stotrasangraha
śukracaturviṃśatināmastotram
शुक्रचतुर्विंशतिनामस्तोत्रम्
Verse
शृण्वन्तु मुनयः सर्वे शुक्रस्तोत्रमिदं शुभम् । रहस्यं सर्वभूतानां शुक्रप्रीतिकरं शुभम्॥ १ ॥१॥
Verse
येषां सङ्कीर्तनान्नित्यं सर्वान् कामानवाप्नुयात् । तानि शुक्रस्य नामानि कथयामि शुभानि च ॥२॥
Verse
शुक्रः शुभग्रहः श्रीमान् वर्षकृद् वर्षविघ्नकृत् । तेजोनिधिर्ज्ञानदाता योगी योगविदां वरः ॥३॥
Verse
दैत्यसञ्जीवनो धीरो दैत्यनेतोशना कविः । नीतिकर्ता ग्रहाधीशो विश्वात्मा लोकपूजितः ॥४॥
Verse
शुक्लमाल्याम्बरधरः श्रीचन्दनसमप्रभः । अक्षमालाधरः काव्यः तपोमूर्तिर्धनप्रदः ॥५॥
Verse
चतुर्विंशतिनामानि अष्टोत्तरशतं यथा । देवस्याग्रे विशेषेण पूजां कृत्वा विधानतः ॥६॥
Verse
य इदं पठति स्तोत्रं भार्गवस्य महात्मनः । विषमस्थोऽपि भगवान् तुष्टः स्यान्नात्र संशयः ॥७॥
Verse
स्तोत्रं भृगोरिदमनन्तगुणप्रदं यो भक्त्या पठेच्च मनुजो नियतः शुचिः सन् । प्राप्नोति नित्यमतुलां श्रियमीप्सितार्थान् राज्यं समस्तधनधान्ययुतां समृद्धिम् ॥८॥
Verse
॥इति श्री-स्कान्दपुराणे श्री-शुक्रचतुर्विंशतिनामस्तोत्रं सम्पूर्णम्॥
