Fetching Data .

Loading verse structure and chapter context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

kavaca

hākinīśaktikavacam

हाकिनीशक्तिकवचम्

Verse

अथ चतुरशीतितमः पटलः श्रीआनन्दभैरव उवाच अथादौ कथयानन्दभैरवि प्राणवल्लभे । कवचं हाकिनीदेव्याः परमानन्दवर्धनम् ॥८४-१॥

Verse

हेतुयुक्तं श्रद्धया मे करुणासागरस्थिते । शीघ्रं विरचयानन्द कवचं सारमङ्गलम् ॥८४-२॥

Verse

श्रीआनन्दभैरवी उवाच आदौ श‍ृणु महावीर परमानन्दसागर । कवचं हाकिनीदेव्याः संसारार्णवतारकम् ॥८४-३॥

Verse

यस्य स्मरणमात्रेण योगी योगस्थिरो भवेत् । अन्तरिक्षे च भूलोके पाताले ये चराचराः ॥८४-४॥

Verse

स्तम्भिता वेपमानाः स्युर्विद्याज्ञानादिपाठतः । कवचध्वनिमात्रेण भूतप्रेतपिशाचकाः ॥८४-५॥

Verse

विद्रवन्ति भयार्ता वै कालरुद्रप्रभावतः । यथाऽऽलोको वह्निमध्ये स्थिरो भवति निश्चितम् ॥८४-६॥

Verse

ॐ अस्याः श्रीहाकिनीदेव्याः सानन्दसारमङ्गलस्य महाकवचस्य सदाशिव ऋषिर्गायत्रीच्छन्दः श्रीहाकिनीपरदेवता क्लीं बीजं स्वाहा शक्तिः सिद्धलक्ष्मीमूलकीलकं देहान्तर्गत महाकामसिद्ध्यर्थे जपे विनियोगः । ॐ पातु शीर्षचक्रं मे क्लीं पातु भालमण्डलम् । स्वमूलं पातु मे नित्यं लोचनत्रितयं मम ॥८४-६॥

Verse

गण्डयुग्मं सदा पातु वाग्भवाद्या मनोरमा । श्रीं ह्रीं पातु कर्णयुग्मं हाकिनी परदेवता ॥८४-७॥

Verse

महाविद्या सदा पातु ममोष्ठाधरसम्पुटम् । दन्तावलियुगं पातु ह्रीं श्रीं स्वाहा परेश्वरी ॥८४-९॥

Verse

क्लीं ह्रीं श्रीं हाकिनीदेवी स्वाहा पातु रसप्रियाम् । सृक्कनीं पातु सततं शक्तिः कामवरा मधुः ॥८४-१०॥

Verse

स्वाहा पातु शिखा शक्तिर्भ्रूमध्यं पातु सर्वदा । हाकिनी मण्डलं पातु परानाथेश्वरी परा ॥८४-११॥

Verse

सुन्दरी सर्वदा पातु द्विदलं कामसुन्दरी । अमृताख्या सदा पातु भ्रूप्रकाशस्थलं मम ॥८४-१२॥

Verse

वह्निज्वाला सदा पातु भ्रूश्मशानस्थलं मम । सुरभी पातु मायास्त्रं स्वाहा मे भ्रूगतच्छदम् ॥८४-१३॥

Verse

त्रिकोणं पातु कामाख्या हाकिनी परमेश्वरी । त्रिपुरा सुन्दरी पातु द्विषट्कोणं सदा मम ॥८४-१४॥

Verse

हिङ्गुलादेश्वरी पातु षट्कोणबिन्दुमण्डलम् । सप्तभूबिम्बमापातु भूतलान्तःप्रकाशिनी ॥८४-१५॥

Verse

महाशतदलं पातु शतकोटिमरुप्रिया । गुरुविद्यामयी पातु वाणी मे मत्तगामिनी ॥८४-१६॥

Verse

चतुर्द्वारं सर्वचक्रं पातु मे परमेश्वरी । अत्यन्तदुःखहन्त्री मे मनश्चक्रं सदाऽवतु ॥८४-१७॥

Verse

शब्दब्रह्ममयी पातु चन्द्रमण्डलमेव मे । अकालतारिणी दुर्गा सर्गस्थित्यन्तकारिणी ॥८४-१८॥

Verse

महापुरुषसंस्थानं हाकिनी मण्डलं मम । पातु वर्णमयी तारा चन्द्रार्धं मे सुरेश्वरी ॥८४-१९॥

Verse

उन्मनीनगरं पातु वह्निकुण्डनिवासिनी । मदिरा पातु सततं भालं विषहरा मम ॥८४-२०॥

Verse

धर्मदा ज्ञानदा पातु धर्मज्ञानपदं मम । तालपत्नीश्वरी पातु अमृतानन्दकारिणी ॥८४-२१॥

Verse

वैराग्यनिकरं पातु बिन्दुस्थानं महाबला । त्रितारी कूटशक्तिर्मे सदा पातु विशुद्धकम् ॥८४-२२॥

Verse

शाकिनीशं सदा पातु शाकिनी कुलभैरवी । सप्तद्वीपेश्वरी पातु मम षोडशपङ्कजम् ॥८४-२३॥

Verse

शाकिनी भैरवी पातु चण्डदुर्गा सरस्वती । कुमारी कुलजा लक्ष्मीः सिद्धार्थं मे सदाऽवतु ॥८४-२४॥

Verse

हृदयं पातु सततं शाकिनी परमेश्वरी । बीजरूपा सदा देवी महामहिषघातिनी ॥८४-२५॥

Verse

उदरं पातु सततं योगिनीकोटिभिः सह । उमा महेश्वरी पातु प्रचण्डा मम पृष्ठकम् ॥८४-२६॥

Verse

चामुण्डा भैरवी बाला पार्श्वयुग्मं सदाऽवतु । परमा चेश्वरी पातु देवमाता स्तनद्वयम् ॥८४-२७॥

Verse

सौभाग्यहाकिनी देवी पायात्तु यक्षसः प्रियम् । आद्या देवी शिखारूपा भुजयुग्मं सदाऽवतु ॥८४-२८॥

Verse

सर्वापराधहर्त्री मे कामविद्या दशच्छदम् । मणिपूरं सदा पातु दशवर्णात्मिका शिवा ॥८४-२९॥

Verse

नाभिचक्रं सदा पातु लाकिनी पद्मवासिनी । नित्यदेशदलं पातु पार्वती वेदपालिनी ॥८४-३०॥

Verse

महारुद्रेश्वरी पातु पीठरूपं मणिं मम । तेजोमण्डलमापातु रुद्राणी शूलधारिणी ॥८४-३१॥

Verse

अभया सर्वदा पातु योगविद्या नितम्बकम् । नितम्बाधारचक्रं मे पातु शैलं नितम्बिनीम् ॥८४-३२॥

Verse

तरुणी मन्त्रजालस्था वैष्णवी लिङ्गमण्डलम् । सदा पातु हाकिनीशा महाविष्णुस्थलं मम ॥८४-३३॥

Verse

वैष्णवी ललिता माया रमादेवी कटिं मम । स्वाधिष्ठानं सदा पातु गुह्यरूपा सरस्वती ॥८४-३४॥

Verse

भवानी भगवत्पत्नी श्मशानकालिका गुदम् । पातु मे रणमातङ्गी राकिनी कुलमण्डलम् ॥८४-३५॥

Verse

व्यक्ताव्यक्तस्वरूपा मे मूलाधारं सदाऽवतु । चतुर्दलं चतुर्वर्णं पातु मे ज्ञानकुण्डली ॥८४-३६॥

Verse

तपस्विनी सदा पातु पावनी मूलमावतु । रतिका घटिका वेश्या धरिणी कामसुन्दरी ॥८४-३७॥

Verse

वह्निकान्ता सदा पातु ममोरुयुगलं सदा । उल्कामुखी क्षेत्रसिद्धा जङ्घायुग्मं सदाऽवतु ॥८४-३८॥

Verse

बालामुखी पातु सम्पत्प्रदा श्रीकुलभैरवी । पादाम्बुजद्वयं पातु सर्वाङ्गं परहाकिनी ॥८४-३९॥

Verse

मदना मेदिनी धन्या चामुण्डा मुण्डमालिनी । रमा कामकला ज्येष्ठा तथाज्ञा रतिसुन्दरी ॥८४-४०॥

Verse

मनोयोगा सदा पातु निर्मला विमलामला । काञ्चनी बगला रात्रिः पञ्चमी रतिसुन्दरी ॥८४-४१॥

Verse

सर्वत्र सर्वदा पातु योगाद्या प्रेमकातरा । पर्वते विपिने शून्ये रणे घोरतरे भवे ॥८४-४२॥

Verse

श्मशानवासिनी पातु सर्ववाहनवाहना । सर्वास्त्रधारिणी पातु पञ्चमी पञ्चमप्रिया ॥८४-४३॥

Verse

चतुर्भुजा सदा पातु हाकिनी देहदेवता । सहस्रायुतकोटीन्दुवदना परमेश्वरी ॥८४-४४॥

Verse

योगिनीभिः सदा पातु सर्वदेशे तु सर्वदा । अनन्ता सर्वदा पातु महाविघ्नविनाशिनी ॥८४-४५॥

Verse

जले चानलगर्ते वा व्याधिभीतौ रिपोर्भये । व्याघ्रभीतौ चौरभीतौ महोन्मादभयादिषु ॥८४-४६॥

Verse

ग्रहभीतौ देवभीतौ दानवाद्रिभयेषु च । अभया निर्भया भीतिहारिणी भयनाशिनी ॥८४-४७॥

Verse

महाभीमा भद्रकाली भैरवी मारकामला । महाभूतेश्वरी माता जगद्धात्री सदाऽवतु ॥८४-४८॥

Verse

सर्वदेशे सर्वपीठे मातृका पातु नित्यशः । इत्येतत् कवचं सर्वसिद्धिदं दुःखनाशनम् ॥८४-४९॥

Verse

कथितं तव यत्नेन महाकाल प्रभो ! हर । यः पठेत् प्रातरुत्थाय कवचं देवदुर्लभम् ॥८४-५०॥

Verse

स भवेत् कालजेताऽपि स देवो न तु मानुषः । ध्यानात्मा साधकः श्रीमान् परमात्मा भवेत् स्वयम् ॥८४-५१॥

Verse

आज्ञापद्मे स्थिरो भूत्वा नित्यो भवति निश्चितम् । अकालमृत्युहरणं संसारार्णवतारणम् ॥८४-५२॥

Verse

कवचं देवदेवेश चानन्दसारमङ्गलम् । यः पठेदतिभक्त्या च जीवन्मुक्तो भवेद् ध्रुवम् ॥८४-५३॥

Verse

चतुर्विधा मुक्तिमाला तद्गले संस्थिरा ध्रुवम् । भवन्ति योगमुख्यानां गुरुर्वेदान्तपारगः ॥८४-५४॥

Verse

सर्वशास्त्रार्थवेत्ता स्याद् यामलार्थज्ञ ईश्वरः । शान्तिं विद्यां प्रतिष्ठाञ्च निवृत्तिं प्राप्य निर्मलः ॥८४-५५॥

Verse

योगात्मा चेश्वरत्वं हि प्राप्नोति नात्र संशयः । कुजे वा शनिवारे वा सङ्क्रान्त्यां रविवासरे ॥८४-५६॥

Verse

अमावास्यासु रिक्तायां धारयेत् कवचं शुभम् । पुरुषो दक्षिणे हस्ते वामा वामभुजे तथा ॥८४-५७॥

Verse

सर्वसिद्धिमवाप्नोति यद्यन्मनसि वर्तते । गोरोचनाकुङ्कुमेन चालक्तेन विलिख्य च ॥८४-५८॥

Verse

अवश्यं सिद्धिमाप्नोति हाकिनीयोगजापतः ॥८४-५९॥

Verse

इति श्रीरुद्रयामले उत्तरतन्त्रे महातन्त्रोद्दीपने सिद्धमन्त्रप्रकरणे भैरवीभैरवसंवादे हाकिनीकवचं नाम चतुरशीतितमः पटलः ॥८४॥

haridrāgaṇeśakavacam

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms