aSTakam
veṅkaṭeśāṣṭakam 1
वेङ्कटेशाष्टकम् १
Verse
ॐतत्सदिति निर्देश्यं जगज्जन्मादिकारणम् । अनन्तकल्याणगुणं वन्दे श्रीवेङ्कटेश्वरम् ॥१॥
Verse
नतामरशिरोरत्न श्रीयुतम् श्रीपदाम्बुजम् । प्रावृषेण्यघनश्यामं वन्दे श्रीवेङ्कटेश्वरम् ॥२॥
Verse
मोहादिषडरिव्यूहग्रहाकुलमहार्णवे । मज्जतां तरणीं नॄणां वन्दे श्रीवेङ्कटेश्वरम् ॥३॥
Verse
नाथं त्रिजगतां एकं साधुरक्षणदीक्षितम् । श्रीशेषशैलमध्यस्थं वन्दे श्रीवेङ्कटेश्वरम् ॥४॥
Verse
राजद्राजीवपत्रश्रीमदमोचनलोचनम् । मन्दहासलसद् वक्त्रं वन्दे श्रीवेङ्कटेश्वरम् ॥५॥
Verse
यन्मुखेन्दुस्मितज्योत्स्ना भूयसीं तमसां ततिम् । विधुनोति प्रपन्नानां वन्दे श्रीवेङ्कटेश्वरम्॥६॥
Verse
नान्तस्य कस्यचिद् वाक्यं शब्दस्यानन्य वाचिनः । ब्रह्मारुद्रेन्द्रजनकं वन्दे श्रीवेङ्कटेश्वरम् ॥७॥
Verse
यद्वक्षःस्थलमध्यास्य भाति श्रीरनपायिनी । तडिल्लेखेवाभ्रमध्ये वन्दे श्रीवेङ्कटेश्वरम् ॥८॥
Verse
वेङ्कटेशाष्टकमिदं नरकण्ठीरवोदितम् । यः पठेत् सततं भक्त्या तस्मै विष्णुः प्रसीदति ॥
Verse
॥इति श्री वट्टेपल्ले नरकण्ठीरव शास्त्रि विरचितम् श्री वेङ्कटेशाष्टकं समाप्तम् ॥
