stotrasangraha
godāṣṭottaraśatanāmastotram
गोदाष्टोत्तरशतनामस्तोत्रम्
Verse
शतमखमणि नीला चारुकह्लारहस्ता स्तनभरनमिताङ्गी सान्द्रवात्सल्यसिन्धुः । अलकविनिहिताभिः स्रग्भिराकृष्टनाथा विलसतु हृदि गोदा विष्णुचित्तात्मजा नः ॥
Verse
श्रीरङ्गनायकी गोदा विष्णुचित्तात्मजा सती । गोपीवेषधरा देवी भूसुता भोगशालिनी ॥१॥
Verse
तुलसीकाननोद्भूता श्रीधन्विपुरवासिनी । भट्टनाथप्रियकरी श्रीकृष्णहितभोगिनी ॥२॥
Verse
आमुक्तमाल्यदा बाला रङ्गनाथप्रिया परा । विश्वम्भरा कलालापा यतिराजसहोदरी ॥३॥
Verse
कृष्णानुरक्ता सुभगा सुलभश्रीः सलक्षणा । लक्ष्मीप्रियसखी श्यामा दयाञ्चितदृगञ्चला ॥४॥
Verse
फल्गुन्याविर्भवा रम्या धनुर्मासकृतव्रता । चम्पकाशोक-पुन्नाग-मालती-विलसत्-कचा ॥५॥
Verse
आकारत्रयसम्पन्ना नारायणपदाश्रिता । श्रीमदष्टाक्षरीमन्त्र-राजस्थित-मनोरथा ॥६॥
Verse
मोक्षप्रदाननिपुणा मनुरत्नाधिदेवता । ब्रह्मण्या लोकजननी लीलामानुषरूपिणी ॥७॥
Verse
ब्रह्मज्ञानप्रदा माया सच्चिदानन्दविग्रहा । महापतिव्रता विष्णुगुणकीर्तनलोलुपा ॥८॥
Verse
प्रपन्नार्तिहरा नित्या वेदसौधविहारिणी । श्रीरङ्गनाथमाणिक्यमञ्जरी मञ्जुभाषिणी ॥९॥
Verse
पद्मप्रिया पद्महस्ता वेदान्तद्वयबोधिनी । सुप्रसन्ना भगवती श्रीजनार्दनदीपिका ॥१०॥
Verse
सुगन्धवयवा चारुरङ्गमङ्गलदीपिका । ध्वजवज्राङ्कुशाब्जाङ्क-मृदुपाद-लताञ्चिता ॥११॥
Verse
तारकाकारनखरा प्रवालमृदुलाङ्गुली । कूर्मोपमेय-पादोर्ध्वभागा शोभनपार्ष्णिका ॥१२॥
Verse
वेदार्थभावतत्त्वज्ञा लोकाराध्याङ्घ्रिपङ्कजा । आनन्दबुद्बुदाकार-सुगुल्फा परमाऽणुका ॥१३॥
Verse
तेजःश्रियोज्ज्वलधृतपादाङ्गुलि-सुभूषिता । मीनकेतन-तूणीर-चारुजङ्घा-विराजिता ॥१४॥
Verse
ककुद्वज्जानुयुग्माढ्या स्वर्णरम्भाभसक्थिका । विशालजघना पीनसुश्रोणी मणिमेखला ॥१५॥
Verse
आनन्दसागरावर्त-गम्भीराम्भोज-नाभिका । भास्वद्बलित्रिका चारुजगत्पूर्ण-महोदरी ॥१६॥
Verse
नववल्लीरोमराजी सुधाकुम्भायितस्तनी । कल्पमालानिभभुजा चन्द्रखण्ड-नखाञ्चिता ॥१७॥
Verse
सुप्रवाशाङ्गुलीन्यस्तमहारत्नाङ्गुलीयका । नवारुणप्रवालाभ-पाणिदेश-समञ्चिता ॥१८॥
Verse
कम्बुकण्ठी सुचुबुका बिम्बोष्ठी कुन्ददन्तयुक् । कारुण्यरस-निष्यन्द-नेत्रद्वय-सुशोभिता ॥१९॥
Verse
मुक्ताशुचिस्मिता चारुचाम्पेयनिभनासिका । दर्पणाकार-विपुल-कपोल-द्वितयाञ्चिता ॥२०॥
Verse
अनन्तार्क-प्रकाशोद्यन्मणि-ताटङ्क-शोभिता । कोटिसूर्याग्निसङ्काश-नानाभूषण-भूषिता ॥२१॥
Verse
सुगन्धवदना सुभ्रू अर्धचन्द्रललाटिका । पूर्णचन्द्रानना नीलकुटिलालकशोभिता ॥२२॥
Verse
सौन्दर्यसीमा विलसत्-कस्तूरी-तिलकोज्ज्वला । धगद्ध-गायमानोद्यन्मणि-सीमन्त-भूषणा ॥२३॥
Verse
जाज्वल्यमान-सद्रत्न-दिव्यचूडावतंसका । सूर्यार्धचन्द्र-विलसत्-भूषणाञ्चित-वेणिका ॥२४॥
Verse
अत्यर्कानल-तेजोधिमणि-कञ्चुकधारिणी । सद्रत्नाञ्चितविद्योत-विद्युत्कुञ्जाभ-शाटिका ॥२५॥
Verse
नानामणिगणाकीर्ण-हेमाङ्गदसुभूषिता । कुङ्कुमागरु-कस्तूरी-दिव्यचन्दन-चर्चिता ॥२६॥
Verse
स्वोचितौज्ज्वल्य-विविध-विचित्र-मणि-हारिणी । असङ्ख्येय-सुखस्पर्श-सर्वातिशय-भूषणा ॥२७॥
Verse
मल्लिका-पारिजातादि दिव्यपुष्प-स्रगञ्चिता । श्रीरङ्गनिलया पूज्या दिव्यदेशसुशोभिता ॥२८॥
Verse
॥इति श्री-गोदाष्टोत्तरशतनामस्तोत्रं सम्पूर्णम्॥
