Preparing Your Space .

Settling the page into your current context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

stotrasangraha

lakṣmī-nṛsiṃha-karuṇārasa-stotram

लक्ष्मी-नृसिंह-करुणारस-स्तोत्रम्

Verse

श्रीमत्-पयोनिधि-निकेतन चक्रपाणे भोगीन्द्र-भोग-मणि-राजित-पुण्य-मूर्ते । योगीश शाश्वत शरण्य भवाब्धि-पोत लक्ष्मी-नृसिंह मम देहि करावलम्बम् ॥१॥

Verse

ब्रह्मेन्द्र-रुद्र-मरुदर्क-किरीट-कोटि- सङ्घट्टिताङ्घ्रि-कमलामल-कान्ति-कान्त । लक्ष्मी-लसत्-कुच-सरोरुह-राजहंस लक्ष्मी-नृसिंह मम देहि करावलम्बम् ॥२॥

Verse

संसार-दाव-दहनाकर-भी-करोरु- ज्वालावलीभिरतिदग्ध-तनूरुहस्य । त्वत्-पाद-पद्म-सरसी-शरणागतस्य लक्ष्मी-नृसिंह मम देहि करावलम्बम् ॥३॥

Verse

संसार-जाल-पतितस्य जगन्निवास सर्वेन्द्रियार्थ-बडिशाग्र-झषोपमस्य । प्रोत्कम्पित-प्रचुर-तालुक-मस्तकस्य लक्ष्मी-नृसिंह मम देहि करावलम्बम् ॥४॥

Verse

संसार-कूपमतिघोरमगाध-मूलं सम्प्राप्य दुःख-शत-सर्प-समाकुलस्य । दीनस्य देव कृपया पदमागतस्य लक्ष्मी-नृसिंह मम देहि करावलम्बम् ॥५॥

Verse

संसार-भीकर-करीन्द्र-कराभिघात- निष्पीड्यमान-वपुषः सकलार्ति-नाश । प्राण-प्रयाण-भव-भीति-समाकुलस्य लक्ष्मी-नृसिंह मम देहि करावलम्बम् ॥६॥

Verse

संसार-सर्प-विष-दिग्ध-महोग्र-तीव्र- दंष्ट्राग्र-कोटि-परिदष्ट-विनष्ट-मूर्तेः । नागारि-वाहन सुधाब्धि-निवास शौरे लक्ष्मी-नृसिंह मम देहि करावलम्बम् ॥७॥

Verse

संसार-वृक्षमघ-बीजमनन्त-कर्म- शाखा-युतं करण-पत्रमनङ्ग-पुष्पम् । आरुह्य दुःख-फलितं पततं दयालो लक्ष्मी-नृसिंह मम देहि करावलम्बम् ॥८॥

Verse

संसार-सागर-विशाल-कराल-काल- नक्र-ग्रह-ग्रसित-निग्रह-विग्रहस्य । व्यग्रस्य राग-निचयोर्मि-निपीडितस्य लक्ष्मी-नृसिंह मम देहि करावलम्बम् ॥९॥

Verse

संसार-सागर-निमज्जनमुह्यमानं दीनं विलोकय विभो करुणा-निधे माम् । प्रह्लाद-खेद-परिहार-परावतार लक्ष्मी-नृसिंह मम देहि करावलम्बम् ॥१०॥

Verse

संसार-घोर-गहने चरतो मुरारे मारोग्र-भीकर-मृग-प्रचुरार्दितस्य । आर्तस्य मत्सर-निदाघ-सुदुःखितस्य लक्ष्मी-नृसिंह मम देहि करावलम्बम् ॥११॥

Verse

बद्ध्वा गले यम-भटा बहु तर्जयन्तः कर्षन्ति यत्र भव-पाश-शतैर्युतं माम् । एकाकिनं परवशं चकितं दयालो लक्ष्मी-नृसिंह मम देहि करावलम्बम् ॥१२॥

Verse

लक्ष्मीपते कमलनाभ सुरेश विष्णो यज्ञेश यज्ञ मधुसूदन विश्वरूप । ब्रह्मण्य केशव जनार्दन वासुदेव लक्ष्मी-नृसिंह मम देहि करावलम्बम् ॥१३॥

Verse

एकेन चक्रमपरेण करेण शङ्खम् अन्येन सिन्धु-तनयाम् अवलम्ब्य तिष्ठन् । वामेतरेण वरदाभय-पद्म-चिह्नं लक्ष्मी-नृसिंह मम देहि करावलम्बम् ॥१४॥

Verse

अन्धस्य मे हृत-विवेक-महाधनस्य चोरैर्-महाबलिभिरिन्द्रिय-नामधेयैः । मोहान्धकार-कुहरे विनिपातितस्य लक्ष्मी-नृसिंह मम देहि करावलम्बम् ॥१५॥

Verse

प्रह्लाद-नारद-पराशर-पुण्डरीक- व्यासादि-भागवत-पुङ्गव-हृन्निवास । भक्तानुरक्त-परिपालन-पारिजात लक्ष्मी-नृसिंह मम देहि करावलम्बम् ॥१६॥

Verse

लक्ष्मी-नृसिंह-चरणाब्ज-मधुव्रतेन स्तोत्रं कृतं शुभकरं भुवि शङ्करेण । ये तत् पठन्ति मनुजा हरि-भक्ति-युक्ताः ते यान्ति तत्-पद-सरोजमखण्ड-रूपम् ॥१७॥

Verse

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य श्रीमच्छङ्करभगवतः कृतौ श्री-लक्ष्मी-नृसिंह-करुणारस-स्तोत्रं सम्पूर्णम्‌॥

brahmapārastotram
śrī-lakṣmī-nṛsiṃha-pañcaratna-stotram

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms