aSTottaranAma
śrīrādhāṣṭottaraśatanāmastotram
श्रीराधाष्टोत्तरशतनामस्तोत्रम्
Verse
अथास्याः सम्प्रवक्ष्यामि नाम्नामष्टोत्तरं शतम् । यस्य सङ्कीर्तनादेव श्रीकृष्णं वशयेद्ध्रुवम् ॥१॥
Verse
राधिका सुन्दरी गोपी कृष्णसङ्गमकारिणी । चञ्चलाक्षी कुरङ्गाक्षी गान्धर्वी वृषभानुजा ॥२॥
Verse
वीणापाणिः स्मितमुखी रक्ताशोकलतालया । गोवर्धनचरी गोपी गोपीवेषमनोहरा ॥३॥
Verse
चन्द्रावली-सपत्नी च दर्पणस्था कलावती । कृपावती सुप्रतीका तरुणी हृदयङ्गमा ॥४॥
Verse
कृष्णप्रिया कृष्णसखी विपरीतरतिप्रिया । प्रवीणा सुरतप्रीता चन्द्रास्या चारुविग्रहा ॥५॥
Verse
केकराक्षा हरेः कान्ता महालक्ष्मीः सुकेशिनी । सङ्केतवटसंस्थाना कमनीया च कामिनी ॥६॥
Verse
वृषभानुसुता राधा किशोरी ललिता लता । विद्युद्वल्ली काञ्चनाभा कुमारी मुग्धवेशिनी ॥७॥
Verse
केशिनी केशवसखी नवनीतैकविक्रया । षोडशाब्दा कलापूर्णा जारिणी जारसङ्गिनी ॥८॥
Verse
हर्षिणी वर्षिणी वीरा धीरा धाराधरा धृतिः । यौवनस्था वनस्था च मधुरा मधुराकृतिः ॥९॥
Verse
वृषभानुपुरावासा मानलीलाविशारदा । दानलीला दानदात्री दण्डहस्ता भ्रुवोन्नता ॥१०॥
Verse
सुस्तनी मधुरास्या च बिम्बोष्ठी पञ्चमस्वरा । सङ्गीतकुशला सेव्या कृष्णवश्यत्वकारिणी ॥११॥
Verse
तारिणी हारिणी ह्रीला शीला लीला ललामिका । गोपाली दधिविक्रेत्री प्रौढा मुग्धा च मध्यका ॥१२॥
Verse
स्वाधीनपतिका चोक्ता खण्डिता याऽभिसारिका । रसिका रसिनी रस्या रसनास्त्रैकशेवधिः ॥१३॥
Verse
पालिका लालिका लज्जा लालसा ललनामणिः । बहुरूपा सुरूपा च सुप्रसन्ना महामतिः ॥१४॥
Verse
मरालगमना मत्ता मन्त्रिणी मन्त्रनायिका । मन्त्रराजैकसंसेव्या मन्त्रराजैकसिद्धिदा ॥१५॥
Verse
अष्टादशाक्षरफला अष्टाक्षरनिषेविता । इत्येतद्राधिकादेव्या नाम्नामष्टोत्तरशतम् ॥१६॥
Verse
कीर्तयेत्प्रातरुत्थाय कृष्णवश्यत्वसिद्धये । एकैकनामोच्चारेण वशी भवति केशवः ॥१७॥
Verse
वदने चैव कण्ठे च बाह्वोरुरसि चोदरे । पादयोश्च क्रमेणास्या न्यसेन्मन्त्रान्पृथक्पृथक् ॥१८॥
Verse
इत्यूर्ध्वाम्नाये राधाष्टोत्तरशतनामकथनं नाम प्रथमः पटलः ॥
