Fetching Data .

Loading verse structure and chapter context.

GyanDweepBeta
HomeLearnLibrary
eGurukulsDiscoverTemplesPanchanga
Sign Up
Sign Up

kavaca

śrīsadāśivakavacastotram

श्रीसदाशिवकवचस्तोत्रम्

Verse

श्रीदेव्युवाच- भगवन्देवदेवेश सर्वाम्नाय प्रपूजित । सर्वं मे कथितं देव कवचं न प्रकाशितम् ॥१॥

Verse

प्रासादाख्यस्य मन्त्रस्य कवचं मे प्रकाशय । सर्वरक्षाकरं देव यदि स्नेहोऽस्ति मां प्रति ॥२॥

Verse

श्रीभगवानुवाच- प्रासादमन्त्रकवचस्य वामदेवऋषिः । पन्क्तिश्छन्दः । सदाशिवो देवता । सकलाभीष्टसिद्धये जपे विनियोगः । शिरो मे सर्वदा पातु प्रासादाख्यः सदाशिवः । षडक्षरस्वरूपो मे वदनं तु महेश्वरः ॥३॥

Verse

पञ्चाक्षरात्मा भगवान्भुजौ मे परिरक्षतु । मृत्युञ्जयस्त्रिबीजात्मा आस्यं रक्षतु मे सदा ॥४॥

Verse

वटमूलं समासीनो दक्षिणामूर्तिरव्ययः । सदा मां सर्वदः पातु षट्त्रिंशार्णस्वरूपधृक् ॥५॥

Verse

द्वाविंशार्णात्मको रुद्रो दक्षिणः परिरक्षतु । त्रिवर्णात्मा नीलकण्ठः कण्ठं रक्षतु सर्वदा ॥६॥

Verse

चिन्तामणिर्बीजरूपो ह्यर्धनारीश्वरो हरः । सदा रक्षतु मे गुह्यं सर्वसम्पत्प्रदायकः ॥७॥

Verse

एकाक्षरस्वरूपात्मा कूटव्यापी महेश्वरः । मार्तण्डभैरवो नित्यं पादौ मे परिरक्षतु ॥८॥

Verse

तुम्बुराख्यो महाबीजस्वरूपः त्रिपुरान्तकः । सदा मां रणभूमौ च रक्षतु त्रिदशाधिपः ॥९॥

Verse

ऊर्ध्वमूर्द्धानमीशानो मम रक्षतु सर्वदा । दक्षिणास्यं तत्पुरुषः पायान्मे गिरिनायकः ॥१०॥

Verse

अघोराख्यो महादेवः पूर्वास्यं परिरक्षतु । वामदेवः पश्चिमास्यं सदा मे परिरक्षतु ॥११॥

Verse

उत्तरास्यं सदा पातु सद्योजातस्वरूपधृक् । इत्थं रक्षाकरं देवि कवचं देवदुर्लभम् ॥१२॥

Verse

प्रातःकाले पठेद्यस्तु सोऽभीष्टं फलमाप्नुयात् । पूजाकाले पठेद्यस्तु कवचं साधकोत्तमः ॥१३॥

Verse

कीर्तिश्रीकान्तिमेधायुः सहितो भवति ध्रुवम् । कण्ठे यो धारयेदेतत्कवचं मत्स्वरूपकम् ॥१४॥

Verse

युद्धे च जयमाप्नोति द्यूते वादे स साधकः । कवचं धारयेद्यस्तु साधको दक्षिणे भुजे ॥१५॥

Verse

देवा मनुष्या गन्धर्वा वश्यास्तस्य न संशयः । कवचं शिरसा यस्तु धारयेद्यतमानसः ॥१६॥

Verse

करस्थास्तस्य देवेशि अणिमाद्यष्टसिद्धयः । भूर्जपत्रे त्विमां विद्यां शुक्लपक्षेण वेष्टिताम् ॥१७॥

Verse

रजतोदरसंविष्टां कृत्वा वा धारयेत्सुधीः । संप्राप्य महतीं लक्ष्मीमन्ते मद्देहरूपभाक् ॥१८॥

Verse

यस्मै कस्मै न दातव्यं न प्रकाश्यं कदाचन । शिष्याय भक्तियुक्ताय साधकाय प्रकाशयेत् ॥१९॥

Verse

अन्यथा सिद्धिहानिः स्यात्सत्यमेतन्मनोरमे । तव स्नेहान्महादेवि कथितं कवचं शुभम् ॥२०॥

Verse

न देयं कस्यचिद्भद्रे यदीच्छेदात्मनो हितम् । यो अर्चयेद्गन्धपुष्पाद्यैः कवचं मन्मुखोदितं तेनार्चिता महादेवि सर्वे देवा न संशयः ॥२१॥

Verse

इति श्रीभैरवतन्त्रे श्रीसदाशिवकवचं सम्पूर्णम् ॥

sadāśivakavacam
sadāśivaśākinīkavacam

सा विद्या या विमुक्तये

Built with Sankalpa at Gyaandweep

Gyaandweep

© 2022-2026 Granthajyoti Pvt Ltd.

Privacy & Terms