aSTottaranAma
śrīṣoḍaśīśatanāmastotram
श्रीषोडशीशतनामस्तोत्रम्
Verse
भृगुरुवाच - चतुर्वक्त्र जगन्नाथ स्तोत्रं वद मयि प्रभो । यस्यानुष्ठानमात्रेण नरो भक्तिमवाप्नुयात् ॥१॥
Verse
ब्रह्मोवाच - सहस्रनाम्नामाकृष्य नाम्नामष्टोत्तरं शतम् । गुह्याद्गुह्यतरं गुह्यं सुन्दर्याः परिकीर्तितम् ॥२॥
Verse
अस्य श्रीषोडश्यष्टोत्तरशतनामस्तोत्रस्य शम्भुरृषिः अनुष्टुप् छन्दः श्रीषोडशी देवता धर्मार्थकाममोक्षसिद्धये विनियोगः ॥
Verse
ॐ त्रिपुरा षोडशी माता त्र्यक्षरा त्रितया त्रयी । सुन्दरी सुमुखी सेव्या सामवेदपरायणा ॥३॥
Verse
शारदा शब्दनिलया सागरा सरिदम्बरा । शुद्धा शुद्धतनुस्साध्वी शिवध्यानपरायणा ॥४॥
Verse
स्वामिनी शम्भुवनिता शाम्भवी च सरस्वती । समुद्रमथिनी शीघ्रगामिनी शीघ्रसिद्धिदा ॥५॥
Verse
साधुसेव्या साधुगम्या साधुसन्तुष्टमानसा । खट्वाङ्गधारिणी खर्वा खड्गखर्परधारिणी ॥६॥
Verse
षड्वर्गभावरहिता षड्वर्गपरिचारिका । षड्वर्गा च षडङ्गा च षोढा षोडशवार्षिकी ॥७॥
Verse
क्रतुरूपा क्रतुमयी ऋभुक्षक्रतुमण्डिता । कवर्गादि पवर्गान्ता अन्तस्थानन्तरूपिणी ॥८॥
Verse
अकाराकाररहिता कालमृत्युजरापहा । तन्वी तत्त्वेश्वरी तारा त्रिवर्षा ज्ञानरूपिणी ॥९॥
Verse
काली कराली कामेशी छाया संज्ञाप्यरुन्धती । निर्विकल्पा महावेगा महोत्साहा महोदरी ॥१०॥
Verse
मेघा बलाका विमला विमलज्ञानदायिनी । गौरी वसुन्धरा गोप्त्री गवाम्पतिनिषेविता ॥११॥
Verse
भगाङ्गा भगरूपा च भक्तिभावपरायणा । छिन्नमस्ता महाधूमा तथा धूम्रविभूषणा ॥१२॥
Verse
धर्मकर्मादि रहिता धर्मकर्मपरायणा । सीता मातङ्गिनी मेधा मधुदैत्यविनाशिनी ॥१३॥
Verse
भैरवी भुवना माताऽभयदा भवसुन्दरी । भावुका बगला कृत्या बाला त्रिपुरसुन्दरी ॥१४॥
Verse
रोहिणी रेवती रम्या रम्भा रावणवन्दिता । शतयज्ञमयी सत्त्वा शतक्रतुवरप्रदा ॥१५॥
Verse
शतचन्द्रानना देवी सहस्रादित्यसन्निभा । सोमसूर्याग्निनयना व्याघ्रचर्माम्बरावृता ॥१६॥
Verse
अर्धेन्दुधारिणी मत्ता मदिरा मदिरेक्षणा । इति ते कथितं गोप्यं नाम्नामष्टोत्तरं शतम् ॥१७॥
Verse
सुन्दर्याः सर्वदं सेव्यं महापातकनाशनम् । गोपनीयं गोपनीयं गोपनीयं कलौ युगे ॥१८॥
Verse
सहस्रनामपाठस्य फलं यद्वै प्रकीर्तितम् । तस्मात्कोटिगुणं पुण्यं स्तवस्यास्य प्रकीर्तनात् ॥१९॥
Verse
पठेत्सदा भक्तियुतो नरो यो निशीथकालेऽप्यरुणोदये वा । प्रदोषकाले नवमीदिनेऽथवा लभेत भोगान्परमाद्भुतान्प्रियान् ॥२०॥
Verse
इति ब्रह्मयामले पूर्वखण्डे षोडश्यष्टोत्तरशतनामस्तोत्रं समाप्तम् ॥
