aSTottaranAma
śrījānakī aṣṭottaraśatanāmastotram
श्रीजानकी अष्टोत्तरशतनामस्तोत्रम्
Verse
श्रीहरिरुवाच ।
Verse
साधुं पृष्टं त्वया राजन् श्रव्यमेकाग्रचेतसा । अष्टोत्तरशतं वक्ष्ये नाम्नां परमपावनम् ॥२॥
Verse
सीरध्वजसुता सीता स्वाश्रिताभीष्टदायिनी । सहजानन्दिनी स्तव्या सर्वभूताशयस्थिता ॥३॥
Verse
ह्लादिनी क्षेमदा क्षान्तिः षडर्द्धाक्षहृदिस्थिता । श्रीनिधिः श्रीसमाराध्या श्रियः श्रीः श्रीमदर्चिता ॥४॥
Verse
शरण्या वेदनिःश्वासा वैदेही विबुधेश्वरी । लोकोत्तराम्बा लोकादी रघुनन्दनवल्लभा ॥५॥
Verse
रम्यरम्यनिधी रामा योगेश्वरप्रियात्मजा । यज्ञस्वरूपा यज्ञेशी योगिनां परमा गतिः ॥६॥
Verse
मृदुस्वभावा मृदुला मैथिली मधुराकृतिः । मनोरूपा महेज्येज्या महासौभाग्यदायिनी ॥७॥
Verse
भूमिजा बुधमृग्याङ्घ्रिकमला बोधवारिधिः । फलस्वरूपा तपसां फणीन्द्रवर्ण्यवैभवा ॥८॥
Verse
नमस्या प्रियदृष्टिश्च धरारत्नं धरासुता । दिव्यात्मा दीप्तमहिमा तत्त्वात्मा जनकात्मजा ॥९॥
Verse
जगदीशपरप्रेष्ठा ज्ञानिनां परमायनम् । जगन्मङ्गलमाङ्गल्या जरामृत्युभयातिगा ॥१०॥
Verse
चन्द्रकलामुखासाद्या चिदानन्दस्वरूपिणी । चतुरात्मा चतुर्व्यूहा चन्द्रबिम्बोपमानना ॥११॥
Verse
घनश्यामात्मनिलया गोप्त्री गुप्ता गुहेशया । गेयोदारयशःपङ्क्तिर्गतैश्वर्यकृतस्मया ॥१२॥
Verse
गमनीयपदासक्तिः खलभावनिवारिणी । कृपापीयूषजलधिः कृतज्ञा कृतिसाधनम् ॥१३॥
Verse
कल्याणप्रकृतिः काम्या कल्याणी कामवर्षिणी । कारुण्यार्द्रविशालाक्षी कम्बुकण्ठी कलानिधिः ॥१४॥
Verse
केलिप्रिया कलाधारा कल्मषौघनिवारिणी । ॐ शब्दवाच्या ह्योजोऽब्धिरुदितश्रीरुदारधीः ॥१५॥
Verse
उदारकीर्त्तिरुदिता ह्युदारातुल्यदर्शना । इष्टप्रदेभगमना आदिजाऽऽह्लादिनी परा ॥१६॥
Verse
आश्रितवत्सलाऽऽराध्या ह्यनिर्देश्यस्वरूपिणी । अद्वितीयसुखाम्भोधिरव्याजकरुणापरा ॥१७॥
Verse
अनवद्याऽप्रमत्तात्मा अनन्तैश्वर्यमण्डिता । अमानाऽयोनिजाऽकोपा अविचिन्त्याऽनघस्मृतिः ॥१८॥
Verse
अनीहाऽनियमाऽनादिमध्यान्ताद्भुतदर्शना । अजेयाऽकल्मषाऽकारवाच्येत्यवनिपोत्तम ! ॥१९॥
Verse
अष्टोत्तरशतं नाम प्रोच्यतेऽस्या महर्षिभिः । पठतां प्रत्यहं भक्त्या काऽपि सिद्धिर्न दुर्लभा ॥२०॥
Verse
इति श्रीजानकी अष्टोत्तरशतनामस्तोत्रं सम्पूर्णम् ।
