Fetching Data .

Loading verse structure and chapter context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

sahasranAma

śrī yamunā sahastranāmastotram

श्री यमुना सहस्त्रनामस्तोत्रम्

Verse

श्रीयमुनासहस्त्रनामस्तोत्रम् मान्धातोवाच नाम्नां सहस्त्रं कृष्णायाः सर्वसिद्धिकरं परम् । वद मां मुनिशार्दूल त्वं सर्वज्ञः निरामयः ॥१॥

Verse

सौभरिरुवाच नाम्रां सहस्त्रं कालिन्द्या मान्धातस्ते वदाम्यहम् । सर्वसिद्धिकरं दिव्यं श्रीकृष्णवशकारकम् ॥२॥

Verse

अस्य श्रीकालिन्दीसहस्त्रनामस्तोत्रमन्त्रस्य सौभरिऋषिः श्रीयमुना देवता, अनुष्टुप् छन्दः, मायाबीजमिति कीलकम् , रमाबीजमिति शिक्तिः, श्रीकलिन्दनन्दिनीप्रसादसिद्धयर्थे पाठे विनियोगः । ध्यानम् ॐ श्यामामम्भोजनेत्रां सघनघनरुचिं रत्नमञ्जीरकूरत् काञ्चीकेयूरयुक्तां कनकमणिमये बिभ्रतीं कुण्डले द्वे । भ्राजच्छ्रीनीलवस्त्रां स्फुरदमलचलद्धारभारां मनोज्ञां ध्यायेन्मार्तण्डपुत्रीं तनुकिरणचरयोद्दीप्तदीपाभिरामाम् ॥३॥

Verse

स्तोत्रम् ॐ कालिन्दी यमुना कृष्णा कुष्णरूपा सनातनी । कृष्णवामांससम्भूता परमानन्दरूपिणी ॥४॥

Verse

गोलोकवासिनी श्यामा वृन्दावनविनोदिनी । राधासखी रासलीला रासमण्डलमण्डिनी ॥५॥

Verse

निकुञ्जवासिनी वल्ली रङ्गवल्ली मनोहरा । श्रीरासमण्डलीभूता यूथीभूता हरिप्रिया ॥६॥

Verse

गोलोकतटिनी दिव्या निकुञ्जतलवासिनी । दीर्घोर्मिवेगगम्भीरा पुष्पपल्लववाहिनी ॥७॥

Verse

घनश्यामा मेघमाला बलाका पद्ममालिनी । परिपूर्णतमा पूर्णा पूर्णब्रह्मप्रिया परा ॥८॥

Verse

महावेगवती साक्षान्निकुञ्जद्वारनिर्गता । महानदी मन्दगतिर्विरजावेगभेदिनी ॥९॥

Verse

अनेकब्रह्माण्डगता ब्रह्मद्रवसमाकुला । गङ्गामिश्रा निर्मलाभा निर्मला सरितां वरा ॥१०॥

Verse

रत्नबद्धोभयतटी हंसपद्मादिसंकुला । नदी निर्मलपानीया सर्वब्रह्माण्डपावनी ॥११॥

Verse

वैकुण्ठपरिखीभूता परिखा पापहारिणी । ब्रह्मलोकगता ब्राह्मी स्वर्गा स्वर्गनिवासिनी ॥१२॥

Verse

उल्लसन्ती प्रोत्पतन्ती मेरुमाला महोज्ज्वला । श्रीगङ्गाम्भःशिखरिणी गण्डशैलविभेदिनी ॥१३॥

Verse

देशान्पुनन्ती गच्छन्ती वहन्ती भूमिमध्यगा । मार्तण्डतनूजा पुण्या कलिन्दगिरिनन्दिनी ॥१४॥

Verse

यमस्वसा मन्दहासा सुद्विजा रचिताम्बरा । नीलाम्बरा पद्ममुखी चरन्ती चारुदर्शना ॥१५॥

Verse

रम्भोरूः पद्मनयना माधवी प्रमदोत्तमा । तपश्चरन्ती सुश्रोणी कूजन्नूपुरमेखला ॥१६॥

Verse

जलस्थिता श्यामलाङ्गी खाण्डवाभा विहारिणी । गाण्डीविभाषिणी वन्या श्रीकृष्णं वरमिच्छती ॥१७॥

Verse

द्वारकागमना राज्ञी पट्टराज्ञी परङ्गता । महाराज्ञी रत्नभूषा गोमती तीरचारिणी ॥१८॥

Verse

स्वकीया स्वसुखा स्वार्था स्वभक्तकार्यसाधिनी । नवलाङ्गाऽबला मुग्धा वराङ्गा वामलोचना ॥१९॥

Verse

अजातयौवनाऽदीना प्रभा कान्तिर्द्युतिश्छविः । सुशोभा परमा कीतिः कुशलाज्ञातयौवना ॥२०॥

Verse

नवोढा मध्यगा मध्या प्रौढिः प्रौढा प्रगल्भका । धीराऽधीरा धैर्यधरा ज्येष्ठा श्रेष्ठा कुलाङ्गना ॥२१॥

Verse

क्षणप्रभा चञ्चलार्च्या विद्युत्सौदामिनी तडित् । स्वाधीनपतिका लक्ष्मीः पुष्टा स्वाधीनभर्तृका ॥२२॥

Verse

कलहान्तरिता भीरुरिच्छा प्रोत्कण्ठिताकुला । कशिपुस्था दिव्यशय्या गोविन्दहृतमानसा ॥२३॥

Verse

खण्डिताखण्डशोभाढ्या विप्रलब्धाभिसारिका । विरहार्ता विरहिणी नारी प्रोषितभर्तृका ॥२४॥

Verse

मानिनी मानदा प्राज्ञा मन्दारवनवासिनी । झङ्कारिणी झणत्कारी रणन्मञ्जीरनूपुरा ॥२५॥

Verse

मेखलामेखलाकाञ्ची श्रीकाञ्ची काञ्चनामयी । कञ्चुकी क्ञ्चुकमणिः श्रीकण्ठाढ्या महामणिः ॥२६॥

Verse

श्रीहारिणी पद्महारा मुक्ता मुक्तफलार्चिता । रत्नकङ्कणकेयूरा स्फुरङ्गुलिभूषणा ॥२७॥

Verse

दर्पणा दर्पणीभूता दुष्टदर्पविनाशिनी । कम्बुग्रीवा कम्बुधरा ग्रैवेयकविराजिता ॥२८॥

Verse

ताटङ्किनी दन्तधरा हेमकुण्डलमण्डिता । शिखाभूषा भालपुष्पा नासामौक्तिकशोभिता ॥२९॥

Verse

मणिभुमिगता देवी रैवताद्रिविहारिणी । वृन्दावनगता वृन्दा वृन्दारण्यनिवासिनी ॥३०॥

Verse

वृन्दावनलता माध्वी वृन्दारण्यविभूषणा । सौन्दर्यलहरी लक्ष्मीर्मथुरातीर्थवासिनी ॥३१॥

Verse

विश्रान्तवासिनी काम्या रम्या गोकुलवासिनी । रमणस्थलशोभाढ्या महावनमहनदी ॥३२॥

Verse

प्रणता प्रोन्नता पुष्टा भारती भरतार्चिता । तीर्थराजगतिगौत्रा गङगासागरसङ्गमा ॥३३॥

Verse

सप्ताब्धिभेदिनी लोला सप्तद्वीपगता बलात् । लुठन्ती शैलभिद्यन्ती स्फुरन्ती वेगवत्तरा ॥३४॥

Verse

काञ्चनी काञ्चनीभूमिः काञ्चनीभूमिभाविता । लोकदृष्टिर्लोकलीला लोकालोकाचलार्चिता ॥३५॥

Verse

शैलोद्गता स्वर्गगता स्वर्गार्चा स्वर्गपूजिता । वृन्दावनी वनाध्यक्षा रक्षा कक्षा तटीपटी ॥३६॥

Verse

असिकुण्डगता कच्छा स्वच्छन्दोच्छलितादिजा । कुहरस्था रथप्रस्था प्रस्था शान्ततरातुरा ॥३७॥

Verse

अम्बुच्छटा शीकराभा दर्दुरा दार्दुरीधरा । पापाङ्कुशा पापसिंही पापद्रुमकुठारिणी ॥३८॥

Verse

पुण्यसंघा पुण्यकीर्तिः पुण्यदा पुण्यवर्द्धिनी । मधुवननदी मुख्यातुला तालवनस्थिता ॥३९॥

Verse

कुमुद्वननदी कुब्जा कुमुदाम्भोजवर्द्धिनी । प्लवरूपा वेगवती सिंहसर्पादिवाहिनी ॥४०॥

Verse

बहुली बहुदा बह्वी बहुला वनवन्दिता । राधाकुण्डकलाराध्या कुष्णकुण्डजलाश्रिता ॥४१॥

Verse

ललिताकुण्डगा घंटा विशाखा कुण्डमण्डिता । गोविन्दकुण्डनिलया गोपकुण्डतरङ्गिणी ॥४२॥

Verse

श्रीगङ्गा मानसीगङ्गा कुसुमाम्बरभाविनी । गोवर्धिनी गोधनाढ्या मयुरवरवर्णिनी ॥४३॥

Verse

सारसी नीलकण्ठाभा कूजत्कोकिलपोतकी । गिरिराजप्रसूर्भूरिरातपत्रातपत्रिणी ॥४४॥

Verse

गोवर्द्धनाङ्कगा गोदन्ती दिव्यौषधिनिधिः सृतिः । पारदी पारदमयी नारदी शारदी भृतिः ॥४५॥

Verse

श्रीकृष्णचरणाङ्कस्थाकामा कामवनाञ्चिता । कामाटवी नन्दिनी च नन्दग्राममही धरा ॥४६॥

Verse

बृहत्सानुद्युतिप्रोता नन्दीश्र्वरसमन्विता । काकली कोकिलमयी भाण्डीरकुशकौशला ॥४७॥

Verse

लोहार्गलप्रदा कारा काश्मीरवसना वृता । बर्हिषदी शोणपुरी शूरक्षेत्रपुराधिका ॥४८॥

Verse

नानाभरणशोभाढ्या नानावर्णसमन्विता । नानानारीकदम्बाढ्या नानारङ्गमहीरुहा ॥४९॥

Verse

नानालोकगताभ्यर्चिर्नानाजलसमन्विता । स्त्रीरत्नं रत्ननिलया ललना रत्नरञ्जिनी ॥५०॥

Verse

रङ्गिणी रङ्गभूमाढ्या रङ्गा रङ्गमहीरुहा । राजविद्या राजगुह्या जगत्कीर्तिर्घनाघना ॥५१॥

Verse

विलोलघंटा कृष्णाङ्गा कृष्णदेहसमुद्भवा । नीलपङ्कजवरर्णाभा नीलपङ्कजहारिणी ॥५२॥

Verse

नीलाभा नीलपद्माढ्या नीलाम्भोरुहवासिनी । नागवल्ली नागपुरी नागवल्लीदलार्चिता ॥५३॥

Verse

ताम्बूलचर्चिता चर्चा मकरन्दमनोहरा । सकेशरा केशरिणी केशपाशाभिशोभिता ॥५४॥

Verse

कज्जलाभा कज्जलाक्ता कज्जली कलिताञ्जना । अलक्तचरणा ताम्रा लाला ताम्रीकृताम्बरा ॥५५॥

Verse

सिन्दूरितालिप्तवाणी सुश्री श्रीखण्डमण्डिता । पाटीपरपङ्कवसना जटामांसी स्त्रगम्बरा ॥५६॥

Verse

आगर्य्यगुरुगन्धाक्ता तगराश्रितमारुता । सुगन्धितैलरूचिरा कुन्तलालिः सकुन्तला ॥५७॥

Verse

शकुन्तलाऽपांसुला च पातिव्रत्यपरायणा । सूर्यप्रभा सूर्यकन्या सूर्यदेहसमुद्भवा ॥५८॥

Verse

कोटिसूर्यप्रतीकाशा सूर्यजा सूर्यनन्दिनी । संज्ञा संज्ञासुता स्वेच्छा संज्ञामोदप्रदायिनी ॥५९॥

Verse

संज्ञापुत्री स्फुरच्छाया तपतीतापकारिणी । सावर्ण्यानुभवा देवी वडवा सौख्यदायिनी ॥६०॥

Verse

शनैश्चरानुजा कीला चन्द्रवंशविवर्द्धिनी । चन्द्रवंशवधूश्चन्द्रा चन्द्रावलिसहायिनी ॥६१॥

Verse

चन्द्रावती चन्द्रलेखा चन्द्रकान्तानुगांशुका । भैरवी पिङ्गलाशंकी लीलावत्यागरीमयी ॥६२॥

Verse

धनश्रीर्देवगान्धारी स्वर्मणिर्गुणवर्द्धिनी । व्रजमल्लार्यन्धकरी विचित्रा जयकारिणी ॥६३॥

Verse

गान्धारी मञ्जरी टोडी गुर्ज्जर्य्याशावरी जया । कर्णाटी रागिणी गौरी वैराटी गौरवाटिका ॥६४॥

Verse

चतुश्चन्द्रा कलाहेरी तैलङ्गी विजयावती । ताली तालस्वरा गाना क्रियामात्रप्रकाशिनी ॥६५॥

Verse

वैशाखी चञ्चला चारुर्माचारी घूघटी घटा । वैरागरी सोरटीशा कैदारी जलधारिका ॥६६॥

Verse

कामाकरश्रीकल्याणी गौडकल्याणमिश्रिता । रामसञ्जीवनी हेला मन्दारी कामरूपिणी ॥६७॥

Verse

सारङ्गी मारुती होढा सागरी कामवादिनी । वैभासी मङ्गला चान्द्री रासमण्डलमण्डना ॥६८॥

Verse

कामधेनुः कामलता कामदा कमनीयका । कल्पवृक्षस्थली स्थूला क्षुधा सौधनिवासिनी ॥६९॥

Verse

गोलोकवासिनी सुभ्रूर्यष्टिभृद्‍द्वारपालिका । श्रृङ्गारप्रकरा श्रृङ्गा स्वच्छा शय्योपकारिका ॥७०॥

Verse

पार्षदा सुमुखी सेव्या श्रीवृन्दावनपालिका । निकुञ्जभृत्कुञ्जपुञ्जा गुञ्जाभरणभूषिता ॥७१॥

Verse

निकुञ्जवासिनी प्रोष्या गोवर्द्धनतटीभवा । विशाखा ललिता रामा नीरुजा मधुमाधवी ॥७२॥

Verse

एका नैकसखी शुक्ला सखीमध्या महामनाः । श्रुतिरूपा ऋषिरूपा मैथिलाः कौशलाः स्त्रियः ॥७३॥

Verse

अयोध्यापुरवासिन्यो यज्ञसीताः पुलिन्दकाः । रमावैकुण्ठवासिन्यः श्वेतद्वीपसखीजनाः ॥७४॥

Verse

ऊर्ध्ववैकुण्ठवासिन्यो दिव्याजितपदाश्रिताः । श्रीलोकाचलवासिन्यः श्रीसख्यः सागरोद्भवाः ॥७५॥

Verse

दिव्या अदिव्या दिव्याङ्गा व्याप्तास्त्रिगुणवृत्तयः । भूमिगोप्यो देवनार्य्यो लता ओषधिवीरुधः ॥७६॥

Verse

जालन्धर्य्यः सिन्धुसुताः पृथुबर्हिष्मतीभवाः । दिव्याम्बरा अप्सरसः सौतला नागकन्यकाः ॥७७॥

Verse

परं धाम परं ब्रह्म पौरुषा प्रकृतिः परा । तटस्था गुणभूर्गीता गुणागुणमयी गुणा ॥७८॥

Verse

चिद्घना सदसन्माला दृष्टिर्दृश्या गुणाकरी । महत्तत्त्वमहङ्कारो मनो बुद्धिः प्रचेतना ॥७९॥

Verse

चेतो वृत्तिः स्वान्तरात्मा चतुर्थी चतुरक्षरा । चतुर्व्यूहा चतुमूर्तिर्व्योमवायुरदो जलम् ॥८०॥

Verse

मही शब्दो रसो गन्धः स्पर्शो रूपमनेकधा । कर्मेन्द्रियं कर्ममयी ज्ञानं ज्ञानेन्द्रियं द्विधा ॥८१॥

Verse

त्रिधाधिभूतमध्यात्ममधिदैवमधिष्ठितम् । ज्ञानशक्तिः क्रियाशक्तिः सर्वदेवाधिदेवता ॥८२॥

Verse

तत्त्वसंघा विराण्मूर्तिर्धारणा धारणामयी । श्रुतिः स्मृतिर्वेदमूर्तिः संहिता गर्गसंहिता ॥८३॥

Verse

पाराशरी सैव सृष्टिः पारहंसी विधातृका । याज्ञवल्की भागवती श्रीमद्भागवतार्चिता ॥८४॥

Verse

रामायणमयी रम्या पुराणपुरुषप्रिया । पुराणमूर्तिः पुण्याङ्गा शास्त्रमूर्तिर्महोन्नता ॥८५॥

Verse

मनीषा धिषणा बुद्धिर्वाणी धीः शेमुषी मतिः । गायत्री वेदसावित्री ब्रह्माणी ब्रह्मलक्षणा ॥८६॥

Verse

दर्गापर्णा सती सत्या पार्वती चण्डिकाम्बिका । आर्या दाक्षायणी दाक्षी दक्षयज्ञविघातिनी ॥८७॥

Verse

पुलोमजा शचीन्द्राणी देवी देववरार्पिता । वायुना धारिणी धन्या वायवी वायुवेगगा ॥८८॥

Verse

यमानुजा संयमनी संज्ञाच्छाया स्फुरद्‍द्युतिः । रत्नवेदी रत्नवृन्दा तारा तरणिमण्डला ॥८९॥

Verse

रुचिः शान्तिः क्षमा शोभा दया दक्षा द्युतिस्त्रपा । तलतुष्टिर्विभा पुष्टिः सन्तुष्टिः पुष्टभावना ॥९०॥

Verse

चतुर्भुजा चारुनेत्रा द्विभुजाष्टभुजाबला । शङ्खहस्ता पद्महस्ता चक्रहस्ता गदाधरा ॥९१॥

Verse

निषङ्गधारिणी चर्मखड्‌गपाणिर्धनुर्धरा । धनुष्टंकारिणी योद्‍ध्री दैत्योद्भटविणाशिनी ॥९२॥

Verse

रथस्था गरुडारूढा श्रीकृष्णहृदयस्थिता । वंशीधरा कृष्णवेषा स्त्रग्विणी वनमालिनी ॥९३॥

Verse

किरीटधारिणी याना मन्दमन्दगतिर्गतिः । चन्द्रकोटिप्रतीकाशा तन्वी कोमलविग्रहा ॥९४॥

Verse

भैष्मी भीष्मसुताऽभीमा रुक्मिणी रुक्मरूपिणी । सत्यभामा जाम्बवती सत्या भद्रा सुदक्षिणा ॥९५॥

Verse

मित्रविन्दा सखी वृन्दा वृन्दारण्यध्वजोर्ध्वगा । श्रृङ्गारकारिणी श्रृङ्गा श्रृङ्गभूः श्रृङ्गदा खगा ॥९६॥

Verse

तितिक्षेक्षा स्मृतिः स्पर्धा स्पृहा श्रद्धा स्वनिर्वृतिः । ईशा तृष्णाभिदा प्रीतिर्हिंसा याच्ञा क्लमा कृषिः ॥९७॥

Verse

आशा निद्रा योगनिद्रा योगिनी योगदा युगा । निष्ठा प्रतिष्ठा शमितिः सत्त्वप्रकृतिरुत्तमा ॥९८॥

Verse

तमःप्रकृतिर्दुर्मर्षी रजःप्रकृतिरानतिः । क्रियाऽक्रियाकृतिर्ग्लानिः सात्त्विक्याध्यात्मिकी वृषा ॥९९॥

Verse

सेवा शिखामणिर्वृद्धिराहूतिः सुमतिर्द्युभूः । रज्जुर्द्विदाम्नी षड्‍वर्गा संहिता सौख्यदायिनी ॥१००॥

Verse

मुक्तिः प्रोक्तिर्देशभाषा प्रकृतिः पिङ्गलोद्भवा । नागभाषा नागभुषा नागरी नगरी नगा ॥१०१॥

Verse

नौर्नौका भवनौर्भाव्या भवसागरसेवतुका । मनोमयी दारुमयी सैकती सिकतामयी ॥१०२॥

Verse

लेख्या लेप्या मणिमयी प्रतिमा हेमनिर्मिता । शैली शिलभवा शीला शीकराभा चलाचला ॥१०३॥

Verse

अस्थिता सुस्थिता तूली वैदिकी तान्त्रिकी विधिः । सन्ध्या सन्ध्याभ्रवसना वेदसन्धिः सुधामयी ॥१०४॥

Verse

सांयतनी शिखावेध्या सूक्ष्मा जीवकला कृतिः । आत्मभूता भाविताऽण्वी प्रह्वी कमलकर्णिका ॥१०५॥

Verse

नीराजनी महाविद्या कन्दली कार्यसाधनी । पूजा प्रतिष्ठा विपुला पुनन्ती पारलौकिकी ॥१०६॥

Verse

शुक्लशुक्तिर्मौक्तिका च प्रतीतिः परमेश्वरी । विरजोष्णिग् विराड् वेणी वेणुका वेणुनादिनी ॥१०७॥

Verse

आवार्तिनी वार्तिकदा वार्त्ता वृत्तिर्विमानगा । रासाढ्या रासिनी रासा रासमण्डलवर्तिनी ॥१०८॥

Verse

गोपगोपीश्वरी गोपी गोपीगोपालवन्दिता । गोचारिणी गोपनदी गोपानन्दप्रदायिनी ॥१०९॥

Verse

पशव्यदा गोपसेव्या कोटिशो गोगणावृता । गोपानुगा गोपवती गोविन्दपदपादुका ॥११०॥

Verse

वृषभानुसुता राधा श्रीकृष्णवशकारिणी । कृष्णप्राणाधिका शश्वद्रसिका रसिकेश्वरी ॥१११॥

Verse

अवटोदा ताम्रपर्णी कृतमाला विहायसी । कृष्णा वेणी भीमरथी तापी रेवा महापगा ॥११२॥

Verse

वैयासकी च कावेरी तुङ्गभद्रा सरस्वती । चन्द्रभागा वेत्रवती ऋषिकुल्या ककुद्‍मिनी ॥११३॥

Verse

गौतमी कौशिकी सिन्धुर्बाणगङ्गातिसिद्धिदा । गोदावरी रत्नमाला गङ्गा मन्दाकिनी बला ॥११४॥

Verse

स्वर्णदी जाह्नवी वेला वैष्णवी मङगलालया । बाला विष्णुपदीप्रोक्ता सिन्धुसागरसङ्गता ॥११५॥

Verse

गङ्गासागशोभाढ्या सामुद्री रत्नदा धुनी । भागीरथी स्वर्धुनीभूः श्रीवामनपदच्युता ॥११६॥

Verse

लक्ष्मी रमा रमणीया भार्गवी विष्णुवल्लभा । सीतार्चिर्जानकी माता कलङ्करहिता कला ॥११७॥

Verse

कृष्णपादाब्जसम्भूता सर्वा त्रिपथगामिनी । धरा विश्वम्भराऽनन्ता भूमिर्धात्री क्षमामयी ॥११८॥

Verse

स्थिरा धरित्री धरणिरुर्वी शेषफणस्थिता । अयोध्या राघवपुरी कौशिकी रघुवंशजा ॥११९॥

Verse

मथुरा माथुरी पन्था यादवी ध्रुवपूजिता । मयायुर्बिल्वनीलोदा गङ्गाद्वाविनिर्गता ॥१२०॥

Verse

कुशावर्तमयी ध्रौव्या ध्रुवमण्डलमध्यगा । काशी शिवपुरी शेषा विन्ध्या वाराणसी शिवा ॥१२१॥

Verse

अवन्तिका देवपुरी प्रोज्ज्वलोज्जयिनी जिता । द्वारावती द्वारकामा कुशभूता कुशस्थली ॥१२२॥

Verse

महापुरी सप्तपुर नन्दिग्रामस्थलस्थिता । शालग्रामशिलादित्या सम्भलग्रामध्यगा ॥१२३॥

Verse

वंशगोपालिनी क्षिप्ता हरिमन्दिरवर्तिनी । बर्हिष्मती हस्तिपुरी शक्रप्रस्थनिवासिनी ॥१२४॥

Verse

दाडिमी सैन्धवी जम्बुः पौष्करी पुष्करप्रसूः । उत्पलावर्तगमना नैमिषी नैमिषावृता ॥१२५॥

Verse

कुरुजाङ्गलभूः काली हैमवत्यार्बुदी बुधा । शुकरक्षेत्रविदिता श्वेतवाराहधारिता ॥१२६॥

Verse

सर्वतीर्थमयी तीर्था तीर्थानां तीर्थकारिणी । हारिणी सर्वदोषाणां दायिनी सर्वसम्पदाम् ॥१२७॥

Verse

वर्द्धिनी तेजसां साक्षाद्गर्भवासनिकृन्तनी । गोलोकधामधनिनी निकुञ्जनिजमञ्जरी ॥१२८॥

Verse

सर्वोत्तमा सर्वपुन्या सर्वसौन्दर्यश्रृङ्खला । सर्वतीर्थोपरिगता सर्वतीर्थाधिदेवता ॥१२९॥

Verse

॥

Verse

फलश्रुतिः॥

Verse

नाम्नां सहस्त्रं कालिन्द्याः कीर्तिदं कामदं परम् । महापापहरं पुण्यमायुर्वर्द्धनमुत्तमम् ॥१३०॥

Verse

एकवारं पठेद्रात्रौ चोरेभ्यो न भयं भवेत् । द्विवारं प्रपठेन्मार्गे दस्युभ्यो न भयं क्वचित् ॥१३१॥

Verse

द्वितीयां तु समारभ्य पठेत्पूर्णावधि द्विजः । दशवारमिदं भक्त्या ध्यात्वा देवीं कलिन्दजाम् ॥१३२॥

Verse

रोगी रोगात्प्रमुच्येत बद्धो मुच्येत बन्धनात् । गुर्विणी जनयेत्पुत्रं विद्यार्थी पण्डितो भवेत् ॥१३३॥

Verse

मोहनं स्तम्भनं शश्‍वद्वशीकरणमेव च । उच्चाटनं घातनं च शोषणं दीपनं तथा ॥१३४॥

Verse

उन्मादनं तापनं च निधिदर्शनमेव च । यद्यद्वाञ्छति चित्तेन तत्तत्प्राप्नोति मानवः ॥१३५॥

Verse

ब्राह्मणो ब्रह्मवर्चस्वी राजन्यो जगती पतिः । वैश्यो निधिपतिर्भूयाच्छूद्रः श्रुत्वा तु निर्मलः ॥१३६॥

Verse

पुजाकाले तु यो नित्यं पठते भक्तिभावतः । लिप्यते न स पापेन पद्मपत्रमिवाम्भसा ॥१३७॥

Verse

शतवारं पठेन्नित्यं वर्षावधिमतः परम् । पटलं पद्धतिं कृत्वा स्तवं च कवचं तथा ॥१३८॥

Verse

सप्तद्वीपमहीराज्य प्राप्नुयान्नात्र संशयः । निष्कारणं पठेद्यस्तु यमुनाभक्तिसंयुतः ॥१३९॥

Verse

त्रैवर्ग्यमेत्य सुकृती जीवन्मुक्तो भवेदिह ॥१४०॥

Verse

निकुञ्जलीलाललितं मनोहरं कलिन्दजाकूललताकदम्बकम् । वृन्दावनोन्मत्तमिलिन्दशब्दितं व्रजेत्स गोलोकमिदं पठेच्च यः ॥१४१॥

Verse

॥

Verse

इति श्रीगर्गसंहितायां श्रीमाधुर्यखण्डे श्रीयमुनासहस्त्रनामस्तोत्रं सम्पूर्णम् ॥

śrī gāyatrī sahastranāmastotram
śrī annapūrṇā sahastranāmastotram

Read next

More on यमुना

  • श्री यमुनाजी की आरतीAartis
  • यमुनाष्टकम्Ashtakam
  • यमुनाष्टकम्Ashtakam
  • यामुनाचार्यकृतम्Ashtakam
  • श्रीरामप्रेमाष्टकम् (यामुनाचार्यकृतम्)Ashtakam
  • सरस्वतीस्तोत्रम् अगस्त्यमुनि-प्रोक्तम्Stotra

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms