dohAvalI
yuvāvasthā
युवावस्था
Verse
तरुनापा फिर आइया, पाँच भूत लै संग । जोबन मद मातो रहै, पियै बिषय को रंग ॥
Verse
** तरुनापा भया सकल सरीरा । अंधा भया बिसरि हरि हीरा ॥
Verse
बिषय बासना के मद मातो । अहं आपदा के रंग रातो ॥
Verse
मूँछ मरोड़ अकड़ता डोलै । काहू तें मुख मीठ न बोलै ॥
Verse
कहै बराबर मेरे नाहीं । बुद्धिवान कोइ या जग माहीं ॥
Verse
मैं बलवन्त सबन पर भारी । द्रब्य कमाऊँ नरन अगारी ॥
Verse
महा दुखी सुख मान लियो है । मोह अमल अज्ञान पियो है ॥
Verse
भया कुटम्बी जब सुख कैसा । सहजो बन्ध पड़ै कोइ जैसा ॥
Verse
सुत पुत्री उपजै मरि जावै । सोच सोच तन मन दुख पावै ॥
Verse
== द्रब्यहीन भटकत फिरै, ज्यों सराय को स्वान । झिड़कि दियो जेहि घर गया, सहजो रह्यौ न मान ॥
Verse
== द्रब्यहीन सब को मुख जोहै । जाति बरन देखै नहिं को है ॥
Verse
निहुरि निहुरि ज्यों बन्दर नाचै । राम तजो इन बातन राचै ॥
Verse
बेटी ब्याह जोग घर माहीं । और भूखे सब कित सूँ खाहीं ॥
Verse
कहै हवेली एक बनाऊँ । अपने कुल में इज्जत पाऊँ ॥
Verse
कलपै बहुत सीस धुनि माथा । सहजो दुखी कुटॅब के साथा ॥
Verse
आवै ना सतसंगति माहीं । कुटँब जाल छुटकारा नाहीं ॥
Verse
हरि की भक्ति नहीं लौ लाई । दारा सुत धन की गुमराई ॥
Verse
दुख धन्धा करि जन्म गँवाया । सहज सहज बूढ़ापन आया ॥
