aSTakam
śrīrāmakṛṣṇāṣṭakam
श्रीरामकृष्णाष्टकम्
Verse
विश्वस्य धाता पुरुषस्त्वमाद्यो- ऽव्यक्तेन रूपेण ततं त्वयेदम् । हे रामकृष्ण त्वयि भक्तिहीने कृपाकटाक्षं कुरु देव नित्यम् ॥१॥
Verse
त्वं पासि विश्वं सृजसि त्वमेव त्वमादिदेवो विनिहंसि सर्वम् । हे रामकृष्ण त्वयि भक्तिहीने कृपाकटाक्षं कुरु देव नित्यम् ॥२॥
Verse
मायां समाश्रित्य करोषि लीलां भक्तान् समुद्धर्तुमनन्तमूर्तिः । हे रामकृष्ण त्वयि भक्तिहीने कृपाकटाक्षं कुरु देव नित्यम् ॥३॥
Verse
विधृत्यरूपं नरवत्त्वया वै विज्ञापितो धर्म इहातिगुह्यः । हे रामकृष्ण त्वयि भक्तिहीने कृपाकटाक्षं कुरु देव नित्यम् ॥४॥
Verse
तपोऽथ ते त्यागमदृष्टपूर्वम् दृष्ट्वा नमस्यन्ति कथं न विज्ञाः । हे रामकृष्ण त्वयि भक्तिहीने कृपाकटाक्षं कुरु देव नित्यम् ॥५॥
Verse
श्रुत्वात्र ते नाम भवन्ति भक्ता दृष्ट्वा वयं त्वां न तु भक्तियुक्ताः । हे रामकृष्ण त्वयि भक्तिहीने कृपाकटाक्षं कुरु देव नित्यम् ॥६॥
Verse
सत्यं विभुं शान्तमनादिरूपं प्रसादये त्वामजमन्तशून्यम् । हे रामकृष्ण त्वयि भक्तिहीने कृपाकटाक्षं कुरु देव नित्यम् ॥७॥
Verse
जानामि तत्त्वं न हि देशिकेन्द्रं किं ते स्वरूपं किमु भावजातम् । हे रामकृष्ण त्वयि भक्तिहीने कृपाकटाक्षं कुरु देव नित्यम् ॥८॥
