aSTottaranAma
gauryaṣṭottaraśatanāmastotram
गौर्यष्टोत्तरशतनामस्तोत्रम्
Verse
दत्तात्रेयेण गौर्यष्टोत्तरशतनामस्तोत्रोपदेशवर्णनम् ।
Verse
अथ गौर्यष्टोत्तरशतनामस्तोत्रम् ।
Verse
इति श्रुत्वा कथां पुण्यां गौरीवीर्यविचित्रिताम् । अपृच्छद्भार्गवो भूयो दत्तात्रेयं महामुनिम् ॥१॥
Verse
भगवन्नद्भुततमं गौर्या वीर्यमुदाहृतम् । शृण्वतो न हि मे तृप्तिः कथां ते मुखनिःसृताम् ॥२॥
Verse
गौर्या नामाष्टशतकं यच्छच्यै धिषणो जगौ । तन्मे कथय यच्छ्रोतुं मनो मेऽत्यन्तमुत्सुकम् ॥३॥
Verse
भार्गवेणेत्थमापृष्टो योगिराडत्रिनन्दनः । अष्टोत्तरशतं नाम्नां प्राह गौर्या दयानिधिः ॥४॥
Verse
जामदग्न्य शृणु स्तोत्रं गौरीनामभिरङ्कितम् । मनोहरं वाञ्छितदं महाऽऽपद्विनिवारणम् ॥५॥
Verse
स्तोत्रस्याऽस्य ऋषिः प्रोक्त अङ्गिराश्छन्द ईरितः । अनुष्टुप् देवता गौरी आपन्नाशाय यो जपेत् ॥६॥
Verse
ह्रां ह्रीं इत्यादि विन्यस्य ध्यात्वा स्तोत्रमुदीरयेत् ॥
Verse
॥ध्यानम् ॥
Verse
सिंहसंस्थां मेचकाभां कौसुम्भांशुकशोभिताम् ॥७॥
Verse
खड्गं खेटं त्रिशूलञ्च मुद्गरं बिभ्रतीं करैः । चन्द्रचूडां त्रिनयनां ध्यायेत्गौरीमभीष्टदाम् ॥८॥
Verse
॥स्तोत्रम् ॥
Verse
ॐ गौरी गोजननी विद्या शिवा देवी महेश्वरी । नारायणाऽनुजा नम्रभूषणा नुतवैभवा ॥९॥
Verse
त्रिनेत्रा त्रिशिखा शम्भुसंश्रया शशिभूषणा । शूलहस्ता श्रुतधरा शुभदा शुभरूपिणी ॥१०॥
Verse
उमा भगवती रात्रिः सोमसूर्याऽग्निलोचना । सोमसूर्यात्मताटङ्का सोमसूर्यकुचद्वयी ॥११॥
Verse
अम्बा अम्बिका अम्बुजधरा अम्बुरूपाऽऽप्यायिनी स्थिरा । शिवप्रिया शिवाङ्कस्था शोभना शुम्भनाशिनी ॥१२॥
Verse
खड्गहस्ता खगा खेटधरा खाऽच्छनिभाकृतिः । कौसुम्भचेला कौसुम्भप्रिया कुन्दनिभद्विजा ॥१३॥
Verse
काली कपालिनी क्रूरा करवालकरा क्रिया । काम्या कुमारी कुटिला कुमाराम्बा कुलेश्वरी ॥१४॥
Verse
मृडानी मृगशावाक्षी मृदुदेहा मृगप्रिया । मृकण्डुपूजिता माध्वीप्रिया मातृगणेडिता ॥१५॥
Verse
मातृका माधवी माद्यन्मानसा मदिरेक्षणा । मोदरूपा मोदकरी मुनिध्येया मनोन्मनी ॥१६॥
Verse
पर्वतस्था पर्वपूज्या परमा परमार्थदा । परात्परा परामर्शमयी परिणताखिला ॥१७॥
Verse
पाशिसेव्या पशुपतिप्रिया पशुवृषस्तुता । पश्यन्ती परचिद्रूपा परीवादहरा परा ॥१८॥
Verse
सर्वज्ञा सर्वरूपा सा सम्पत्तिः सम्पदुन्नता । आपन्निवारिणी भक्तसुलभा करुणामयी ॥१९॥
Verse
कलावती कलामूला कलाकलितविग्रहा । गणसेव्या गणेशाना गतिर्गमनवर्जिता ॥२०॥
Verse
ईश्वरीशानदयिता शक्तिः शमितपातका । पीठगा पीठिकारूपा पृषत्पूज्या प्रभामयी ॥२१॥
Verse
महमाया मतङ्गेष्टा लोकालोका शिवाङ्गना ॥
Verse
॥फलश्रुतिः ॥
Verse
एतत्तेऽभिहितं राम ! स्तोत्रमत्यन्तदुर्लभम् ॥२२॥
Verse
गौर्यष्टोत्तरशतनामभिः सुमनोहरम् । आपदम्भोधितरणे सुदृढप्लवरूपकम् ॥२३॥
Verse
एतत् प्रपठतां नित्यमापदो यान्ति दूरतः । गौरीप्रसादजननमात्मज्ञानप्रदं नृणाम् ॥२४॥
Verse
भक्त्या प्रपठतां पुंसां सिध्यत्यखिलमीहितम् । अन्ते कैवल्यमाप्नोति सत्यं ते भार्गवेरितम् ॥२५॥
