aSTakam
sītārāmāṣṭakam
सीतारामाष्टकम्
Verse
ब्रह्ममहेन्द्रसुरेन्द्रमरुद्गणरुद्रमुनीन्द्रगणैरतिरम्यं ।
Verse
क्षीरसरित्पतितीरमुपेत्य नुतं हि सतामवितारमुदारम् ।
Verse
भूमिभरप्रशमार्थमथ प्रथितप्रकटीकृतचिद्घनमूर्तिम् । त्वां भजतो रघुनन्दन देहि दयाघन मे स्वपदाम्बुजदास्यम् ॥१॥
Verse
पद्मदलायतलोचन हे रघुवंशविभूषण देव दयालो ।
Verse
निर्मलनीरदनीलतनोऽखिललोकहृदम्बुजभासक भानो ।
Verse
कोमलगात्र पवित्रपदाब्जरजःकणपावित गौतमकान्त । त्वां भजतो रघुनन्दन देहि दयाघन मे स्वपदाम्बुजदास्यम् ॥२॥
Verse
पूर्ण परात्पर पालय मामतिदीनमनाथमनन्तसुखाब्धे ।
Verse
प्रावृडदभ्रतडित्सुमनोहरपीतवराम्बर राम नमस्ते ।
Verse
कामविभञ्जन कान्ततरानन काञ्चनभूषण रत्नकिरीट । त्वां भजतो रघुनन्दन देहि दयाघन मे स्वपदाम्बुजदास्यम् ॥३॥
Verse
दिव्यशरच्छशिकान्तिहरोज्ज्वलमौक्तिकमालविशालसुमौले ।
Verse
कोटिरविप्रभ चारुचरित्रपवित्र विचित्रधनुःशरपाणे ।
Verse
चण्डमहाभुजदण्डविखण्डितराक्षसराजमहागजदण्डम् । त्वां भजतो रघुनन्दन देहि दयाघन मे स्वपदाम्बुजदास्यम् ॥४॥
Verse
दोषविहिंस्रभुजङ्गसहस्रसुरोषमहानलकीलकलाप ।
Verse
जन्मजरामरणोर्मिमये मदमन्मथनक्रविचक्रभवाब्धौ ।
Verse
दुःखनिधौ च चिरं पतितं कृपयाद्य समुद्धर राम ततो माम् । त्वां भजतो रघुनन्दन देहि दयाघन मे स्वपदाम्बुजदास्यम् ॥५॥
Verse
संसृतिघोरमदोत्कटकुञ्जरतृट्क्षुदनीरदपिण्डिततुण्डं ।
Verse
दण्डकरोन्मथितं च रजस्तम उन्मदमोहपदोज्झितमार्तम् ।
Verse
दीनमनन्यगतिं कृपणं शरणागतमाशु विमोचय मूढम् । त्वां भजतो रघुनन्दन देहि दयाघन मे स्वपदाम्बुजदास्यम् ॥६॥
Verse
जन्मशतार्जितपापसमन्वितहृत्कमले पतिते पशुकल्पे ।
Verse
हे रघुवीर महारणधीर दयां कुरु मय्यतिमन्दमनीषे ।
Verse
त्वं जननी भगिनी च पिता मम तावदसि त्ववितापि कृपालो । त्वां भजतो रघुनन्दन देहि दयाघन मे स्वपदाम्बुजदास्यम् ॥७॥
Verse
त्वां तु दयालुमकिञ्चनवत्सलमुत्पलहारमपारमुदारं ।
Verse
राम विहाय कमन्यमनामयमीश जनं शरणं ननु यायाम् ।
Verse
त्वत्पदपद्ममतः श्रितमेव मुदा खलु देव सदाव ससीत । त्वां भजतो रघुनन्दन देहि दयाघन मे स्वपदाम्बुजदास्यम् ॥८॥
Verse
यः करुणामृतसिन्धुरनाथजनोत्तमबन्धुरजोत्तमकार ।
Verse
भक्तभयोर्मिभवाब्धितरिः सरयूतटिनीतटचारुविहारी ।
Verse
तस्य रघुप्रवरस्य निरन्तरमष्टकमेतदनिष्टहरं वै यस्तु । पठेदमरः स नरो लभतेऽच्युतरामपदाम्बुजदास्यम् ॥९ ॥
Verse
॥ इति श्रीमन्मधुसूदनाश्रमशिष्याच्युतयतिविरचितं श्रीसीतारामाष्टकं सम्पूर्णम् ॥
