aSTakam
mūkāmbikā aṣṭakam
मूकाम्बिका अष्टकम्
Verse
नमस्ते जगद्धात्रि सद्ब्रह्मरूपे नमस्ते हरोपेन्द्रधात्रादिवन्द्ये । नमस्ते प्रपन्नेष्टदानैकदक्षे नमस्ते महालक्ष्मि कोलापुरेशि ॥१॥
Verse
विधिः कृत्तिवासा हरिर्विश्वमेतत् सृजत्यत्तिपातीतियत्तद्प्रसिद्धं कृपावलोकनादेव ते शक्तिरूपे नमस्ते महालक्ष्मि कोलापुरेशि ॥२॥
Verse
त्वया मायया व्याप्तमेतत्समस्तं द्रुतं लीयते देवि कुक्षौ हि विश्वम् । स्थितां बुद्धिरूपेण सर्वत्र जन्तौ नमस्ते महालक्ष्मि कोलापुरेशि ॥३॥
Verse
यया भक्तवर्गा हि लक्ष्यन्त एते त्वयाऽत्र प्रकामं कृपापूर्णदृष्ट्या । अतो गीयसे देवि लक्ष्मीरिति त्वम् नमस्ते महालक्ष्मि कोलापुरेशि ॥४॥
Verse
पुनर्वाक्पटुत्वादिहीना हि मूका नरास्तैर्निकामं खलु प्रार्थ्यसे यत् निजेष्टाप्तये तेन मूकाम्बिका त्वं नमस्ते महालक्ष्मि कोलापुरेशि ॥५॥
Verse
यदद्वैतरूपात्परब्रह्मणस्त्वं समुत्था पुनर्विश्वलीलोद्यमस्था । तदाहुर्जनास्त्वां च गौरी कुमारी नमस्ते महालक्ष्मि कोलापुरेशि ॥६॥
Verse
हरेशादि देहोत्थतेजोमयप्र- स्फुरच्चक्रराजाख्यलिङ्गस्वरूपे । महायोगि कोलर्षि हृत्पद्मगेहे नमस्ते महालक्ष्मि कोलापुरेशि ॥७॥
Verse
नमः शंखचक्राभयाभीष्टहस्ते नमस्तेऽम्बिके गौरि पद्मासनस्थे । नमः स्वर्णवर्णे प्रसन्ने शरण्ये नमस्ते महालक्ष्मि कोलापुरेशि ॥८॥
