aSTottaranAma
śrībhairavyaṣṭottaraśatanāmastotram
श्रीभैरव्यष्टोत्तरशतनामस्तोत्रम्
Verse
अथवा श्रीत्रिपुरभैरवी अष्टोत्तरशतनामस्तोत्रम् । ॥ श्रीगणेशाय नमः ॥
Verse
॥ श्रीउमामहेश्वराभ्यां नमः ॥
Verse
॥ अथ भैरव्यष्टोत्तरशतनामस्तोत्रप्रारंभः ॥
Verse
श्रीदेव्युवाच ।
Verse
कैलासवासिन्भगवन्प्राणेश्वर कृपानिधे । भक्तवत्सल भैरव्या नाम्नामष्टोत्तरं शतम् ॥१॥
Verse
न श्रुतं देवदेवेश वद मां दीनवत्सल ।
Verse
श्रीशिव उवाच । शृणु प्रिये महागोप्यं नाम्नामष्टोत्तरं शतम् ॥२॥
Verse
भैरव्याः शुभदं सेव्यं सर्वसम्पत्प्रदायकम् । यस्यानुष्ठानमात्रेण किं न सिद्ध्यति भूतले ॥३॥
Verse
ॐ भैरवी भैरवाराध्या भूतिदा भूतभावना । कार्य्या ब्राह्मी कामधेनुः सर्वसम्पत्प्रदायिनी ॥४॥
Verse
त्रैलोक्यवन्दिता देवी महिषासुरमर्द्दिनी । मोहघ्नी मालतीमाला महापातकनाशिनी ॥५॥
Verse
क्रोधिनी क्रोधनिलया क्रोधरक्तेक्षणा कुहूः । त्रिपुरा त्रिपुराधारा त्रिनेत्रा भीमभैरवी ॥६॥
Verse
देवकी देवमाता च देवदुष्टविनाशिनी । दामोदरप्रिया दीर्घा दुर्गा दुर्गतिनाशिनी ॥७॥
Verse
लम्बोदरी लम्बकर्णा प्रलम्बितपयोधरा । प्रत्यङ्गिरा प्रतिपदा प्रणतक्लेशनाशिनी ॥८॥
Verse
प्रभावती गुणवती गणमाता गुहेश्वरी । क्षीराब्धितनया क्षेम्या जगत्त्राणविधायिनी ॥९॥
Verse
महामारी महामोहा महाक्रोधा महानदी । महापातकसंहर्त्री महामोहप्रदायिनी ॥१०॥
Verse
विकराला महाकाला कालरूपा कलावती । कपालखट्वाङ्गधरा खड्गखर्प्परधारिणी ॥११॥
Verse
कुमारी कुङ्कुमप्रीता कुङ्कुमारुणरञ्जिता । कौमोदकी कुमुदिनी कीर्त्त्या कीर्त्तिप्रदायिनी ॥१२॥
Verse
नवीना नीरदा नित्या नन्दिकेश्वरपालिनी । घर्घरा घर्घरारावा घोरा घोरस्वरूपिणी ॥१३॥
Verse
कलिघ्नी कलिधर्मघ्नी कलिकौतुकनाशिनी । किशोरी केशवप्रीता क्लेशसङ्घनिवारिणी ॥१४॥
Verse
महोत्तमा महामत्ता महाविद्या महीमयी । महायज्ञा महावाणी महामन्दरधारिणी ॥१५॥
Verse
मोक्षदा मोहदा मोहा भुक्तिमुक्तिप्रदायिनी । अट्टाट्टहासनिरता कङ्कणन्नूपुरधारिणी ॥१६॥
Verse
दीर्घदंष्ट्रा दीर्घमुखी दीर्घघोणा च दीर्घिका । दनुजान्तकरी दुष्टा दुःखदारिद्र्यभञ्जिनी ॥१७॥
Verse
दुराचारा च दोषघ्नी दमपत्नी दयापरा । मनोभवा मनुमयी मनुवंशप्रवर्द्धिनी ॥१८॥
Verse
श्यामा श्यामतनुः शोभा सौम्या शम्भुविलासिनी । इति ते कथितं दिव्यं नाम्नामष्टोत्तरं शतम् ॥१९॥
Verse
भैरव्या देवदेवेश्यास्तव प्रीत्यै सुरेश्वरि । अप्रकाश्यमिदं गोप्यं पठनीयं प्रयत्नतः ॥२०॥
Verse
देवीं ध्यात्वा सुरां पीत्वा मकारपञ्चकैः प्रिये । पूजयेत्सततं भक्त्या पठेत्स्तोत्रमिदं शुभम् ॥२१॥
Verse
षण्मासाभ्यंतरे सोऽपि गणनाथसमो भवेत् । किमत्र बहुनोक्तेन त्वदग्रे प्राणवल्लभे ॥२२॥
Verse
सर्वं जानासि सर्वज्ञे पुनर्मां परिपृच्छसि । न देयं परशिष्येभ्यो निन्दकेभ्यो विशेषतः ॥२३॥
Verse
॥ इति श्रीभैरव्यष्टोत्तरशतनामस्तोत्रं सम्पूर्णम् ॥
