stotrasangraha
gaṇāṣṭakam
गणाष्टकम्
Verse
एकदन्तं महाकायं तप्तकाञ्चनसन्निभम् । लम्बोदरं विशालाक्षं वन्देऽहं गणनायकम् ॥१॥
Verse
मौञ्जीकृष्णाजिनधरं नागयज्ञोपवीतिनम् । बालेन्दुशकलं मौलौ वन्देऽहं गणनायकम् ॥२॥
Verse
चित्ररत्न-विचित्राङ्ग-चित्रमालाविभूषितम् । कामरूपधरं देवं वन्देऽहं गणनायकम् ॥३॥
Verse
मूषकोत्तमम् आरुह्य देवासुरमहाहवे । योद्धुकामं महावीर्यं वन्देऽहं गणनायकम् ॥४॥
Verse
गजवक्त्रं सुरश्रेष्ठं कर्णचामरभूषितम् । पाशाङ्कुशधरं देवं वन्देऽहं गणनायकम् ॥५॥
Verse
यक्षकिन्नर-गन्धर्व-सिद्ध-विद्याधरैः सदा । स्तूयमानं महाबाहुं वन्देऽहं गणनायकम् ॥६॥
Verse
अम्बिकाहृदयानन्दं मातृभिः परिवेष्टितम् । भक्तप्रियं मदोन्मत्तं वन्देऽहं गणनायकम् ॥७॥
Verse
सर्वविघ्नकरं देवं सर्वविघ्नविवर्जितम् । सर्वसिद्धिप्रदातारं वन्देऽहं गणनायकम् ॥८॥
Verse
गणाष्टकमिदं पुण्यं यः पठेत् सततं नरः । सिद्ध्यन्ति सर्वकार्याणि विद्यावान् धनवान् भवेत् ॥
