच रघुनन्दनः ।
Verse
सुराः शृणुत मद्वाक्यमादरेण समन्विताः ॥१६॥
Verse
भवत्कृतं मदीयैर्वैगुणैर्ग्रथितमद्भुतम् । स्तोत्रं पठिष्यति मुहुः प्रातर्निशि सकृन्नरः ॥१७॥
Verse
तस्य वैरि पराभूतिर्न भविष्यति दारुणा । न च दारिद्र्यसंयोगो न च व्याधिपराभवौ ॥१८॥
Verse
मदीयचरणद्वन्द्वे भक्तिस्तेषां तु भूयसी । भविष्यति मुदायुक्ते स्वान्ते पुंसां तु पाठतः ॥१९॥
Verse
इत्युक्त्वा सोऽभवत्तूष्णीं नरदेवशिरोमणिः । सुराः सर्वे प्रहृष्टास्ते ययुर्लोकं स्वकं स्वकम् ॥२०॥
Verse
॥इति श्रीपद्मपुराणे पातालखण्डे शेषवात्स्यायनसंवादे रामाश्वमेधे अगस्त्यसमागमोनाम पञ्चमोऽध्यायान्तर्गतं देवैः कृतं श्री-राम-स्तोत्रं सम्पूर्णम्॥
