Fetching Data .

Loading verse structure and chapter context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

aSTakam

tārāṣṭakam

ताराष्टकम्

Verse

मातर्नीलसरस्वति प्रणमतां सौभाग्यसंपत्प्रदे प्रत्यालीढपदस्थिते शिवहृदि स्मेराननांभोरुहे । फुल्लेन्दीवरलोचनत्रययुते कर्त्री कपालोत्पले खड्गञ्चादधती त्वमेव शरणं त्वामीश्वरीमाश्रये ॥१॥

Verse

वाचामीश्वरि भक्तकल्पलतिके सर्वाथसिद्धिप्रदे गद्यप्राकृतपद्यजातरचनासर्वस्वसिद्धिप्रदे । नीलेन्दीवरलोचनत्रययुते कारुण्यवारांनिधे सौभाग्यामृतवर्षणेनकृपया सिञ्च त्वमस्मादृशम् ॥२॥

Verse

सर्वे गर्वसमूहपूरिततनो सर्पादिवेषोज्ज्वले व्याघ्रत्वक्परिवीतसुन्दरकटिव्याधूतघण्टाङ्किते । सद्यःकृत्तगलद्रजःपरिमिलन्मुण्डद्वयीमूर्धज- ग्रन्थिश्रेणिनृमुण्डदामललिते भीमे भयं नाशय ॥३॥

Verse

मायानङ्गविकाररूपललनाबिन्द्वर्धचन्द्रात्मिके हुंफट्कारमयी त्वमेव शरणं मन्त्रात्मिके मादृशाम् । मूर्तिस्ते जननि त्रिधामघटिता स्थूलातिसूक्ष्मा परा वेदानाम् न हि गोचरा कथमपि प्राप्तां नु तामाश्रये ॥४॥

Verse

यत्पादांबुजसेवया सुकृतिनो गच्छन्ति सायुज्यतां तस्य स्त्री परमेश्वरि त्रिनयना ब्रह्मादिसाम्यात्मनः । संसारांबुधिमज्जने पटुतनू देवेन्द्रमुख्यान् सुरान् मातस्त्वत्पदसेवने हि विमुखो यो मन्दधीः सेवते ॥५॥

Verse

मातस्त्वत्पदपङ्कजद्वयरजोमुद्राङ्ककोटीरिण- स्ते देवा जयसंगरे विजयिनो निश्शङ्कमङ्के गताः । देवोऽहं भुवने न मे सम इति स्पर्धां वहन्तः परे तत्तुल्यं नियतं यथासुभिरमी नाशं व्रजन्ति स्वयम् ॥६॥

Verse

त्वन्नामस्मरणात् पलायनपरा द्रष्टुं च शक्ता न ते भूतप्रेतपिशाचराक्षसगणा यक्षाश्च नागाधिपाः । दैत्या दानवपुङ्गवाशच खचरा व्याघ्रादिका जन्तवो डाकिन्यः कुपितान्तकाश्च मनुजं मातः क्षणं भूतले ॥७॥

Verse

लक्ष्मीः सिद्धिगणाश्च पादुकमुखा सिद्धिस्तथा वारिणः स्तंभाश्चापि रणाङ्गणॆ गजघटा स्तंभस्तथा मोहनम् । मातस्त्वत्पदसेवया खलु नृणां सिद्ध्यन्ति ते ते गुणाः कान्तिः कान्तमनोभवस्य भवति क्षुद्रोऽपि वाचस्पतिः ॥८॥

Verse

ताराष्टकमिदं रम्यं भक्तिमान् यः पठेन्नरः । प्रातर्मध्याह्नकाले च सायाह्ने नियतः शुचिः ॥९॥

Verse

लभते कवितां दिव्यां सर्वशास्त्रार्थविद्भवेत् । लक्ष्मीमनश्वरां प्राप्य भुक्त्वा भोगान् यथेप्सितान् ॥१०॥

Verse

कीर्तिं कान्तिं च नैरुज्यं सर्वेषां प्रियतां व्रजेत् । विख्यातिं चापि लोकेषु प्राप्यान्ते मोक्षमाप्नुयात् ॥११॥

aṃbāṣṭakam
vārāhyanugrahāṣṭakam

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms