stotrasangraha
candrāṣṭaviṃśatināmastotram
चन्द्राष्टविंशतिनामस्तोत्रम्
Verse
चन्द्रस्य शृणु नामानि शुभदानि महीपते । यानि श्रुत्वा नरो दुःखान्मुच्यते नात्र संशयः ॥१॥
Verse
सुधाकरो विधुः सोमो ग्लौरब्जः कुमुदप्रियः । लोकप्रियः शुभ्रभानुश्चन्द्रमा रोहिणीपतिः ॥२॥
Verse
शशी हिमकरो राजा द्विजराजो निशाकरः । आत्रेय इन्दुः शीतांशुरोषधीशः कलानिधिः ॥३॥
Verse
जैवातृको रमाभ्राता क्षीरोदार्णवसम्भवः । नक्षत्रनायकः शम्भुशिरश्चूडामणिर्विभुः ॥४॥
Verse
तापहर्ता नभोदीपो नामान्येतानि यः पठेत् । प्रत्यहं भक्तिसंयुक्तस्तस्य पीडा विनश्यति ॥५॥
Verse
तद्दिने च पठेद् यस्तु लभेत्सर्वं समीहितम् । ग्रहादीनां च सर्वेषां भवेच्चन्द्रबलं सदा ॥६॥
Verse
॥इति श्री-चन्द्राष्टविंशतिनामस्तोत्रं सम्पूर्णम्॥
