dohAvalI
rāga pūrvī- tāla tīnatāla
राग पूर्वी- ताल तीनताल
Verse
मैं नित भगतन हाथ बिकाऊँ । आठों जाम ह्रदयमें राखूँ पलक नही बिसराऊँ ॥
Verse
कल न परत बैकुंठ बसत मोहि, जोगिन मन न समाऊँ । जहँ मम भगत प्रेमजुत गावहिं तहाँ बसत सुख पाऊँ ॥
Verse
भगतनकिजैसी रुचि देखूँ तैसो बेष बनाऊँ । टारूँ अपने बचन भगत लगि, तिनके बचन निभाऊँ ॥
Verse
ऊँच-नीच सब काज भगतके, निज कर सकल बनाऊँ । पग धोऊँ, रथ हाँकूँ, माजूँ बासन, छानि छवाऊँ ॥
Verse
मागूँ नाहिं दाम कछु तिनतें, नहिं कछु तिनहि सताऊँ । प्रेमसहित जल, पत्र, पुष्प, फल, जो देवै सो खाऊँ ॥
Verse
निज 'सरबस' भगतनको सौंपूँ, अपनो स्वत्व भुलाऊँ । भगत कहैं सोइ करूँ निरंतर बेचै तो बिक जाऊँ ॥
