aSTakam
śrīsāradādevyaṣṭakam
श्रीसारदादेव्यष्टकम्
Verse
देवि प्रसन्नवदने करुणावतारे दिव्योज्ज्वलद्युतिमयि त्रिजगज्जनित्रि । कल्याणकारिणि वराभयदानशीले मातर्विराज सततं मम हृत्सरोजे ॥१॥
Verse
ब्रह्मस्वरूपिणि शिवे शुभदे शरण्ये चैतन्यदायिनि भवाम्बुधिपारनेत्रि । शान्तिप्रदे सुविमले सकलार्तिनाशे मातर्विराज सततं मम हृत्सरोजे ॥२॥
Verse
वेदान्तवेद्यपरतत्त्वसुमूर्तरूपा आद्यन्तमध्यरहिता श्रुतिसारभूता । एकाऽद्वया हि परमा प्रकृतिस्त्वमाद्या मातर्विराज सततं मम हृत्सरोजे ॥३॥
Verse
मायामनुष्यतनुधारिणि विश्ववन्द्ये लीलाविलासकरि चिन्मयदिव्यरूपे । सृष्टिस्थितिप्रलयकारिणि विश्वशक्ते मातर्विराज सततं मम हृत्सरोजे ॥४॥
Verse
वैराग्यभक्तिवरदा भवतारिणि त्वं माङ्गल्यशान्तिनिलया ह्यमृतस्वरूपा । विद्या परा त्रिजगदुद्धरणैकसेतुर्मातर्विराज सततं मम हृत्सरोजे ॥५॥
Verse
विश्वात्मिके परमपावनसौम्यरूपे मोहान्धकारपरिहारिणि मोक्षदात्रि । सर्वाश्रये भयहरे जगदेकगम्ये मातर्विराज सततं मम हृत्सरोजे ॥६॥
Verse
श्रीरामकृष्णमयजीवित ईश्वरी त्वं तद्भावविग्रहमयी तदभिन्नसत्ता । श्रीरामकृष्णमयपावकदीप्तिशक्ते मातर्विराज सततं मम हृत्सरोजे ॥७॥
Verse
सच्चित्सुखानुभवदायिनि बोधरूपे विश्वेश्वरि प्रणतपालिनि सिद्धिदात्रि । श्रीसारदे भुवनमङ्गलदिव्यमूर्ते मातर्विराज सततं मम हृत्सरोजे ॥८॥
