Fetching Data .

Loading verse structure and chapter context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

aSTottaranAma

āryatārāṣṭottaraśatanāmastotram

आर्यताराष्टोत्तरशतनामस्तोत्रम्

Verse

ॐ नमः श्री आर्यतारायै ।

Verse

श्रीमत्पोतलके रम्ये नानाधातुविराजिते । नानाद्रुमलताकीर्णे नानापक्षिनिकूजिते ॥१॥

Verse

नानानिर्झरभाङ्कारैर्नानामृगसमाकुले । नानाकुसुमजातीभिः समन्तादधिवासिते ॥२॥

Verse

नानाहृद्यफलोपेतषट्पदोद्गीतनिःस्वनैः । किन्नरैर्मधुरोद्गीतैर्मत्तरवारणसङ्कुलैः ॥३॥

Verse

सिद्धविद्याधरगणैर्गन्धर्वैश्च निनादिते । मुनिभिर्वीतरागैश्च सततं सुनिषेविते ॥४॥

Verse

बोधिसत्त्वगणैश्चान्यैर्दशभूमीश्वरैरपि । आर्यतारादिभिर्देवैर्विद्याराज्ञीसहस्रकैः ॥५॥

Verse

क्रोधराजगणैश्चान्यैर्हयग्रीवादिभिर्वृते । सर्वसत्त्वहिते युक्तो भगवानवलोकितः ॥६॥

Verse

व्याजहार ततः श्रीमान् पद्मगर्भासने स्थितः । महता तपसा युक्तो मैत्र्या च कृपयान्वितः ॥७॥

Verse

धर्मं दिदेश तस्यां च महत्यां देवपर्षदि । तत्रापविद्धमागम्य वज्रपाणिर्महाबलः ॥८॥

Verse

परया कृपया युक्तः पप्रच्छ चावलोकितम् । तस्करोरगसिंहोग्रगजव्याघ्रादिसङ्कुले ॥९॥

Verse

सीदन्त्यमी मुने सत्त्वा मग्नाः संसारसागरे । बद्धाः सांसारिकैः पाशै रागद्वेषतमोमयैः ॥१०॥

Verse

मुच्यन्ते येन सत्त्वास्ते तन्मे ब्रूहि महामुने । एवमुक्तो जगन्नाथः स श्रीमानवलोकितः ॥११॥

Verse

उवाच मधुरां वाणीं वज्रपाणिं प्रबोधिनीम् । शृणु गुह्यकराजेन्द्र अमिताभस्य तायणीः(णीम्) ॥१२॥

Verse

प्रणिधानवशोत्पन्नां ममाज्ञां लोकमातरम् । महाकरुणयोपेतां जगदुद्धरणोद्धृताम् ॥१३॥

Verse

उदितादित्यसङ्काशां पुर्णेन्दुवदनप्रभाम् । भाषयन्तीमिमां तारां सदेवासुरमानुषान् ॥१४॥

Verse

कम्पयन्तीं च त्रीन् लोकान् त्रासयन्तीं यक्षराक्षसान् । नीलोत्पलकरां देवीं मा भैर्मा भैरिति ब्रुवन् ॥१५॥

Verse

जगत्संरक्षणार्थयाहमुत्पादिता जिनैः । कान्तारे शस्त्रसम्पाते नानाभयसमाकुले ॥१६॥

Verse

स्मरणादेव नामानि सत्त्वान् रक्षाम्यहं सदा । तारयिष्याम्यहं सत्त्वान् नानाभयमहार्णवात् ॥१७॥

Verse

तेन तारेति मां लोके गायन्ति मुनिपुङ्गवाः । कृताञ्जलिपुटो भूत्वा ततः सादरसाध्वसः ॥१८॥

Verse

ज्वलयत्यन्तरिक्षे तामिदं वचनमब्रवीत् । नामाष्टशतकं ब्रूहि यत्पुरा कीर्तितं जनैः ॥१९॥

Verse

दशभूमीश्वरैर्नाथैर्बोधिसत्त्वैर्महर्द्धिकैः । सर्वपापहरं पुण्यं माङ्गल्यं कीर्तिवर्द्धनम् ॥२०॥

Verse

धनधान्यकरं चैव आरोग्यं पुष्टिवर्धनम् । आयुरारोग्यजनकं सर्वसत्त्वसुखावहम् ॥२१॥

Verse

लक्ष्म्याः श्रियः स्थापकं च सर्वसत्त्वविवर्द्धनम् । मैत्रीमालम्ब्य सत्त्वानां तत्कीर्तय महामुने ॥२२॥

Verse

एवमुक्ते जगन्नाथः प्रहसन्नवलोकितः । व्यवलोक्य दिशः सर्वा मैत्रीस्फरणया दृशा ॥२३॥

Verse

दक्षिणं करमुद्धृत्य पुण्यलक्षणमण्डितम् । तमुवाच महाप्राज्ञः साधु साधु महातप ॥२४॥

Verse

नामानि शृणु महाभाग सर्वसत्त्वैकवत्सरे । यानि सङ्कीर्त्य मनुजा सम्पदा स्युर्धनेश्वराः ॥२५॥

Verse

सर्वव्याधिविनिर्मुक्ताः सर्वैश्वर्यगुणान्विताः । अकालमृत्युनिर्दग्धाश्च्युता यान्ति सुखावतीम् ॥२६॥

Verse

तान्यहं संप्रवक्ष्यामि देवसङ्घाः शृणुत मे । अनुमोदध्वमेतद्वा भविष्यध्वं सुनिर्वृताः ॥२७॥

Verse

मैत्रीहृदये निर्मले श्यामे श्यामरूपि महाप्राज्ञे प्रबलवरभूषिते ।

Verse

अपराजिता महारौद्री विश्वरूपी महाबला । ॐ सुश्रिये ॥२८॥

Verse

ॐ कल्याणी महातेजा लोकधात्री महायशाः । सरस्वती विशालाक्षी प्रज्ञा श्रीर्बुद्धिवर्धिनी ॥२९॥

Verse

धृतिदा पुष्टिदा स्वाहा ॐकारा कामरूपिणी । सर्वसत्त्वहितोद्युक्ता सङ्ग्रामोत्तारिणी जया ॥३०॥

Verse

प्रज्ञापारमिता देवी आर्यतारा मनोरमा । दुन्दुभी शङ्खिनी पूर्णा विद्याराज्ञी प्रियम्वदा ॥३१॥

Verse

चन्द्रानना महागौरी अजिता पीतवाससा । महामाया महाश्वेता महाबलपराक्रमा ॥३२॥

Verse

महारौद्री महाचण्डी दुष्टसत्त्वनिषूदिनी । प्रशान्ता शान्तरूपा च विजया ज्वलनप्रभा ॥३३॥

Verse

विद्युन्मारी ध्वजी खङ्गी चक्री चापोद्यतायुधा । जम्भनो स्तम्भनी काली कालरात्रिर्निशाचरी ॥३४॥

Verse

रक्षणी मोहनी शान्ता कान्तारी द्रावणी शुभा । ब्रह्माणी वेदमाता च गुह्या च गुह्यवासिनी ॥३५॥

Verse

माङ्गल्या शाङ्करी सौम्या जातवेदा मनोजवा । कपालिनी महावेगा सन्ध्या सत्याऽपराजिता ॥३६॥

Verse

सार्थवाहकृपादृष्टिर्नष्टमार्गप्रदर्शिनी । वरदा शासनी शास्त्री सुरूपाऽमृतविक्रमा ॥३७॥

Verse

शर्वरी योगिनी सिद्धा चण्डारी(ली)अमृता ध्रुवा । धन्या पुण्या महाभागा शुभगा प्रियदर्शना ॥३८॥

Verse

कृतान्तत्रासिनी भीमा उग्रा उग्रमहातपा । जगद्धिते सदोद्युक्ता शरण्या भक्तवत्सला ॥३९॥

Verse

वागीश्वरी शिवा सूक्ष्मा नित्या सर्वक्रमानुगा । सर्वार्थसाधनी भद्रा गोप्त्री धात्री धनप्रदा ॥४०॥

Verse

अभया गौतमी पुण्या श्रीमल्लोकेश्वरात्मजा ॥

Verse

तारानामगुणानन्ता सर्वाशापरिपूरका ॥४१॥

Verse

ॐ तारे कृपावरे श्रीक्लेशश्रवणीये स्वाहा ।

Verse

नाम्नामष्टोत्तरशतं ह्येतद्यत्कीर्तितं मया । रहस्यभूतं गुह्यं च देवानामपि दुर्लभम् ॥४२॥

Verse

सौभाग्यभोगकरणं सर्वकिल्विषनाशनम् । सर्वव्याधिप्रशमनं सर्वसत्त्वसुखावहम् ॥४३॥

Verse

त्रिकालं यः पठेद्धीमान् शुचिस्थाने समाहितः । सोऽचिरेणैव कालेन राज्यश्रियमवाप्नुयात् ॥४४॥

Verse

दुःखी स्यात्तु सुखी नित्यं दरिद्रो धनवान् भवेत् । पुत्रो भवेन्महाप्राज्ञो मेधावी च न संशयः ॥४५॥

Verse

बन्धनान्मुच्यते बद्धो व्यवहारे जयोअ भवेत् । शत्रवो मित्रतां यान्ति शृङ्गिणः शुनका अपि ॥४६॥

Verse

सङ्ग्रामे सङ्कटे दुर्गे नानाभयसमुच्छ्रिते । स्मरणादेव नामानि सर्वान्भयानपोहति ॥४७॥

Verse

नाकालमृत्युर्भवति प्राप्नोति विपुलाशयम् । मानुष्ये सफलं जन्म तस्यैकस्य महात्मनः ॥४८॥

Verse

यश्चेदं प्रातरुत्थाय मानवः कीर्तयिष्यति । स दीर्घकालमायुष्मान् श्रियं च लभते नरः ॥४९॥

Verse

देवा नागास्तथा यक्षा गन्धर्वा कठपूतनाः । पिशाचा राक्षसा भूता मातरो रौद्रतेजसाः ॥५०॥

Verse

डाकिन्यस्तारकाः प्रेताः स्कन्दोमाद्या महाग्रहाः । छायापस्मारकाश्चैव खेटका खार्दकादयः ॥५१॥

Verse

वेतालाश्चिञ्चका प्रेष्या ये चान्ये दुष्टचेतसः । छायामपि न लङ्घन्ति किं पुनस्तस्य विग्रहम् ॥५२॥

Verse

दुष्टसत्त्वा न बाधन्ते व्याधयो नाक्रमन्ति च । सर्वैश्वर्यगुणैर्युक्तो वंशवृद्धिश्च जायते ॥५३॥

Verse

जातिस्मरो भवेद् धीमान् कुलीनः प्रियदर्शनः । प्रीतिमांश्च महावाग्मी सर्वशास्त्रविशारदः ॥५४॥

Verse

कल्याणमित्रसंसेवी बोधिचित्तविभूषितः । सदाऽविरहितो बुद्धैर्यत्र यत्रोपपद्यते ॥५५॥

Verse

इति श्रीआर्यताराभट्टारिकाया नामाष्टोत्तरशतं बुद्धपरिभाषितं परिसम्पूर्णम् ॥

āpaduddhārakabaṭukabhairavāṣṭottaraśatanāmastotram
āryamañjuśrīnāmāṣṭottaraśatakastotram

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms