aSTakam
saṃskṛtāṣṭakam
संस्कृताष्टकम्
Verse
अग्रतः संस्कृतं मेऽस्तु पृष्ठतो मेऽस्तु संस्कृतम् । संस्कृतं हृदये मेऽस्तु विश्वमध्येऽस्तु संस्कृतम् ॥१॥
Verse
संस्कृतं देवभाषाऽस्ति वेदभाषाऽस्ति संस्कृतम् । प्राचीन- ज्ञान- भाषा च संस्कृतं भद्रमण्डनम् ॥२॥
Verse
वेदान्तानां पुराणानां शास्त्राणां च तथैव च । मंत्राणां तंत्रसूत्राणाम् आद्यभाषाऽस्ति संस्कृतम् ॥३॥
Verse
रामायणं महाकाव्यं महाभारतमेव च । उभे च विश्वविख्याते संस्कृतस्य महानिधी ॥४॥
Verse
भासस्य कालिदासस्य भवभूतेश्च विश्रुता । बाण- शूद्रक- हर्षाणाम् काव्यभाषाऽस्ति संस्कृतम् ॥५॥
Verse
प्राणभूतं च यत्तत्त्वं सारभूतं तथैव च । संस्कृतौ भारतस्याऽस्य तन्मे यच्छतु संस्कृतम् ॥६॥
Verse
यत्र रामकथागानम् तत्राऽस्ते हनुमान् यथा । संस्कृताध्ययनं यत्र तत्र संस्कृतिदर्शनम् ॥७॥
Verse
शृणुमः संस्कृतं नित्यं वदामः संस्कृतं तथा । स्मरामः संस्कृतं नित्यं पठामः संस्कृतं तथा ॥८॥
Verse
रचनाकारः वसन्तः शंकरसुतः नानिवडेकरः ।
