kavaca
śrīviṣṇukavacam
श्रीविष्णुकवचम्
Verse
ध्यानम् शान्ताकारं भुजगशयनं पद्मनाभं सुरेशं विश्वाकारं गगनसदृशं मेघवर्णं शुभाङ्गम् । लक्ष्मीकान्तं कमलनयनं योगिहृद्ध्यानगम्यं वन्दे विष्णुं भवभयहरं सर्वलोकैकनाथम् ॥
Verse
कवचम् पूर्वतो मां हरिः पातु पश्चाच्चक्री च दक्षिणे । कृष्ण उत्तरतः पातु श्रीशो विष्णुश्च सर्वतः ॥१॥
Verse
ऊर्ध्वं आनन्दकृत्पातु अधस्ताच्छार्ङ्गभृत्सदा । पादौ पातु सरोजाङ्घ्रिः जङ्घे पातु जनार्दनः ॥२॥
Verse
जानुनी मे जगन्नाथः ऊरू पातु त्रिविक्रमः । गुह्यं पातु हृषीकेशः पृष्ठं पातु ममाव्ययः ॥३॥
Verse
पातु नाभिं ममानन्तः कुक्षिं राक्षसमर्दनः । दामोदरो मे हृदयं वक्षः पातु नृकेसरी ॥४॥
Verse
करौ मे कालियारातिः भुजौ भक्तार्तिभञ्जनः । कण्ठं कालाम्बुदश्यामः स्कन्धौ मे कंसमर्दनः ॥५॥
Verse
नारायणोऽव्यान्नासां मे कर्णौ केशिप्रभञ्जनः । कपोले पातु वैकुण्ठः जिह्वां पातु दयानिधिः ॥६॥
Verse
आस्यं दशास्यहन्ताव्यान्नेत्रेमे हरि लोचनः । भ्रुवौ मे पातु भूमेशः ललाटं मे सदाऽच्युतः ॥७॥
Verse
मुखं मे पातु गोविन्दः शिरो गरुडवाहनः । मां शेषशायी सर्वेभ्यो व्याधिभ्यो भक्तवत्सलः ॥८॥
Verse
पिशाचाग्नि जलेभ्यो मां आपद्भ्यो पातु वामनः । सर्वेभ्यो दुरितेभ्यश्च पातु मां पुरुषोत्तमः ॥९॥
Verse
इतिश्रीविष्णुकवचं सर्वमङ्गलदायकम् । सर्वरोगप्रशमनं सर्वशत्रुविनाशनम् ॥१०॥
