Preparing Your Space .

Settling the page into your current context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

stotrasangraha

rāmabhujaṅgaprayātastotram

रामभुजङ्गप्रयातस्तोत्रम्

Verse

विशुद्धं परं सच्चिदानन्द-रूपं गुणाधारमाधार-हीनं वरेण्यम् । महान्तं विभान्तं गुहान्तं गुणान्तं सुखान्तं स्वयं धाम रामं प्रपद्ये ॥१॥

Verse

शिवं नित्यमेकं विभुं तारकाख्यं सुखाकारमाकार-शून्यं सुमान्यम् । महेशं कलेशं सुरेशं परेशं नरेशं निरीशं महीशं प्रपद्ये ॥२॥

Verse

यदाऽवर्णयत् कर्ण-मूलेऽन्त-काले शिवो राम रामेति रामेति काश्याम् । तदेकं परं तारक-ब्रह्म-रूपं भजेऽहं भजेऽहं भजेऽहं भजेऽहम् ॥३॥

Verse

महारत्न-पीठे शुभे कल्प-मूले सुखासीनमादित्य-कोटि-प्रकाशम् । सदा जानकी-लक्ष्मणोपेतमेकं सदा रामचन्द्रं भजेऽहं भजेऽहम् ॥४॥

Verse

क्वणद्रत्न-मञ्जीर-पादारविन्दं लसन्मेखला-चारु-पीताम्बराढ्यम् । महारत्न-हारोल्लसत्-कौस्तुभाङ्गं नदच्चञ्चरी-मञ्जरी-लोल-मालम् ॥५॥

Verse

लसच्चन्द्रिका-स्मेर-शोणाधराभं समुद्यत्-पतङ्गेन्दु-कोटि-प्रकाशम् । नमद्-ब्रह्म-रुद्रादि-कोटीर-रत्न- स्फुरत्-कान्ति-नीराजना-ऽऽराधिताङ्घ्रिम् ॥६॥

Verse

पुरः प्राञ्जलीनाञ्जनेयादि-भक्तान् स्व-चिन्मुद्रया भद्रया बोधयन्तम् । भजेऽहं भजेऽहं सदा रामचन्द्रं त्वदन्यं न मन्ये न मन्ये न मन्ये ॥७॥

Verse

यदा मत्समीपं कृतान्तः समेत्य प्रचण्ड-प्रतापैर्-भटैर्-भीषयेन्माम् । तदाऽऽविष्करोषि त्वदीयं स्वरूपं तदापत्-प्रणाशं स-कोदण्ड-बाणम् ॥८॥

Verse

निजे मानसे मन्दिरे सन्निधेहि प्रसीद प्रसीद प्रभो रामचन्द्र । स-सौमित्रिणा कैकयी-नन्दनेन स्व-शक्त्याऽनुभक्त्या च संसेव्यमान ॥९॥

Verse

स्वभक्ताग्रगण्यैः कपीशैर्-महीशैर्- अनीकैरनेकैश्च राम प्रसीद । नमस्ते नमोऽस्त्वीश राम प्रसीद प्रशाधि प्रशाधि प्रकाशं प्रभो माम् ॥१०॥

Verse

त्वमेवासि दैवं परं मे यदेकं सुचैतन्यमेतत् त्वदन्यं न मन्ये । यतोऽभूदमेयं वियद्-वायु-तेजो- जलोर्व्यादि-कार्यं चरं चाचरं च ॥११॥

Verse

नमः सच्चिदानन्द-रूपाय तस्मै नमो देव-देवाय रामाय तुभ्यम् । नमो जानकी-जीवितेशाय तुभ्यं नमः पुण्डरीकायताक्षाय तुभ्यम् ॥१२॥

Verse

नमो भक्ति-युक्तानुरक्ताय तुभ्यं नमः पुण्य-पुञ्जैक-लभ्याय तुभ्यम् । नमो वेद-वेद्याय चाऽऽद्याय पुंसे नमः सुन्दरायेन्दिरा-वल्लभाय ॥१३॥

Verse

नमो विश्व-कर्त्रे नमो विश्व-हर्त्रे नमो विश्व-भोक्त्रे नमो विश्व-मात्रे । नमो विश्व-नेत्रे नमो विश्व-जेत्रे नमो विश्व-पित्रे नमो विश्व-मात्रे ॥१४॥

Verse

नमस्ते नमस्ते समस्त-प्रपञ्च- प्रभाग-प्रवीण प्रमाण-प्रवीण । मदीयं मनस्-त्वत्-पद-द्वन्द्व-सेवां विधातुं प्रवृत्तं सुचैतन्य-सिद्ध्यै ॥१५॥

Verse

शिलाऽपि त्वदङ्घ्रि-क्षमा-सङ्गि-रेणु- प्रसादाद्धि चैतन्यमाधत्त राम । नरस्-त्वत्पद-द्वन्द्व-सेवा-विधानात् सुचैतन्यमेतीति किं चित्रमद्य ॥१६॥

Verse

पवित्रं चरित्रं विचित्रं त्वदीयं नरा ये स्मरन्त्यन्वहं रामचन्द्र । भवन्तं भवान्तं भरन्तं भजन्तो लभन्ते कृतान्तं न पश्यन्त्यतोऽन्ते ॥१७॥

Verse

स पुण्यः स गण्यः शरण्यो ममायं नरो वेद यो देव-चूडामणिं त्वाम् । सदाकारमेकं चिदानन्द-रूपं मनो-वागगम्यं परं धाम राम ॥१८॥

Verse

प्रचण्ड-प्रताप-प्रभावाभिभूत- प्रभूतारि-वीर प्रभो रामचन्द्र । बलं ते कथं वर्ण्यतेऽतीव बाल्ये यतोऽखण्डि चण्डीश-कोदण्ड-दण्डः ॥१९॥

Verse

दशग्रीवमुग्रं सपुत्रं समित्रं सरिद्-दुर्ग-मध्यस्थ-रक्षो-गणेशम् । भवन्तं विना राम वीरो नरो वा- ऽसुरो वाऽमरो वा जयेत् कस्-त्रिलोक्याम् ॥२०॥

Verse

सदा राम रामेति रामामृतं ते सदाराममानन्द-निष्यन्द-कन्दम् । पिबन्तं नमन्तं सुदन्तं हसन्तं हनूमन्तमन्तर्भजे तं नितान्तम् ॥२१॥

Verse

सदा राम रामेति रामामृतं ते सदाराममानन्द-निष्यन्द-कन्दम् । पिबन्नन्वहं नन्वहं नैव मृत्योर्- बिभेमि प्रसादादसादात् तवैव ॥२२॥

Verse

असीता-समेतैरकोदण्ड-भूषैर्- असौमित्रि-वन्द्यैरचण्ड-प्रतापैः । अलङ्केश-कालैरसुग्रीव-मित्रैर्- अरामाभिधेयैरलं दैवतैर्नः ॥२३॥

Verse

अवीरासन-स्थैरचिन्मुद्रिकाढ्यैर्- अभक्ताञ्जनेयादि-तत्त्व-प्रकाशैः । अमन्दार-मूलैरमन्दार-मालैर्- अरामाभिधेयैरलं दैवतैर्नः ॥२४॥

Verse

असिन्धु-प्रकोपैरवन्द्य-प्रतापैर्- अबन्धु-प्रयाणैरमन्द-स्मिताढ्यैः । अदण्ड-प्रवासैरखण्ड-प्रबोधैर्- अरामाभिधेयैरलं दैवतैर्नः ॥२५॥

Verse

हरे राम सीतापते रावणारे खरारे मुरारेऽसुरारे परेति । लपन्तं नयन्तं सदा-कालमेवं समालोकयाऽऽलोकयाऽशेष-बन्धो ॥२६॥

Verse

नमस्ते सुमित्रा-सुपुत्राभिवन्द्य नमस्ते सदा कैकयी-नन्दनेड्य । नमस्ते सदा वानराधीश-वन्द्य नमस्ते नमस्ते सदा रामचन्द्र ॥२७॥

Verse

प्रसीद प्रसीद प्रचण्ड-प्रताप प्रसीद प्रसीद प्रचण्डारि-काल । प्रसीद प्रसीद प्रपन्नानुकम्पिन् प्रसीद प्रसीद प्रभो रामचन्द्र ॥२८॥

Verse

भुजङ्ग-प्रयातं परं वेद-सारं मुदा रामचन्द्रस्य भक्त्या च नित्यम् । पठन् सन्ततं चिन्तयन् स्वान्तरङ्गे स एव स्वयं रामचन्द्रः स धन्यः ॥२९॥

Verse

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य श्रीमच्छङ्करभगवतः कृतौ श्री-रामभुजङ्गप्रयातस्तोत्रं सम्पूर्णम्॥

ahalyākṛta-rāmastotram
rāmastavarājastotram

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms