aSTakam
āśrayāṣṭakam
आश्रयाष्टकम्
Verse
गिरिचरं करुणामृत सागरं परिचरं परमं मृगयापरम् । सुरुचिरं सुचराचरगोचरं हरिहरात्मजमीश्वरमाश्रये ॥१॥
Verse
प्रणतसञ्चयचिन्तित कल्पकं प्रणतमादिगुरुं सुरशिल्पकम् । प्रणवरञ्जित मञ्जुळतल्पकं हरिहरात्मजमीश्वरमाश्रये ॥२॥
Verse
अरिसरोरुहशङ्खगदाधरं परिघमुद्गरबाणधनुर्धरम् । क्षुरिक तोमर शक्तिलसत्करं हरिहरात्मजमीश्वरमाश्रये ॥३॥
Verse
विमलमानस सारसभास्करं विपुलवेत्रधरं प्रयशस्करम् । विमतखण्डन चण्डधनुष्करं हरिहरात्मजमीश्वरमाश्रये ॥४॥
Verse
सकललोक नमस्कृत पादुकं सकृदुपासक सज्जनमोदकम् । सुकृतभक्तजनावन दीक्षकं हरिहरात्मजमीश्वरमाश्रये ॥५॥
Verse
शरणकीर्तन भक्तपरायणं चरणवारिधरात्मरसायनम् । वरकरात्तविभूति विभूषणं हरिहरात्मजमीश्वरमाश्रये ॥६॥
Verse
मृगमदाङ्गित सत्तिलकोज्वलं मृगगणाकलितं मृगयाकुलम् । मृगवरासनमद्भुत दर्शनं हरिहरात्मजमीश्वरमाश्रये ॥७॥
Verse
गुरुवरं करुणामृत लोचनं निरुपमं निखिलामयमोचनम् । पुरुसुखप्रदमात्मनिदर्शनं हरिहरात्मजमीश्वरमाश्रये ॥८॥
Verse
आश्रयाष्टकं सम्पूर्णम् ॥
