Fetching Data .

Loading verse structure and chapter context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

sahasranAma

kumārīsahasranāmastotram

कुमारीसहस्रनामस्तोत्रम्

Verse

आनन्दभैरव उवाच वद कान्ते सदानन्दस्वरूपानन्दवल्लभे । कुमार्या देवतामुख्याः परमानन्दवर्धनम् ॥१॥

Verse

अष्टोत्तरसहस्राख्यं नाम मङ्गलमद्भुतम् । यदि मे वर्तते विद्ये यदि स्नेहकलामला ॥२॥

Verse

तदा वदस्व कौमारीकृतकर्मफलप्रदम् । महास्तोत्रं कोटिकोटि कन्यादानफलं भवेत् ॥३॥

Verse

आनन्दभैरवी उवाच महापुण्यप्रदं नाथ शृणु सर्वेश्वरप्रिय । अष्टोत्तरसहस्राख्यं कुमार्याः परमाद्भुतम् ॥४॥

Verse

पठित्त्वा धारयित्त्वा वा नरो मुच्येत सङ्कटात् । सर्वत्र दुर्लभं धन्यं धन्यलोकनिषेवितम् ॥५॥

Verse

अणिमाद्यष्टसिद्ध्यङ्गं सर्वानन्दकरं परम् । मायामन्त्रनिरस्ताङ्गं मन्त्रसिद्धिप्रदे नृणाम् ॥६॥

Verse

न पूजा न जपं स्नानं पुरश्चर्याविधिश्च न । अकस्मात् सिद्धिमवाप्नोति सहस्रनामपाठतः ॥७॥

Verse

सर्वयज्ञफलं नाथ प्राप्नोति साधकः क्षणात् । मन्त्रार्थं मन्त्रचैतन्यं योनिमुद्रास्वरूपकम् ॥८॥

Verse

कोटिवर्षशतेनापि फलं वक्तुं न शक्यते । तथापि वक्तुमिच्छामि हिताय जगतां प्रभो ॥९॥

Verse

अस्याः श्रीकुमार्याः सहस्रनामकवचस्य वटुकभैरवऋषिः । अनुष्टुप्छन्दः । कुमारीदेवता । सर्वमन्त्रसिद्धिसमृद्धये विनियोगः ॥१०॥

Verse

ॐ कुमारी कौशिकी काली कुरुकुल्ला कुलेश्वरी । कनकाभा काञ्चनाभा कमला कालकामिनी ॥११॥

Verse

कपालिनी कालरूपा कौमारी कुलपालिका । कान्ता कुमारकान्ता च कारणा करिगामिनी ॥१२॥

Verse

कन्धकान्ता कौलकान्ता कृतकर्मफलप्रदा । कार्याकार्यप्रिया कक्षा कंसहन्त्री कुरुक्षया ॥१३॥

Verse

कृष्णकान्ता कालरात्रिः कर्णेषुधारिणीकरा । कामहा कपिला काला कालिका कुरुकामिनी ॥१४॥

Verse

कुरुक्षेत्रप्रिया कौला कुन्ती कामातुरा कचा । कलञ्जभक्षा कैकेयी काकपुच्छध्वजा कला ॥१५॥

Verse

कमला कामलक्ष्मी च कमलाननकामिनी । कामधेनुस्वरूपा च कामहा काममदीनी ॥१६॥

Verse

कामदा कामपूज्या च कामातीता कलावती । भैरवी कारणाढ्या च कैशोरी कुशलाङ्गला ॥१७॥

Verse

कम्बुग्रीवा कृष्णनिभा कामराजप्रियाकृतिः । कङ्कणालङ्कृता कङ्का केवला काकिनी किरा ॥१८॥

Verse

किरातिनी काकभक्षा करालवदना कृशा । केशिनी केशिहा केशा कासाम्बष्ठा करिप्रिया ॥१९॥

Verse

कविनाथस्वरूपा च कटुवाणी कटुस्थिता । कोटरा कोटराक्षी च करनाटकवासिनी ॥२०॥

Verse

कटकस्था काष्ठसंस्था कन्दर्पा केतकी प्रिया । केलिप्रिया कम्बलस्था कालदैत्यविनाशिनी ॥२१॥

Verse

केतकीपुष्पशोभाढ्या कर्पूरपूर्णजिह्विका । कर्पूराकरकाकोला कैलासगिरिवासिनी ॥२२॥

Verse

कुशासनस्था कादम्बा कुञ्जरेशी कुलानना । खर्बा खड्गधरा खड्गा खलहा खलबुद्धिदा ॥२३॥

Verse

खञ्जना खररूपा च क्षाराम्लतिक्तमध्यगा । खेलना खेटककरा खरवाक्या खरोत्कटा ॥२४॥

Verse

खद्योतचञ्चला खेला खद्योता खगवाहिनी । खेटकस्था खलाखस्था खेचरी खेचरप्रिया ॥२५॥

Verse

खचरा खरप्रेमा खलाढ्या खचरानना । खेचरेशी खरोग्रा च खेचरप्रियभाषिणी ॥२६॥

Verse

खर्जूरासवसंमत्ता खर्जूरफलभोगिनी । खातमध्यस्थिता खाता खाताम्बुपरिपूरिणी ॥२७॥

Verse

ख्यातिः ख्यातजलानन्दा खुलना खञ्जनागतिः । खल्वा खलतरा खारी खरोद्वेगनिकृन्तनी ॥२८॥

Verse

गगनस्था च भीता च गभीरनादिनी गया । गङ्गा गभीरा गौरी च गणनाथ प्रिया गतिः ॥२९॥

Verse

गुरुभक्ता ग्वालिहीना गेहिनी गोपिनी गिरा । गोगणस्था गाणपत्या गिरिजा गिरिपूजिता ॥३०॥

Verse

गिरिकान्ता गणस्था च गिरिकन्या गणेश्वरी । गाधिराजसुता ग्रीवा गुर्वी गुर्व्यम्बशाङ्करी ॥३१॥

Verse

गन्धर्व्वकामिनी गीता गायत्री गुणदा गुणा । गुग्गुलुस्था गुरोः पूज्या गीतानन्दप्रकाशिनी ॥३२॥

Verse

गयासुरप्रियागेहा गवाक्षजालमध्यगा । गुरुकन्या गुरोः पत्नी गहना गुरुनागिनी ॥३३॥

Verse

गुल्फवायुस्थिता गुल्फा गर्द्दभा गर्द्दभप्रिया । गुह्या गुह्यगणस्था च गरिमा गौरिका गुदा ॥३४॥

Verse

गुदोर्ध्वस्था च गलिता गणिका गोलका गला । गान्धर्वी गाननगरी गन्धर्वगणपूजिता ॥३५॥

Verse

घोरनादा घोरमुखी घोरा घर्मनिवारिणी । घनदा घनवर्णा च घनवाहनवाहना ॥३६॥

Verse

घर्घरध्वनिचपला घटाघटपटाघटा । घटिता घटना घोना घनरुप घनेश्वरी ॥३७॥

Verse

घुण्यातीता घर्घरा च घोराननविमोहिनी । घोरनेत्रा घनरुचा घोरभैरव कन्यका ॥३८॥

Verse

घाताघातकहा घात्या घ्राणाघ्राणेशवायवी । घोरान्धकारसंस्था च घसना घस्वरा घरा ॥३९॥

Verse

घोटकेस्था घोटका च घोटकेश्वरवाहना । घननीलमणिश्यामा घर्घरेश्वरकामिनी ॥४०॥

Verse

ङकारकूटसम्पन्ना ङकारचक्रगामिनी । ङकारी ङसंशा चैव ङीपनीता ङकारिणी ॥४१॥

Verse

चन्द्रमण्डलमध्यस्था चतुरा चारुहासिनी । चारुचन्द्रमुखी चैव चलङ्गमगतिप्रिया ॥४२॥

Verse

चञ्चला चपला चण्डी चेकिताना चरुस्थिता । चलिता चानना चार्व्वो चारुभ्रमरनादिनी ॥४३॥

Verse

चौरहा चन्द्रनिलया चैन्द्री चन्द्रपुरस्थिता । चक्रकौला चक्ररूपा चक्रस्था चक्रसिद्धिदा ॥४४॥

Verse

चक्रिणी चक्रहस्ता च चक्रनाथकुलप्रिया । चक्राभेद्या चक्रकुला चक्रमण्डलशोभिता ॥४५॥

Verse

चक्रेश्वरप्रिया चेला चेलाजिनकुशोत्तरा । चतुर्वेदस्थिता चण्डा चन्द्रकोटिसुशीतला ॥४६॥

Verse

चतुर्गुणा चन्द्रवर्णा चातुरी चतुरप्रिया । चक्षुःस्था चक्षुवसतिश्चणका चणकप्रिया ॥४७॥

Verse

चार्व्वङ्गी चन्द्रनिलया चलदम्बुजलोचना । चर्व्वरीशा चारुमुखी चारुदन्ता चरस्थिता ॥४८॥

Verse

चसकस्थासवा चेता चेतःस्था चैत्रपूजिता । चाक्षुषी चन्द्रमलिनी चन्द्रहासमणिप्रभा ॥४९॥

Verse

छलस्था छुद्ररूपा च छत्रच्छायाछलस्थिता । छलज्ञा छेश्वराछाया छाया छिन्नशिवा छला ॥५०॥

Verse

छत्राचामरशोभाढ्या छत्रिणां छत्रधारिणी । छिन्नातीता छिन्नमस्ता छिन्नकेशा छलोद्भवा ॥५१॥

Verse

छलहा छलदा छाया छन्ना छन्नजनप्रिया । छलछिन्ना छद्मवती छद्मसद्मनिवासिनी ॥५२॥

Verse

छद्मगन्धा छदाछन्ना छद्मवेशी छकारिका । छगला रक्तभक्षा च छगलामोदरक्तपा ॥५३॥

Verse

छगलण्डेशकन्या च छगलण्डकुमारिका । छुरिका छुरिककरा छुरिकारिनिवाशिनी ॥५४॥

Verse

छिन्ननाशा छिन्नहस्ता छोणलोला छलोदरी । छलोद्वेगा छाङ्गबीजमाला छाङ्गवरप्रदा ॥५५॥

Verse

जटिला जठरश्रीदा जरा जज्ञप्रिया जया । जन्त्रस्था जीवहा जीवा जयदा जीवयोगदा ॥५६॥

Verse

जयिनी जामलस्था च जामलोद्भवनायिका । जामलप्रियकन्या च जामलेशी जवाप्रिया ॥५७॥

Verse

जवाकोटिसमप्रख्या जवापुष्पप्रिया जना । जलस्था जगविषया जरातीता जलस्थिता ॥५८॥

Verse

जीवहा जीवकन्या च जनार्द्दनकुमारिका । जतुका जलपूज्या च जगन्नाथादिकामिनी ॥५९॥

Verse

जीर्णाङ्गी जीर्णहीना च जीमूतात्त्यन्तशोभिता । जामदा जमदा जृम्भा जृम्भणास्त्रादिधारिणी ॥६०॥

Verse

जघन्या जारजा प्रीता जगदानन्दवद्धीनी । जमलार्जुनदर्पघ्नी जमलार्जुनभञ्जिनी ॥६१॥

Verse

जयित्रीजगदानन्दा जामलोल्लाससिद्धिदा । जपमाला जाप्यसिद्धिर्जपयज्ञप्रकाशिनी ॥६२॥

Verse

जाम्बुवती जाम्बवतः कन्यकाजनवाजपा । जवाहन्त्री जगद्बुद्धिर्ज्जगत्कर्तृ जगद्गतिः ॥६३॥

Verse

जननी जीवनी जाया जगन्माता जनेश्वरी । झङ्कला झङ्कमध्यस्था झणत्कारस्वरूपिणी ॥६४॥

Verse

झणत्झणद्वह्निरूपा झननाझन्दरीश्वरी । झटिताक्षा झरा झञ्झा झर्झरा झरकन्यका ॥६५॥

Verse

झणत्कारी झना झन्ना झकारमालयावृता । झङ्करी झर्झरी झल्ली झल्वेश्वरनिवासिनी ॥६६॥

Verse

ञकारी ञकिराती च ञकारबीजमालिनी । ञनयोऽन्ता ञकारान्ता ञकारपरमेश्वरी ॥६७॥

Verse

ञान्तबीजपुटाकारा ञेकले ञैकगामिनी । ञैकनेला ञस्वरूपा ञहारा ञहरीतकी ॥६८॥

Verse

टुन्टुनी टङ्कहस्ता च टान्तवर्गा टलावती । टपला टापबालाख्या टङ्कारध्वनिरूपिणी ॥६९॥

Verse

टलाती टाक्षरातीता टित्कारादिकुमारिका । टङ्कास्त्रधारिणी टाना टमोटार्णलभाषिणी ॥७०॥

Verse

टङ्कारी विधना टाका टकाटकविमोहिनी । टङ्कारधरनामाहा टिवीखेचरनादिनी ॥७१॥

Verse

ठठङ्कारी ठाठरूपा ठकारबीजकारणा । डमरूप्रियवाद्या च डामरस्था डबीजिका ॥७२॥

Verse

डान्तवर्गा डमरुका डरस्था डोरडामरा । डगरार्द्धा डलातीता डदारुकेश्वरी डुता ॥७३॥

Verse

ढार्द्धनारीश्वरा ढामा ढक्कारी ढलना ढला । ढकेस्था ढेश्वरसुता ढेमनाभावढोनना ॥७४॥

Verse

णोमाकान्तेश्वरी णान्तवर्गस्था णतुनावती । णनो माणाङ्ककल्याणी णाक्षवीणाक्षबीजिका ॥७५॥

Verse

तुलसीतन्तुसूक्ष्माख्या तारल्या तैलगन्धिका । तपस्या तापससुता तारिणी तरुणी तला ॥७६॥

Verse

तन्त्रस्था तारकब्रह्मस्वरूपा तन्तुमध्यगा । तालभक्षत्रिधामूत्तीस्तारका तैलभक्षिका ॥७७॥

Verse

तारोग्रा तालमाला च तकरा तिन्तिडीप्रिया । तपसः तालसन्दर्भा तर्जयन्ती कुमारिका ॥७८॥

Verse

तोकाचारा तलोद्वेगा तक्षका तक्षकप्रिया । तक्षकालङ्कृता तोषा तावद्रूपा तलप्रिया ॥७९॥

Verse

तलास्त्रधारिणी तापा तपसां फलदायिनी । तल्वल्वप्रहरालीता तलारिगणनाशिनी ॥८०॥

Verse

तूला तौली तोलका च तलस्था तलपालिका तरुणा तप्तबुद्धिस्थास्तप्ता प्रधारिणी तपा ॥८१॥

Verse

तन्त्रप्रकाशकरणी तन्त्रार्थदायिनी तथा । तुषारकिरणाङ्गी च चतुर्धा वा समप्रभा ॥८२॥

Verse

तैलमार्गाभिसूता च तन्त्रसिद्धिफलप्रदा । ताम्रपर्णा ताम्रकेशा ताम्रपात्रप्रियातमा ॥८३॥

Verse

तमोगुणप्रिया तोला तक्षकारिनिवारिणी । तोषयुक्ता तमायाची तमषोढेश्वरप्रिया ॥८४॥

Verse

तुलना तुल्यरुचिरा तुल्यबुद्धिस्त्रिधा मतिः । तक्रभक्षा तालसिद्धिः तत्रस्थास्तत्र गामिनी ॥८५॥

Verse

तलया तैलभा ताली तन्त्रगोपनतत्परा । तन्त्रमन्त्रप्रकाशा च त्रिशरेणुस्वरूपिणी ॥८६॥

Verse

त्रिंशदर्थप्रिया तुष्टा तुष्टिस्तुष्टजनप्रिया । थकारकूटदण्डीशा थदण्डीशप्रियाऽथवा ॥८७॥

Verse

थकाराक्षररूढाङ्गी थान्तवर्गाथ कारिका । थान्ता थमीश्वरी थाका थकारबीजमालिनी ॥८८॥

Verse

दक्षदामप्रिया दोषा दोषजालवनाश्रिता । दशा दशनघोरा च देवीदासप्रिया दया ॥८९॥

Verse

दैत्यहन्त्रीपरा दैत्या दैत्यानां मद्दीनी दिशा । दान्ता दान्तप्रिया दासा दामना दीर्घकेशिका ॥९०॥

Verse

दशना रक्तवर्णा च दरीग्रहनिवासिनी देवमाता च दुर्लभा च दीर्घाङ्गा दासकन्यका ॥९१॥

Verse

दशनश्री दीर्घनेत्रा दीर्घनासा च दोषहा । दमयन्ती दलस्था च द्वेष्यहन्त्री दशस्थिता ॥९२॥

Verse

दैशेषिका दिशिगता दशनास्त्रविनाशिनी दारिद्र्यहा दरिद्रस्था दरिद्रधनदायिनी ॥९३॥

Verse

दन्तुरा देशभाषा च देशस्था देशनायिका । द्वेषरूपा द्वेषहन्त्री द्वेषारिगणमोहिनी ॥९४॥

Verse

दामोदरस्थाननादा दलानां बलदायिनी । दिग्दर्शना दर्शनस्था दर्शनप्रियवादिनी ॥९५॥

Verse

दामोदरप्रिया दान्ता दामोदरकलेवरा । द्राविणी द्रविणी दक्षा दक्षकन्या दलदृढा ॥९६॥

Verse

दृढासनादासशक्तिर्द्वन्द्वयुद्धप्रकाशिनी । दधिप्रिया दधिस्था च दधिमङ्गलकारिणी ॥९७॥

Verse

दर्पहा दर्पदा दृप्ता दर्भपुण्यप्रिया दधिः । दर्भस्था द्रुपदसुता द्रौपदी द्रुपदप्रिया ॥९८॥

Verse

धर्मचिन्ता धनाध्यक्षा धश्वेश्वरवरप्रदा । धनहा धनदा धन्वी धनुर्हस्ता धनुःप्रिया ॥९९॥

Verse

धरणी धैर्यरूपा च धनस्था धनमोहिनी । धोरा धीरप्रियाधारा धराधारणतत्परा ॥१००॥

Verse

धान्यदा धान्यबीजा च धर्माधर्मस्वरूपिणी । धाराधरस्था धन्या च धर्मपुञ्जनिवासिनी ॥१०१॥

Verse

धनाढ्यप्रियकन्या च धन्यलोकैश्च सेविता । धर्मार्थकाममोक्षाङ्गी धर्मार्थकाममोक्षदा ॥१०२॥

Verse

धराधरा धुरोणा च धवला धवलामुखी । धरा च धामरूपा च ध्रुवा ध्रौव्या ध्रुवप्रिया ॥१०३॥

Verse

धनेशी धारणाख्या च धर्मनिन्दाविनाशिनी । धर्मतेजोमयी धर्म्म्या धैर्याग्रभर्गमोहिनी ॥१०४॥

Verse

धारणा धौतवसना धत्तूरफलभोगिनी । नारायणी नरेन्द्रस्था नारायणकलेवरा ॥१०५॥

Verse

नरनारायणप्रीता धर्मनिन्दा नमोहिता । नित्या नापितकन्या च नयनस्था नरप्रिया ॥१०६॥

Verse

नाम्नी नामप्रिया नारा नारायणसुता नरा । नवीननायकप्रीता नव्या नवफलप्रिया ॥१०७॥

Verse

नवीनकुसुमप्रीता नवीनानां ध्वजानुता । नारी निम्बस्थितानन्दानन्दिनी नन्दकारिका ॥१०८॥

Verse

नवपुष्पमहाप्रीता नवपुष्पसुगन्धिका । नन्दनस्था नन्दकन्या नन्दमोक्षप्रदायिनी ॥१०९॥

Verse

नमिता नामभेदा च नाम्नार्त्तवनमोहिनी । नवबुद्धिप्रियानेका नाकस्था नामकन्यका ॥११०॥

Verse

निन्दाहीना नवोल्लासा नाकस्थानप्रदायिनी । निम्बवृक्षस्थिता निम्बा नानावृक्षनिवासिनी ॥१११॥

Verse

नाश्यातीता नीलवर्णा नीलवर्णा सरस्वती । नभःस्था नायकप्रीता नायकप्रियकामिनी ॥११२॥

Verse

नैववर्णा निराहारा निवीहाणां रजःप्रिया । निम्ननाभिप्रियाकारा नरेन्द्रहस्तपूजिता ॥११३॥

Verse

नलस्थिता नलप्रीता नलराजकुमारिका । परेश्वरी परानन्दा परापरविभेदिका ॥११४॥

Verse

परमा परचक्रस्था पार्वती पर्वतप्रिया । पारमेशी पर्वनाना पुष्पमाल्यप्रिया परा ॥११५॥

Verse

परा प्रिया प्रीतिदात्री प्रीतिः प्रथमकामिनी । प्रथमा प्रथमा प्रीता पुष्पगन्धप्रिया परा ॥११६॥

Verse

पौष्यी पानरता पीना पीनस्तनसुशोभना । परमानरता पुंसां पाशहस्ता पशुप्रिया ॥११७॥

Verse

पललानन्दरसिका पलालधूमरूपिणी । पलाशपुष्पसङ्काशा पलाशपुष्पमालिनी ॥११८॥

Verse

प्रेमभूता पद्ममुखी पद्मरागसुमालिनी । पद्ममाला पापहरा पतिप्रेमविलासिनी ॥११९॥

Verse

पञ्चाननमनोहारी पञ्चवक्त्रप्रकाशिनी । फलमूलाशना फाली फलदा फाल्गुनप्रिया ॥१२०॥

Verse

फलनाथप्रिया फल्ली फल्गुकन्या फलोन्मुखी । फेत्कारीतन्त्रमुख्या च फेत्कारगणपूजिता ॥१२१॥

Verse

फेरवी फेरवसुता फलभोगोद्भवा फला । फलप्रिया फलाशक्ता फाल्गुनानन्ददायिनी ॥१२२॥

Verse

फालभोगोत्तरा फेला फुलाम्भोजनिवासिनी । वसुदेवगृहस्था च वासवी वीरपूजिता ॥१२३॥

Verse

विषभक्षा बुधसुता ब्लुङ्कारी ब्लूवरप्रदा । ब्राह्मी बृहस्पतिसुता वाचस्पतिवरप्रदा ॥१२४॥

Verse

वेदाचारा वेद्यपरा व्यासवक्त्रस्थिता विभा । बोधज्ञा वौषडाख्या च वंशीवन्दनपूजिता ॥१२५॥

Verse

वज्रकान्ता वज्रगतिर्बदरीवंशविवद्धीनी । भारती भवरश्रीदा भवपत्नी भवात्मजा ॥१२६॥

Verse

भवानी भाविनी भीमा भिषग्भार्या तुरिस्थिता । भूर्भुवःस्वःस्वरूपा च भृशार्त्ता भेकनादिनी ॥१२७॥

Verse

भौती भङ्गप्रिया भङ्गभङ्गहा भङ्गहारिणी । भर्ता भगवती भाग्या भगीरथनमस्कृता ॥१२८॥

Verse

भगमाला भूतनाथेश्वरी भार्गवपूजिता । भृगुवंशा भीतिहरा भूमिर्भुजगहारिणी ॥१२९॥

Verse

भालचन्द्राभभल्वबाला भवभूतिवीभूतिदा । मकरस्था मत्तगतिर्मदमत्ता मदप्रिया ॥१३०॥

Verse

मदिराष्टादशभुजा मदिरा मत्तगामिनी । मदिरासिद्धिदा मध्या मदान्तर्गतिसिद्धिदा ॥१३१॥

Verse

मीनभक्षा मीनरूपा मुद्रामुद्गप्रिया गतिः । मुषला मुक्तिदा मूर्त्ता मूकीकरणतत्परा ॥१३२॥

Verse

मृषार्त्ता मृगतृष्णा च मेषभक्षणतत्परा । मैथुनानन्दसिद्धिश्च मैथुनानलसिद्धिदा ॥१३३॥

Verse

महालक्ष्मीर्भैरवी च महेन्द्रपीठनायिका । मनःस्था माधवीमुख्या महादेवमनोरमा ॥१३४॥

Verse

यशोदा याचना यास्या यमराजप्रिया यमा । यशोराशिविभूषाङ्गी यतिप्रेमकलावती ॥१३५॥

Verse

रमणी रामपत्नी च रिपुहा रीतिमध्यगा । रुद्राणी रूपदा रूपा रूपसुन्दरधारिणी ॥१३६॥

Verse

रेतःस्था रेतसः प्रीता रेतःस्थाननिवासिनी । रेन्द्रादेवसुतारेदा रिपुवर्गान्तकप्रिया ॥१३७॥

Verse

रोमावलीन्द्रजननी रोमकूपजगत्पतिः । रौप्यवर्णा रौद्रवर्णा रौप्यालङ्कारभूषणा ॥१३८॥

Verse

रङ्गिणा रङ्गरागस्था रणवह्निकुलेश्वरी । लक्ष्मीः लाङ्गलहस्ता च लाङ्गली कुलकामिनी ॥१३९॥

Verse

लिपिरूपा लीढपादा लतातन्तुस्वरूपिणी । लिम्पती लेलिहा लोला लोमशप्रियसिद्धिदा ॥१४०॥

Verse

लौकिकी लौकिकीसिद्धिर्लङ्कानाथकुमारिका । लक्ष्मणा लक्ष्मीहीना च लप्रिया लार्णमध्यगा ॥१४१॥

Verse

विवसा वसनावेशा विवस्यकुलकन्यका । वातस्था वातरूपा च वेलमध्यनिवासिनी ॥१४२॥

Verse

श्मशानभूमिमध्यस्था श्मशानसाधनप्रिया । शवस्था परसिद्ध्यर्थी शववक्षसि शोभिता ॥१४३॥

Verse

शरणागतपाल्या च शिवकन्या शिवप्रिया । षट्चक्रभेदिनी षोढा न्यासजालदृढानना ॥१४४॥

Verse

सन्ध्यासरस्वती सुन्द्या सूर्यगा शारदा सती । हरिप्रिया हरहालालावण्यस्था क्षमा क्षुधा ॥१४५॥

Verse

क्षेत्रज्ञा सिद्धिदात्री च अम्बिका चापराजिता । आद्या इन्द्रप्रिया ईशा उमा ऊढा ऋतुप्रिया ॥१४६॥

Verse

सुतुण्डा स्वरबीजान्ता हरिवेशादिसिद्धिदा । एकादशीव्रतस्था च एन्द्री ओषधिसिद्धिदा ॥१४७॥

Verse

औपकारी अंशरूपा अस्त्रबीजप्रकाशिनी । इत्येतत् कामुकीनाथ कुमारीणां सुमङ्गलम् ॥१४८॥

Verse

त्रैलोक्यफलदं नित्यमष्टोत्तरसहस्रकम् । महास्तोत्रं धर्मसारं धनधान्यसुतप्रदम् ॥१४९॥

Verse

सर्वविद्याफलोल्लासं भक्तिमान् यः पठेत् सुधीः । स सर्वदा दिवारात्रौ स भवेन्मुक्तिमार्गगः ॥१५०॥

Verse

सर्वत्र जयमाप्नोति वीराणां वल्लभो लभेत् । सर्वे देवा वशं यान्ति वशीभूताश्च मानवाः ॥१५१॥

Verse

ब्रह्माण्डे ये च शंसन्ति ते तुष्टा नात्र संशयः । ये वशन्ति च भूर्लोके देवतुल्यपराक्रमाः ॥१५२॥

Verse

ते सर्वे भृत्यतुल्याश्च सत्यं सत्यं कुलेश्वर । अकस्मात् सिद्धिमाप्नोति होमेन यजनेन च ॥१५३॥

Verse

जाप्येन कवचाद्येन महास्तोत्रार्थपाठतः । विना यज्ञैवीना दानैवीना जाप्यैर्लभेत् फलम् ॥१५४॥

Verse

यः पठेत् स्तोत्रकं नाम चाष्टोत्तरसहस्रकम् । तस्य शान्तिर्भवेत् क्षिप्रं कन्यास्तोत्रं पठेत्ततः ॥१५५॥

Verse

वारत्रयं प्रपाठेन राजानं वशमानयेत् । वारैकपठितो मन्त्री धर्मार्थकाममोक्षभाक् ॥१५६॥

Verse

त्रिदिनं प्रपठेद्विद्वान् यदि पुत्रं समिच्छति । वारत्रयक्रमेणैव वारैकक्रमतोऽपि वा ॥१५७॥

Verse

पठित्त्वा धनरत्नानामधिपः सर्ववित्तगः । त्रिजगन्मोहयेन्मन्त्री वत्सरार्द्धं प्रपाठतः ॥१५८॥

Verse

वत्सरं वाप्य यदि वा भक्तिभावेन यः पठेत् । चिरजीवी खेचरत्त्वं प्राप्य योगी भवेन्नरः ॥१५९॥

Verse

महादूरस्थितं वर्णं पश्यति स्थिरमानसः । महिलामण्डले स्थित्त्वा शक्तियुक्तः पठेत् सुधीः ॥१६०॥

Verse

स भवेत्साधकश्रेष्ठः क्षीरी कल्पद्रुमो भवेत् । सर्वदा यः पठेन्नाथ भावोद्गतकलेवरः ॥१६१॥

Verse

दर्शनात् स्तम्भनं कर्त्तुं क्षमो भवति साधकः । जलादिस्तम्भने शक्तो वह्निस्तम्भादिसिद्धिभाक् ॥१६२॥

Verse

वायुवेगी महावाग्मी वेदज्ञो भवति ध्रुवम् । कविनाथो महाविद्यो वन्धकः पण्डितो भवेत् ॥१६३॥

Verse

सर्वदेशाधिपो भूत्त्वा देवीपुत्रः स्वयं भवेत् । कान्तिं श्रियं यशो वृद्धिं प्राप्नोति बलवान् यतिः ॥१६४॥

Verse

अष्टसिद्धियुतो नाथ यः पठेदर्थसिद्धये । उज्जटेऽरण्यमध्ये च पर्वते घोरकानने ॥१६५॥

Verse

वने वा प्रेतभूमौ च शवोपरि महारणे । ग्रामे भग्नगृहे वापि शून्यागारे नदीतटे ॥१६६॥

Verse

गङ्गागर्भे महापीठे योनिपीठे गुरोर्गृहे । धान्यक्षेत्रे देवगृहे कन्यागारे कुलालये ॥१६७॥

Verse

प्रान्तरे गोष्ठमध्ये वा राजादिभयहीनके । निर्भयादिस्वदेशेषु शिलिङ्गालयेऽथवा ॥१६८॥

Verse

भूतगर्त्ते चैकलिङ्गै वा शून्यदेशे निराकुले । अश्वत्थमूले बिल्वे वा कुलवृक्षसमीपगे ॥१६९॥

Verse

अन्येषु सिद्धदेशेषु कुलरूपाश्च साधकः । दिव्ये वा वीरभावस्थो यष्ट्वा कन्यां कुलाकुलै ॥१७०॥

Verse

कुलद्रव्यैश्च विविधैः सिद्धिद्रव्यैश्च साधकः । मांसासवेन जुहुयान्मुक्तेन रसेन च ॥१७१॥

Verse

हुतशेषं कुलद्रव्यं ताभ्यो दद्यात् सुसिद्धये । तासामुच्छिष्टमानीय जुहुयाद् रक्तपङ्कजे ॥१७२॥

Verse

घृणालज्जाविनिर्मुक्तः साधकः स्थिरमानसः । पिबेन्मांसरसं मन्त्री सदानन्दो महाबली ॥१७३॥

Verse

महामांसाष्टकं ताभ्यो मदिराकुम्भपूरितम् । तारो माया रमावह्निजायामन्त्रं पठेत् सुधीः ॥१७४॥

Verse

निवेद्य विधिनानेन पठित्त्वा स्तोत्रमङ्गलम् । स्वयं प्रसादं भुक्त्वा हि सर्वविद्याधिपो भवेत् ॥१७५॥

Verse

शूकरस्योष्ट्र्मांसेन पीनमीनेन मुद्रया । महासवघटेनापि दत्त्वा पठति यो नरः ॥१७६॥

Verse

ध्रुवं स सर्वगामी स्याद् विना होमेन पूजया । रुद्ररूपो भवेन्नित्यं महाकालात्मको भवेत् ॥१७७॥

Verse

सर्वपुण्यफलं नाथ क्षणात् प्राप्नोति साधकः । क्षीराब्धिरत्नकोषेशो वियद्व्यापी च योगिराट् ॥१७८॥

Verse

भक्त्याह्लादं दयासिन्धुं निष्कामत्त्वं लभेद् ध्रुवम् । महाशत्रुपातने च महाशत्रुभयाद्दीते ॥१७९॥

Verse

वारैकपाठमात्रेण शत्रूणां वधमानयेत् । समर्दयेत् शत्रून् क्षिप्रमन्धकारं यथा रविः ॥१८०॥

Verse

उच्चाटने मारणे च भये घोरतरे रिपौ । पठनाद्धारणान्मर्त्त्यो देवा वा राक्षसादयः ॥१८१॥

Verse

प्राप्नुवन्ति झटित् शान्तिं कुमारीनामपाठतः । पुरुषो दक्षिणे बाहौ नारी वामकरे तथा ॥१८२॥

Verse

धृत्वा पुत्रादिसम्पत्तिं लभते नात्र संशयः ॥१८३॥

Verse

ममाज्ञया मोक्षमुपैति साधको गजान्तकं नाथ सहस्रनाम च । पठेन्मनुष्यो यहि भक्तिभावत- स्तदा हि सर्वत्र फलोदयं लभेत् च ॥१८४॥

Verse

मोक्षं सत्फलभोगिनां स्तववरं सारं परानन्ददं ये नित्यं हि मुदा पठन्ति विफलं सार्थञ्च चिन्ताकुलाः ते नित्याः प्रभवन्ति कीतीकमले श्रीरामतुल्यो जये कन्दर्पायुततुल्यरूपगुणिनः क्रोधे च रुद्रोपमाः ॥१८५॥

Verse

॥

Verse

इति श्रीरुद्रयामले उत्तरतन्त्रे महातन्त्रोद्दीपने कुमार्युपचर्याविन्यासे सिद्धमन्त्र-प्रकरणे दिव्यभावनिर्णये अष्टोत्तरसहस्रनाममङ्गलोल्लासे दशमपटले श्रीकुमारीसहस्रनामस्तोत्रम् सम्पूर्णम् ॥

śrī śivasahasranāmastotram
śrīkṛṣṇacaitanyasahasranāmastotram

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms