dohAvalI
pīlū
पीलू
Verse
अब का सोवै सखि ।
Verse
जाग जाग । रैन बिहात जातरस-बिरियाँ, चोलीके बँद ताग ताग ॥
Verse
जोबन उमँग सकल कर बौरी आन-कान सब त्याग त्याग । ललितकिसोरी लूट अनँदवा, पीतमके गर लाग लाग ॥
Verse
लटक लटक मनमोहन आवनि । झूमि झूमि पग धरत भूमिपर गति मातंग लजावनि ॥
Verse
गोखुर-रेनुअंग अँग मंडित उपमा दृग सकुचावनि । नव घनपै मनु झीन बदरिया, सोभा-रस बरसावनि ॥
Verse
बिगसति मुखलौं कानि दामिनी दसनावलि दमकावनि । बीच-बीच घनघोर माधुरी, मधुरी बेन बजावनि ॥
Verse
मुकतमाल उर लसी छबीली, मनु बग-पाँति सुहावन । बिंदु गुलाल गुपाल-कपोलन, इंद्रबधू छबि छावनि ॥
Verse
रुनन झुनन किंकिनि धुनि मानों हंसनिकी चुहचावनि । बिलुलित अलक धूरि धूसरतन, गमन लोटि भुव आवनि ॥
Verse
जँघिया लसनि कनक कछनी पै, पटुका ऐंचि बँधावनि । पीताम्बर फहरानि मुकुतछबि, नटवर बेस बनावनि ॥
Verse
हलनि बुलाक अधर तिरछौंही बीरी सुरँग रचावनि । ललितकिसोरी फूल-झरनियाँ मधुर-मधुर बतरावनि ॥
